RUIHHLO DO!

¢ HC Vanlalruata

Kum 5 vel kalta atanga YMA-in ruihhlo do kum a puan nawn awn awn lai khan a tirah mipui an phur hle a. Mizoram thalaite ruihhlo avanga kan chan tam tawh em avang leh ruihhlo-in a tihbuai chhungkua leh thalai an tam em avangin in thlawp pawh a hlawh tak zet a ni.

Mahse, khatia YMA-in ruihhlo do beihpui a thlak dawn khan hruaitu hlui, YMA kal sual hlau-te chuan a do lam hi chu ti lovin inzirtirna lam uar hi YMA tih tur zawk a ni e, mite thlamuan thintu pawl kha pawl hlauhawm leh tihkhai-ah a tang dah ang e, tiin thurawn an pe a. Chutih rualin YMA hruaitu hlun tak thin pakhat chuan ruihhlo do hi a hlawhchham chuan zu kan do tel vang a ni ang, tiin a lo sawi lawk bawk a ni.

Hetianga mi thahnem ngaite thusawi hi kan YMA hruaitute beng-a-rawngah a lut lem lova. Talhfiak nen SRS kha an han che a, hun a lo kal zel a, sawiselna a nasat tak em avangin ruihhlo do chu kan bei zui hleithei ta lova; tha an han thlah chiah chuan a lo pung leh ta chiam mai a nih hi. Mimal zalenna rahbehna a nasa nia hriatna awm khan YMA hnathawh kha a ti hmelhem tlat mai a. Hna tha tak, thil tha tak kha a thawhna hmanrua an duh chhiat tak em avangin sawisel hlawh a lo chang zo ta a ni. A pawi khawp mai.

Mizote hi khawtlang zah mi, val upa-te thu chu thuawih taka zawm hnam kan ni a. Hei hi tun thlengin a la reh tak tak lo. Chuvangin YMA hotute hian talhfiak vilik vaklo pawhin zah an la phur a ni tih hi an hriat a hun - YMA-a nihna kha mahni intihlarna leh sahmim puarna ngawt atana hmang an nih loh phawt chuan. Chuvangin human rights mausam zawnga tharum thawh zawnga chet la kherlo pawh hian Excise leh Police te ai mahin kan khawtlang hruaitute hian mi zah leh hlauh an la hlawh a ni tih inhria sela. Chumi rual chuan zu an do tel a, an huang a zau luat avangin an do tum ber ruihhlo lamah an insawr bing tha thei lova. Chubakah zu chu ruihhlo aiin a lo biru nep deuhva, man a awlin a nuam a, a langsar awl bawk a. Chulam an bawh luatah chuan an hmingchhe hma ta niin a ngaih theih a. Mipui mimirin ruihhlo ang em ema zu kan huat siloh avangin zu do vak chu hmingchhiat a awl ve bawk a ni.

Tunah hian SRS thiah a nih hnu-ah CADS a lo ding leh ta a. Ruihhlo a hluar leh tak em avangin a tul thlu-ah kan ngai a nih pawhin a awm khawp tho mai. Tunah rih hi chuan ruihhlo bik an thlur bing tih a hriat a; an thawm hriat chinah chuan an hlawhtling khawp mai. Hetiang lam thawk tura hlawh neia rawih Excise leh Police aia an man thei anga lang chungchang hi chu a hranpaa ngaihdan thawhna tham a ni a, tun tumah chuan kan luh chilh lovang a. Mipui thlawp an hlawh avanga CADS hi che thaah ngai i la a dik ber awm e.

Ruihhlo vai leh dap hna thawh hi a tul a, a pawimawh em em rualin sorkarin a tih awm tak hmaihthelh a la neih hi vei a tul hle-in ka hria. Thalaite suat puk puk ve lo, harsatna pawh ruihhlo ngaite harsatna aia siam tlem zawk zu khapna dan chu khauh tak mai kan nei a. Hei hi India ram puma hman pawh nilo, Mizorama hman tura siam a ni. Zu funte khat lo kawl pawh tanin-a tirhliam nghal theihna tur dan khauh tak kan nei a, nu nau pawm lai thlengin kan inthawn liam reng a nih hi.

Chutihlai chuan ruihhlo tihching leh zuartute hremna erawh kan mamawh ang tun thlengin kan la neilo. Heroin leh Cocaine tih vel ngai leh kawl leh zuarte hremna chu ND&PS Act tha tak kan nei a. A hremna pawh a na tha tawk hle. Hetah hi chuan sawi thui tur a awm lo. Mahse, kum 1997 vel chho atanga kan thalai suattu ber clinical drugs kan tih mai ho (spasmo proxyvon etc.) ngai, kawl leh zuar hremna tur dan khauh leh fum fe tak tun thlenga kan la neilo hi chu ngaihthah vang liau liau a ni.

Tun dinhmunah chuan Drugs and Cosmetics Act leh Assam Drug Control Act te kan la hmachhuan ta mai mai a. Hremna a na lo teih teih si a, kan thalai ruihhlo vanga thi 90 % vel thihna chhan hi kan sorkar hian a ngaimawh tawklo a ni tih bak chu sawi tur a awm lo. YMA pawh hian a taka ruihhlo dap hna an thawh rual hian thalaite’n an ‘abuse’ tam ber clinical drugs thenkhat khapna dan khauh siam tur hian sorkar hi nawr chak teh se. Dan tel lovin a inhrem tak tak theih lohva, hremna na tak pe thei dan tellovin mi na takin a hrem theih bawk si loh va. Hremna a nat loh chuan a titute an huangtau zel dawn tih sawi lawk tur hian Zawlnei nih a ngai lo.

Related Posts :