Tan Hahthlak England

¢ Hmingsanga

Mizo zingah England tantu an tam ngang mai. Hman zanah 2010 World Cup-a an match hmasa ber an khel a, England-in goal an thun khan thawm a tha hle. Kumin ah chauh a ni lo, kum dangah pawh England-in an khelh chuan thawm a tha thei hle.

Kan rhiat theuh angin England hian 1966-a World champion an nih bak kha champion an la ni leh miah lo. Football inpui tia sawi thin ni mah se ram leh ram khawvel huapa inelna sang ber World Cup-ah hian chanchin tha sawi tur an nei nghah lo hle. Kuminah hian beiseina sang tak nen South Africa an pan a, he thu i chhiar lai hian an match hnihna an khel tawh mai thei. England hian champion turin beisei an nei lo chu a ni miah lo. Mahse an player that dante en erawh chuan tan an hahthlak deuh lam chu a ni e a tih theih awm e.

England tan hian Football 'chhuan thar' tia sawi theih turin David Beckham, Rio Ferdinand, John Terry, Steven Gerrard, Frank Lampard, Michael Owen teho kha an rawn lar rual deuh thawt hlawm. A ruala rawn lar rual thut ni lo mah se hun thuhmun ang deuhin an lar hun hi a sawi theih awm e. An bul rawn tan leh leh an rawn lar tan tirh lai vel leh vawiin thleng hian beiseina sang tak an chhungah hian nghah a ni a. Heng chhuan tharhote hian engtikah emaw chuan England hi World champion an la nih pui ngei ang tiin beiseina pawh an nei sang hle thin a ni.

Heng chhuan thar footballer-te hi 2002 World Cup-ah chuan beiseina sang tak nei chhungin England mipuite chuan World Cup khel turin an vai liam a nih kha. Mahse, heng mite hi quarter-final-ah nekchhuah an ni. |henkhat chuan an la naupang a, nakinah chuan tawnhriat an ngah hun a thleng ang, an rawn che tha mai ang tiin beiseina an la nei zel. Hun a kal zel a, 2006 World Cup leh Euro 2008-ah beisei an pha lo leh a.

Hun a kal a, player tha leh beiseiawm te'n an belh zeuh zeuh bawk. Heng chhuan tharho hian ram leh ram inelna torunament an khelh chuan beisei sang pawl an ni chhunzawm zel.

Tunah hian Gerrard, Lampard, John Terry te an la awm a, inhliam vangin Ferdinand leh Bekcham te tel thei lo mah se player pangngai tak takin an hmun ruak an luah a ni. Player naupang leh tha te'n an belh bawk. An dinhmun hi sawifiah thiam a har hle. A chhan ni ta ang?

Thuthar thehdarhna kawngah England media-te hi an chak lawr lak a tih theih awm e. English media-te hian an ram player-te chanchin hi a tha lam leh a chhe lam an vawrhdarh chak hle. An fak zawngte an fak nasa a, an dim loh zawng pawh dim lo rem rem tak an ni. Heng footballer-te chanchin hi a kilkhawr ber thlengin an lipse kilh kelh duh!

Major tournament an khelh dawn phei chuan an thatna lai uar leh duhthawh takin an ziak a, an chhuah a, khawvel hian ngaihnawm ti takin a lo chhiar thin. An player te pawh hi an tha hlawm reng lah tak a, an chanchin han chhiar tak tak phei chuan tum an huphurhawm thin viau ta ve ang. Mahse a hun a lo thleng a, beisei an pha lo leh thin. An player-te class hi a sang tawk tak tak lo nge England team enkawltute hian an remkhawm fuh tawk thin lo?

Hman deuh khan Real Madrid chu star rual awmkhawm an ni a, an man leh an hlut dan, a sum zawnga chhut chuan turu tak an ni. Mahse lawmman lian lak an nei lo. Chutiang deuh chuan England team-ah hian star player an tam a, an indip nia sawi theih a nih rualin, player te an inpawh ttawk lo ti pawhin a sawi theih awm e. Hei hian chhunglamah tanrualna a tichhia nia sawi a ni fo.

England hi beiseina sang tak nen khawvelin a thlir mek. He team hian world champion ni thei turin player an nei tha tawk a, coach pawh an nei tha tawk. Champion hun a herchhuak rih lo nge an champion ngei ang tih zawhna chu World Cup zawhah chhan a ni ang.

Related Posts :