Anthurium Festival kalkawng

¢ PB Lalrammawia

Kumina Anthurium Festival chu Anthurium Festival vawi 5-na a ni a, ni hnih awh a ni. A ni hmasa zawk chu Larsapin a hawng a, a ni hnihna chu tourism minister-in a hawng ve thung a, chutiang khatiang chuan programme hman a ni a, tiin chipchiar taka report ka tum lo.


A ni hnihna- Inrinni chu kan hman ve deuh ni a nih avangin thianzahovin he Anthurium Festival hi chhim ve ila kan ti a, mahse chhuna press conference kan han hman zawh meuh chuan dar khat a lo ri vu tawh a. Hmanhmawh rilru ang reng takin Reiek lam panin kan tlan chhuak ve ta a.

Kan tlai tawh viau na a, keini anga tlai an lo la tam kher mai. Kawnglakah chuan Reiek lam pan lirthei chi hrang hrang kan inzui duah duah a, taxi leh bike an tam deuh ber a, a karlakah car a inrawlh ve zauh zauh.

Dihmunzawl thlen hma kawngpui kam thingbuk hlim hnuaiah a khat mawi tawkin nula leh tlangval an lo chawl a, an lo nui ham ham a, nuam an tih hmel khawp mai. Chawhnu her tawhah Anthurium Festival hman tumin Reiek lam an pan ve bawk a, mahse anthurium festival kha an kal chhan dik tak a nih vak hmel loh khawp mai.

Ka ngaihtuahnaah chuan thil pakhat a lo lut a; kawngpui kama thing dingin hlim nuam tak a siam chu kan thalaiten chawlh hahdam nan an hmang a, hun hlimawm tak an hmang a. Green Mizoram denchhena tuna kawngpui dunga kan thingtiak phunte hi tha takin lo thang lian ta se, tun atanga kum 15 velah chuan kan zinkawngte hi a va han nuam dawn em tih ka ngaihtuah a.

Mahse, tuna thing tiak phunte hi dam khawchhuak zo eng zat tak awm ang maw? Bakah, kan enkawl dan hi a tlaran zawng bawk. Tunhnai mai khan supply minister-in media mite a kawmnaah Mama (Vanglaini) chuan Ailawng bula kawngsira thing tiak phun chu a hung nan thingtuai banpuam tiat tiat an hmang tiin supply minister, forest minister ni bawk hnenah a sawi a. Minister chuan a hung nan mau tal hman ni se tha a tih thu a sawi a. Party worker lam atanga minister tawiawmtu pakhat chuan supply thil nen a inzawm vak loh thu a lo sawi a, mahse MJA president chuan supply minister chu forest lam changtu a nih tho avangin forest thil sawi chu a leng vek tura a ngaih thu a lo sawi ve bawk a, minister ho chuan forest lam kan han sawi leh rih a.

Hetianga ka han sawi kai deuh duah chhan chu, minister hian phai lam hotute a dawrnaah PSO atana an pek Punjab Police pakhat chu thingpui inna tur cheng za pek a tum thu leh, chu police chuan 'Punjab Police ka ni a, ka la thei lo' tia a lo chhan dan te chu supply chungchang a sawi kai hmaa thuhmaa a sawi avangin ka han sawi chhuak ve mai a ni.

Reiek kawngah hian hmun pakhata thing tiak phun chu mihring aia sang hi an lo ding thuau mai a, a kung bul an sam fai hluau mai bawk a, a hmuhnawm hi ka han ti khawp a, a thla ka la nghe nghe a.

Thawkkhat lai khan Falkawn lamah kan va kal a, nikum lama Green Mizoram denchhena kawngsira thing tiak phun kan va en a, thing tiak chu sawi loh, tam tak chu a hungna mau pawh hmuh tur awm tawh lo khawpin hnimin a lo bawh khat luk hlawm a. Kan kal hnu thla khat velah sorkar chuan mahni thing tiak phun theuh enkawl tura a tih vangin sorkar department tam tak chuan a samfai hna leh hung that hna an va thawk ta a. Falkawn Referral Hospital compound-a minister leh officer lianho thingphun chu thirpalin an hung a, mihring chen chen chu an ni ve hlawm tawh a, mahse hnimin a bawh khat luk tho. Tunah hian an lo samfai hman tawh em ang chu maw.

Tichuan, Reiek lam pan chuan kan tlan zel a. Aizawl chawmtu tuilakna lui bulah chuan nula leh tlangval an lo ding nghuk a, keini tan chuan an haw lam nge an kal lam tih hriat a harsa khawp mai; chak takin kan tlanpel a.

