Court Leh Mihring Chanvo

¢ HC Vanlalruata

Tanhril VC member Pu Lalpiangliana tualthi nia sawi chungchang leh a behbawm hian tualchhung chanchinbu a luah hneh hle mai a. Tun thleng hian a thihnaa mawhphurtu nia puh Police-te bail dilna chungchang thlengin chhiar tur a la awm. Mipui leh chanchinthar lakhawmtute kan harh chhuah tak vang ni maw, engpawh chu ni se thil tha chin a awm a, thalo chin pawh a awm tih erawh chu a chiang a. Chanchinthar thehdarhtu lam pawhin a saptawng takin ‘sensitise’ lam aiin kan sensationalise’ a ni ve mai thei bawk.

Tanhril khawtlangin an sawi dan, Pu Lalpiangliana chhungte pawhin an sawi dan hi a dik a nih ngat chuan an ‘custody’ a lo dahtu Police te hi an thiamlo hul hual tih hi sawifiah zui ngailo khawpa thu dik a ni. Miin pawi a khawih (committed a crime) tih a inhria a, a thiam ang anga thil ti-in a pan theih hnai Jail thuneitute belbulin a inpe a. A inpek chhanah hian (a chhungte leh Tanhril khawtlang hruaitute sawi hi a dik chuan) a nunna atana a hlauhthawn vang a ni thei a, a thiltih dikloh hriat vanga inpe a ni thei bawk. Chutiang a nih laia a nunna humhimtu tura a pan sorkar aiawha lo buaipuitu tur Police te kuta a thi tih hi a dik ngat a nih chuan a runawm tawpkhawk a ni. Mahse, Court-in thutlukna a siam hma chuan hei hi a dik ngei a ni tia keini’n kan ngaihdan kan lo sawi ve erawh chu a thiang rihlo.

Thiltisuala puh (accused/suspect)-te Police-in an kawl laia kut an thlak (third degree) hi ram danin a phal hauh loh a ni a. A titu chu finfiah a nih chuan na taka hrem tur a ni a. VDP emaw JAC emaw SRS pawhin an ti thiang chuang lova, mimalin kan ti thianglo mai ni lovin a huhova kan tam zawk tih vangin tumahin mi kutthlak ngawt turin zalenna kan nei lo hrim hrim. Tunlai khawvelah phei chuan sual hnu chhui (criminal investigation) hi tharum hmangin an ti tawhlo hrim hrim a, khawvel thiamna (scientific investigation) hi an leklam ber a, chuvang chuan a lawm Forensic Science hi a lar tak em em.

Engpawhnise he thubuai bikah hi chuan Pu Lalpiangliana thihnaah hian a kawltu Police-te hian mawh an phur leh phur loh chu a chhuitute’n an chhui ang a, rorelna court-in thutlukna a siam huanah kan chiang mai dawn a. A thuphung erawh chuan ‘Custodial death’ anga sawi a nih avangin he thil hi chhui chian erawh chu a ngai tih loh rual a ni lo.

Hetihlai hian Tanhril khawtlang chet dan erawh hi chu dan rorelna zah lohna rawng a kai a, chumi rual chuan dan hmanga rorelna (Court) ring tawklova chetna a ni bawk. Thilsualtitu nia puhte bail-a chhuah an nih leh nih loh tur court-in a ngaihtuah dawn avanga court tuala punkhawm hian engdang mah a kawk lova, court rorelna rintawk lohna emaw, a aia thalo zawk, court thutlukna tur haw haw-a kan duhdan-a kal tir tumna, court vaubeh tumna a kawk thei. Court khan an duhdanin thutlukna siam tum sa lo ni mahse, midang ngaihah chuan haw haw a an nawrna vanga chutiang thutlukna chu court-in a siam ta niah a lang thei a ni.

Police thil chhuina kawngah hian court a inrawlh mawh hle a, Supreme Court meuh pawh a inrawlh khat hle. Mahse, thil diklo thup tumna a awm nia a lan chuan court chuan ngaihtuahin a chhui nawn tir leh emaw a chhuitu a thlak emaw thin thung. A chhuina (investigation) tak taka inrawlh erawh chu Court hian a ti ngailo tluk a ni. Court rorelnaah pawh hian a inrawlh thei chu court sang zawk a ni mai a, mipuiin emaw mimal emaw lo inrawlh hi dan rorelna zahlohna a ni a. Chin tam chi a ni lo.

Thubuai dang dangah pawh veng/khaw thenkhatin haw haw-a court tuala pun khawm kan la ching a. Hei hi chu tun ang hun dan rorelna hnuaia kan awm hnu hi chuan a tih chi tawh loh tih hi hriat a tul a. Court thutluknaa kan lungawiloh chuan court sang zawka kal mai hi ‘rule of law’ a taka zahna lantira dikna kan duhzia kan tarlanna tur kawng dik chu a ni fo a ni.

Democracy thuthlung hi kan hmuh thelh fo thin. Democracy hi a tam tam inhawrkhawma rorelna a ni lova, dan rorelna fel hi a ni zawk. Democracy-ah chuan kan aiawhte kan thlang chhuak a. Chuta kan aiawh kan thlante chuan dan an siam a. Chu dan chu sorkarin a kengkawh a. Dan hmanga sawifel ngai a awma thutlukna siam turin Court a awm leh a ni. Chuvangin Democracy hi mipuiin haw haw-a ro kan relna tur ‘Mobocracy’ a ni lo tih i hria ang u. Mobocracy chu rorelna fumfe leh sorkar awm lohna ‘Anarchy’ nen a lem chuang lo.

Hetiang tih kan chin chhung chuan ‘Civilised society’ ah kan inchhal thei lovang a, ramhnuai rorelna an tih mai angah hian kan la awm reng tihna a kawk zawk a. Dikna kan duh a nih chuan dan hmangin kan bawhzui tur a ni a. Dan chuan a kawng a zawh mai tur a ni (The law shall take its own course) tih thu hi pawm thiam i la mi changkang (civilised) nihna bul ber chu a ni e.