Vawi Khat Inkawmna Ah Engtin Nge?

Tlangvalin a nula duh duh a rim a, nulain a lo ngaihzawn ve leh ngaihzawn ve loh thu-ah harsatna a awm lo. Nula chu tu pawh ni se a inlengte an be chhe tur a ni lo tih a ni thin.

Tunlai khawvel danglam zelah nula leh tlangval nun pawh nasa takin a danglam mek. Tlangvalin nula a rim dawn a nih chuan inhriattir lawk lova len 'thut' ang hun kha a liam tan a, nula pawhin inleng atana duh deuh bik a neih hun te pawh a thleng ta. Nula te'n inleng in nei fo thin a ni thei, tlangval pawhin nula in rim fo tawh a ni thei; vawi khat inkawmna tur leh hun lo kal zelah harsatna awm thei leh fimkhurna lai tur han thur chhuak dawn teh ang. Hun rei tak in ngaihzawn hnuah pawh a hnuaia kan tarlante hi hman tangkai theih a pawimawh mai ang.

INCHEINA: Incheina tih lemah nula i nih chuan i inleng neih tur urlawk lutuk avanga make up uar uchhuak tak te, thawmhnaw pan leh lang thui lutuk ang chi te, sawi kim sen a ni lo mai thei.. Tlangval pawhin incheina fimkhur a tha hle, t-shirt inziak rang bei buai lutuk ang chi te etc.. Kan sawi tum tak chu vawi khat inhmuhnaa mizia leh awm dan tur, a mawi lo zawnga mitthlaa cham reng thei tur ang chi lakah inthiarfihlim tum hram a tha tih mai a ni. Nalh leh fai, zahawm leh mawi tawk a hlu ber ang. Inrintawk na hlauh tir thei inthuamna lamah fimkhur ni thei bawk se a fuh zual ang.

A RUH LANGIN: Mihring mizia leh awm dan phung a inang vek lo tih chu kan hria e. Vawi khat inkawmnaa engkim a ruh langa sawi nghal vek a fuh lo thei. Mi 'frank' tak pawh i ni thei e, mahse i mizia zawng zawng phawrh nghal vek a fuh lo.

I nihna anga pawm tur che pawhin hun a la awm e, nakinah khang kha chu i sawi pawh ngai loin a lo lang chhuak mai ang. Kei chu chumi natna benvawn chu ka nei a, ka thin a chhe lutuk, ka luhlul lutuk, ka inbual khat... Heng hi chu nakinah a lang vek ang, mahnia atha ber hmang khan lo inhmachhawn rih phawt teh u.

TAWNG TAM NGE TAWNG TLEM?: Vawi khat inkawmnaah chuan mipa emaw hmeichhia emaw tan pawh tawng zuah zuah a fuh lo bakah tawng sual palh a awlsam, chuvang chuan inven fimkhur a fuh. Sawi tur hriat loh luatah mi chanchin sawi vak pawh awl tak a ni. An laina hnai te kha i lo sawi chhe palh thei a nia!

Sawi tur hriat loh vanga ngawih dun vang vang chang pawh a awm thei ang. Chung hun a lo thlen palh chuan mipa fel leh fing a lang chhuak thin. Titi tur sawi chhuah thiam a pawimawh a, remchang zawn thiam a pawimawh. |awng tui laklawh a awm a, sawi tur neih ang zawng zawng leh mahni tui zawng sawi a, midang ngaihtuah miah lova tawng vak vak a awm thei. Fimkhur a tha.

NGAIHZAWNG HLUI: Ngaihzawng hlui te chanchin sawi vak vak hi a fuh ber lo chawk. Tute ngaihzawng hlui te nen emaw a inngaizawng hi a tam zawk an ni a, tehna hrang hrang hmanga lo inteh nghal ngawt a fuh rih lo. Mihring chuan thatna lai leh that lohna lai kan nei vek a. Kan thatna lai inhmuhpui thiam tum hram hram hi inngaihzawnna tinghettu pawimawh ber zingah a sawi theih awm e. "Ka ngaihzawng hlui kha chuan hetiang hi a a ngai pawimawh a, a ngaih pawimawh ang hi ka tihlawhtling thei lo..." tih fo ang chi te pawh hi a fuh lo.

Related Posts :