Rel kawng kalna tur ram neitute luhai

Bairabi leh Sairang
inkar rel kawng siam tum mek kal dan tur hriat theih loh avangin Bairabia ram neitute chu an luhai hle ni-a hriat a ni.
"Rel kawngin a tihchiat tur ram neitute'n compensation claim theih a nih thu leh pass thehluh tur a nih thu VC-ten an autir a, eng chin nge rel kawng chuan a huama a tihchhiat dawn tih hriat a ni si lo a, rinthutein kan thehlut vel mai mai," tiin Bairabi pa pakhat chuan a sawi.
"Claim theih hun chhung a rei lo bawk si a, kan lo claim thei ta lo a nih pawhin claim thei reng si-a claim lova chan ngawt ai chuan a \ha zawk e, kan ti ringawt mai a ni," a ti bawk.
"PWD-in kawng an sial dawn a, a huam chin tur an sah en ang kha a awm ve lo a, pillar chu an phun a, mahse, a karah tlangte a lo awm a, enzawn theih pawh a nih loh avangin a claim thei tur chin hi hriat a har khawp mai," tiin Bairabi VCP J Lalchhuanawma chuan a sawi.
"Anni'n khawl hmang vekin thil an ti a, khawl kan nei ve si lo a, chutih laiin helaia min awmchilhtute lah station master-te an nih avangin an hriat zawng a ni ve si lo a, a buaithlak khawp mai. DC kan han zawh fiah dawnin Delhi-ah a lo zin daih si a. Claim thei reng siin in hmuh loha min puh ai chuan rawn theh lut rawh u kan ti ta a ni," VCP chuan a ti.
"DC a\anga lehkha kan dawn ang angin kan puang ve tawp mai a ni," a ti bawk.
Rel kawngin a tihchhiat tur ram neitute hnena compensation an claim theih leh theih loh hrilh fiah turin VC te pawh rel kawng kal dan tur hi hrilh fiah an ni bik lo a; VC lam chuan rel kawng kal dan tur sketch map an hmu nia sawi chungchangah pawh VCP chuan, "Railway lam a\angin ni lovin SDO (Sadar) te an lo kal a, lei verhna tur khawl dahna tur ram neitu compensation pek a ngai dawn a, chu chu a suma pe lovin a pawh tur kawng laih sak zawk ila tia dawrpui turin min sawm a, chumi \uma kan hmuh chauh chu a ni," a ti a ni.
Bairabi leh Sairang inkar rel kawng siam turin a tihchhiat tur ram neitute tan hian chawlhkar hnih chhung compensation claim nan hun hawn a ni a, chu chu karleh September ni 5 khan a tawp a ni.
Rel kawngin a tihchhiat tur ram neitute bakah leiverhin a kaltlang tur ram neitute chuan compensation an dawng thei dawn nge dawng thei dawn tih an inhre lo a, pass erawh chu an thehlut nual hlawm niin thudawn pakhat chuan a sawi.
Bairabi leh Sairang inkar rel kawng siam turah hian Bairabi huam chhungah km 1.8 vela thui leiverh a awm dawn nia sawi a ni.
Thudawn pakhat chuan rel kawng tur survey-tute hian pillar- a sen, a eng leh a var an phun a, a sen chu rel kawng lai tak tur niin a var leh a eng te chu a sir tur nia sawi a ni a; chutih laiin a sen a\anga a eng leh a var awmna hlat zawng chu a inchen lo nuai niin a sawi.
Chuvangin rel kawng hian metre 50 a huam dawn nia sawi a nih laiin hmun \henkhatah chuan pillar var an phunna hi metre 30 chuang hret a nih laiin metre 20 tling loa phunte pawh a awm leh tho avangin compensation claim thei nih leh nih loh hi inhriat a harsa hle niin a sawi bawk.
"Ram hi kan enkawl dan leh cheibawl dan chu a inang hauh lo a, enkawl \ha vak lote pawh an awm laiin theihtawp chhuaha hun leh tha, sum leh pai neih zawng zawng senga lo enkawlte kan awm ve tho a. Enga mah hmu lova chung zawng zawng kan chan vek ringawt chu thil ni thei a ni bik lo. Mahse, hei chinchang kan hre lo tlang si a, thil kalhmang leh a ngaihna hre deuh hlek min buaipui turte han awm se kan ti ngawt mai," tiin pa pakhat chuan a sawi a ni.

Related Posts :