Kan Milarten Tute Nge An Tan?

Mizorama kawng hrang hranga mite hriat hlawh, kan milarte chuan hmuhnawm ti takin World Cup an thlir a, an tan zawng leh champion tura an rin te an sawi sap sap.

A tir lam la ni mah se football ngaihsanna ram- Mizoramah hian World Cup thawm a tha hle. Veng thenkhatah chuan big screen-a en te pawh an awm. Thenkhatin a stage sang deuh atangin hmun khata enkhawm an tum bawk.

Ni, World Cup meuh hi chuan tute mai pawh hi engemaw ti kawng zawng takin a khawih vek ti ila dik awm e. Ram rorel khawla tel phak khawpa pa zahawm te, Mizote thlarau lam nun a chauh changa kaiharh thintu revival speaker te, zaimi leh ziakmi, Mizote tihlim thintu te leh football team enkawltute, sam siam leh chhang siam te, KTP hruaitu leh Kohhran upa, chawhhmeh zuar leh second zuar te thlengin World Cup vangin hun khatah thamkhawm kan ni. Sorkar officer lian te, nula piannalh leh hmeltha te, mi naran leh mi ropui te leh tute mai pawh hun khatah luangkhawmin a pui a nawiin, naupang leh tarte pawhin an en nasa hle niin a hriat. Mizo zinga kawng hrang hranga mite hriat hlawh tak tak ten an tan zawng an sawi chhuak e.

Mizoram sorkara thalaite aiawh tia sawi theih tur kan neih mi tlem te zinga a pakhat, sports minister Zodintluang chuan, "|an ber pahnih ka nei, Argentina leh England ka tan ber a. Ka tan dan pawh a inang deuh chiah a. An pahnih hian inkhel dawn ta se tu zawk nge ka tan ang tih ka sawi thei lo, a buaithlak khawp ang," a ti.

Mizoram a kohhran lian ber Presbyterian Kohhran hnuaia revival team zinga hriat hlawh tak, Gospel Thunder Team speaker Zaitea chuan, "Kei chuan England ka tan ber a, kan nupui hian Germany a tan thung," a ti.

Mizoram mipuite min tihlimtu, tunhnai lawka an film tih chhuah thar Master Lee changtupa, Zephyr Drama club frontman Rotluanga chuan Brazil lo chu tan a neih loh thu a sawi.

Thangthar ziakmi zinga hriat hlawh tak Darrokima chuan, "World Cup kan hriat ve tan tirh atang tawha lo Brazil ve ngar ngar thin ka ni a. Tun tumah hian Brazil lo chu tan tur dang ka nei lo a, an champion ka ring," a ti a.

Zonet anchor zei leh hmeltha, lawm hlawh leh nuih heh tak, Zonuni chuan tan ber pathum vel sawi tur a nei. Inkhel a en tam lo na a, England zunah a uai a, Argentina leh Germany te pawh a tan em em tho. An player te chanchin i zawh vaih erawh chuan sawi tur a hre tam lo a, Mahse England tantu a ni tlat.

Zaithiam zingah 'veteran singer' tia sawi theih, Mizo Idol judge Rebbecca Saimawii chuan, "1982 World Cup atang tawhin Italy lo chu ka lo ti ve ngar ngar tawh a, tan thlak thut ang chi ka ni lo a, tun tumah pawh 'kan pawl' tia ka lo sawi ve thin Italy an tel a, kei chuan Italy lo tan ka nei lo," a ti.

'Rem ve thei se' tih hla atanga Mizo mipui ten kan hmelhriat, tunah chuan Brooklyn Lalsangkima Sailo nu ni ta SPi chuan, an ram hming bulah S a awm vang ringawt ni lovin Spain a tan ber thu a sawi.

'Fak zel che kan nuam' tih hla thiam leh nalh taka satu, Lunglei nula zaithiam leh kawm nuam Pensy chuan, "Ram dang tan tur ka hre lo, kei chuan Brazil ngat," a ti.

A hming ai maha 'Trinity-i' tia sawi thin, aw nalh tak neitu Mapuii chuan, "Pensy tan ang tan tum vang pawh ni lovin, midangin tan ve lo mah se Brazil ka tan ber a, chumi dawtah chuan England ka tan," a ti.

Nancy Zothanmawii chuan Mapuii tan ber dawttu England a tan ve ber thung.

Zaithiam aw pa leh nalh tak, Moody Chawngthu chuan, "Ka idol David Beckham tel lo mah se England hi Beckham te ram a nih vang hrim hrimin ka tan," a ti.

Robert Lalduhzuala chuan England a tan ber a, England a tan chhan kawng hnih uar takin a sawi a, "Khawvela ka player duh ber Rooney telna team a nih vang leh, chanchin tha kan dawnna hi UK lam an nih avangin ka tan lo thei lo, mi thenkhat chuan Durtlang hospital lama hna an rawn thawh that avangin Germany tan an awm a, chanchin tha kan dawnna lama mi pawimawhte rawn chhuahna hmun lam hawi chungin England ka tan a ni," a ti.

Zaithiam aw nalh a nihna baka music kalhmang hre tak a nihna larpuitu Tetei Ralte chuan, "Kei chu Brazil tantu ka ni," a ti.

Mizorama Ist Division club zinga daih rei ber pawl leh record nei tha tak, Dinthar FC enkawltu T Vanlalhluna chuan, "England ka tan ber," a ti.

Related Posts :