Kawngchhovah kan tlan zel a. Hmun pakhatah hian kawngsirah Dawr an lo hawng a, ei theih chi hrang hrang leh grape juice an lo zuar a, chawl khawmuang lovin kan tlan zel a. Tuikhawhthla awmna hmun kan thleng a, chutah chuan kan chawl ve ta a.

Midang pawh an lo zi huai huai mai a. Bungkawn Self Help Group chuan eitheih chi hrang hrang leh grape juice an lo zuar a, aurinna nen an lo ri le lu a.

Thenkhat chu a chhak lawk kawngsira chawlhbukah an lo thu bial laih laih a, thenkhatin kawngsir remchang laiah tanhmun an lo khawh a, thenkhat tuikhawhthla enin an lo hmanhlel a, thlalakna a de zuai zuai reng a. Hmeichhe naupang leh mipa naupangte pawh tuiah an lo inbual a, hmeichhe naupang pakhat chu ruak vekin tuikhawhthla hnuai tui tling bulah a lo tlan teu teu a.

Chu hmun chu a va han 'innocent' tak em! Tuikhawhthla siperin a per phak loh deuhna hmun thenkhatah chuan tlangval thenkhatin dawhkan an rem a, an thil ken an phawrh a, nuam tih hmel takin an inho a. A thlang deuh tiauphovah chuan patling pathum hian sawhchiar an lo thut hual a, an dawm bawk a. Kan sir lawkah chuan vainu hi a lo ding a, Thartea chuan thla a laksak a, tuikhawhthla langin. An chhungkuain Anthurium Festival hmang tura kal an lo ni ve a. A pasal, Bank of Baroda-a cashier hna thawk Pu Roy-a chuan Mizoramah kum hnih vel an awm tawh thu leh nuam a tih thu a sawi a, an chhungkaw thla kan laksak a.

Keini pawh chuan Self Help Group sawhchiar zawrh chu kan lei a, cheng sawm man chu a tam khawp mai. Grape Juice pawh duhtawk lei tur a awm.

Reiek Tourist Resort kan thleng a, haw tur lam nen kan intawk zut tawh a. A tualzawlah Anthurium Girl an kal kual a, zaithiam an zai a,fiamthu thiamin fiamthu an thawh a. Ruah a sur buan buan a, ruahsur a han a, kan haw leh a ni deuh mai.

A hmuna kan awm chhung hian Guwahati atanga festival rawn chhim tura lo kal tlangval rual chuan Mizo typical village an lo tlawh a, pipu-ah an lo uai a, an thla te ka laksak a, festival chu nuam an tih thu an sawi a, nuam an tih hmel ve tho mai.

Kum danga an tih ngaih loh, nghakuai khaia inelna chu khaw pawn sangha dilah a ni a, kan thleng ve hman ta lo, kan tel chak thu kan sawi liam a ni ta mai.

Tun tum Anthurium Festival-ah hian festival hmannaah grape juice zawrh an lo khap a ni awm e, a hnu feah kan hre ve chauh a. Hei vang hi a ni ang, zanah kan hawng a ni a, zan dar 7 velah pawh tuikhawhthla bul chu a lo la rak hle mai a. A thlang lama dawr te pawh an lo la bawr laih laih a, grape juice an zawrh miau avangin.

Thudawn pakhatin a sawi danin Anthurium Festival hnuhnung berah khan grape juice avangin intihbuaina a lo thleng tawh a ni awm a, chu chu tun tuma festival hmannaa grape juice zawrh an lo khap chhan chu a ni awm e. Mahse, a hmunah khan a ruka zuar an awm tho, thudawn pakhat chuan a ti.

Anthurium Festival-ah hian Anthurium pangpar puala programme duan chu Anthurium Girl-te kha an ni deuh mai awm e. Festival neihna hmun kha Anthurium parin an chei a, chu chu a ni leh deuh mai. Nikum khan Anthurium par an zuar a, mahse Buhban chhum a lar zawk tlat! Anthurium puala kutpui kan hmang thei hi a tha a, mi tam tak hlimna thlentu a ni a, a lawmawm e, mahse...

Anthurium Festival hi a ngaiah ngawr ngawr ni lo, hmun hrang hranga kan tourist resort promote nan te pawh hmang thei ila, a tha khawp ang. Tuna Hmuifang Tourist Resort te saw state dang atanga rawn chhimtute hmuhtirna chance tha tak chu Anthurium Festival hi a ni.

A thuhrimin Reiek Tourist Resort hian tun dinhmunah chuan mikhual a dawl zo lo lam deuh chu niin a lang a, programme liantham deuh huaihawtna hmun tura kan vauchher deuh ber a nih tawh avang hian, tun aia a leta zau hian chei that a tul niin a lang.

Festival sawi takah chuan tuna Zawlaidi hmang hian Festival pakhat chu kan mithiamte hian chher chhuah dan ngaihtuah leh thei se a duhawm khawp mai. Kuthnathawh min ngaihsantirtu kan hruaitute hian kuthnathawktute puala programme lian tham an siam ve theihna chance tha tak hi bawhpelh lo teh se. Kan ram hruaitute pawhin Agro-based industry an sawimawi a, mipui pawh hian i bawh hum hum ang u. Anthurium zawng, bawh hum hum tham pawh niin a lang lem si lova.

Anthurium Festival chu

Ni hnih awh tur Anthurium Festival 2010 chu September ni 9 khan Reiek Tourist Resort-ah Mizoram Governor M.M. Lakhera chuan a hawng. State Planning Board vice chairman Lalkhama khualzahawm a ni.

Larsap chuan Mizoramin ram mawi, sik leh sa duhawm tak a neih thu sawiin, "Tun kum kal ta mai chhung pawh khan agriculture, horticulture leh floriculture lamah hmasawnna namen lo kan hmu a, kutthemthiam, tualtahpuan dehchhuah leh kan thlai thar te damdawi pawlh loh an ni te hi khawvel ramdang hmuh phakah pholan thiam a tul a ni," a ti.

State pawn lam mi te nasa leh zuala hip lut turin keimahni remchanna lam chauh thlir lova an tana hun remchang buatsaih thiam a tul. Mizoram thar chhuah Anthurium hi India ram State dang mai bakah ram pawnah hial thawn chhuah a ni thei hi a chhuanawm takzet a ni," Governor chuan a ti bawk.

Khualzahawm Lalkhama chuan India ramah inhungbingna tha tak neia Mizote kan awm chu vanneihthlak a tih thu a sawi a. Sorkar laipui atanga hmasawnna sum thahnem tak lo luanglut thin te chu chhawr tangkai thiam turin Reiek leh Ailawng mipuite pawh tan la turin a fuih a ni.

He festival-ah hian Mizo Cultural Organisation, Art & Culture leh Mizoram Gorkha Youth Association ten hnam lam chi hrang hrang an entir a. MZI Reiek leh zaithiam lar tak tak ten kalkhawmte chu hla leh rimawi chi hrang hrangin an awi a, Heritage Handloom & Handicraft buatsaih Fashion Show hmuhnawm tak thlir tur a awm bawk. Tun tum Anthurium Festival-ah hian kum danga la tih ngai loh nghakuai chiaha sangha inman tam siaka inel a ni a, Rifle leh thal inkahsiak pawh neih a ni bawk.

Festival hawnna inkhawm hi Tourism Department Joint Director Pu Biakthanmawia'n a kaihruai a,Tourism Minister Pu S.Hiato leh sorkar mi pawimawh tak tak te bakah mipui thahnem takin kut hi an chhim a ni.

Anthurium Festival hi vawiinah hman chhunzawm leh a ni ang a, Tourism Minister Pu S. Hiato chu khuallian a ni ang.

September ni 10-ah tourism minister S Hiato-a'n Anthurium Festival hi a khar a, "Hetiang festival hi tun aia tam leh uar zawka tih tum a ni. Khualzinte hmang hian Mizoram chhungah sum tam tham tak a lut a; chuvangin mikhualte duat thiam hi a pawimawh a ni," a ti.

"Tun kum chhung hian rampawn mi 600 chuang leh India hmun dang atangin mi 50,000 chuangin Mizoram hi an tlawh a. Khawvel pum huap pawha mite ngaihsan Mizoramin Anthurium kan thawnchhuak thei leh thalaiten intihhlimna tur hun leh hmun remchang hlimawm tak kan hmang thei hi a lawmawm hle a ni," a ti bawk.

Anthurium Festival hi kum 2006 atang khan neih tan a ni a, he festival-ah Mizoram a cheng hnam hrang hrang nunphungte leh khawsakziate lantir thin a ni. Inrinnia Anthurium Festival hmannaah khan hnam lam leh zai bakah Fashion Show te neih a ni.

Related Posts :