Aizawl-ah No 4 a vang, CADS hi SRS thlaktu a ni thei em?

Central YMA chuan damdawi hman sual thin ho a do, a do atang chiahin a vang nghal.

Aizawl khawpuia drug addict ung hluai chu nu leh pa tam tak timangangtu a ni. damdawi hman sual zingah heroin, no 4 kan tih mai chu a lar hle.

No 4 kan tihte hi Burma atanga lokal a ni a, a tirah chan tlawm takin an zuar a, tunah erawh no 4 addict an tam tak vangin a to tawh hle.

Central YMA chuan CADS a din a, hun reilote chhungin CADS te chuan mihring 59 thu zawhfiah atan an la hman a, Nitrosun 34 tablets, Ganja 2.906 kgs 25 pkd, 416 rolls leh parvon/Proxyvon 4460 Capsules, No 4 hawng 1, 54 cans, chhinsen 60 chuang an man tawh a.

Ruihhlo an man hlut zawng hi Rs 3,26,460 lai a ni der tawh.

CADS convener R. Lalngheta chuan YMA in ruihhlo d hi a tumsa a ni lo tiin a sawi.

“Kan tumsa lova, kum puanah pawh kan nei lo. Mahse, mipui pressure a nasat em avangin rawt leh a ni” a ti a.

“Nu leh pa in min gnen nasa a, ruihhlo a tam si a, kal kawnga in pe mawlh mawlh hmuh tur thlengin an awm. |halai tam takin an tuar leh dawn tih kan hria a, Mizoram hian hmangaihtu a nei a lawm tiin kan pen chhuak a ni” tiin Zozam Weekly a hrilh.

YMA in ruihhlo a do atanga kar khat hnuah nuai 3 chuang man hu damdawi an man hman. CADS pawhin lawmthu sawina an dawng hnem nghal hle a, SRS hun laia zu an khawih loh vang pawh a ni mahna!

R. Lalngheta chuan, “Phone leh hmai chhan ngeiah pawh lawmthu min hrilh mawlh mawlh tawk an awm, chu chuan min ti phur thin” a ti a.

Tun tuma zu an hmer tellohna chhan chu, “A zau lutuk a, zu chu Excise ho kutah kan dahta deuh a ni. Kan huam zau lutuk chuan kan zawh loh nghawng kawl kan in bah thei a, kan ti ta lo” a ti.

CADS hian ruihhlo hi an do mai mai lo, rim takin hma an la a, mumal takin an do a ni.

R. Lalngheta chuan, “A tirah survey kan nei lawk thlap a, heng kan hmalakna te hi thlalak nen kan nei vek a, a tul a nih chuan kan la tichhuak ang chu. Damdawi an in pe lai te nen thlap thlalak kan nei a ni. Kan thawkrm khawp mai” tiin a sawi.

“Survey kan han nei meuh chu kan rin phak bakin a lo hluar a, do loh chi a ni lo reng reng” a ti a. “Kan survey naa kan thil hmuh leh hriat ang te a thla kan lak te hi kan do hlawhtling chho a nih chuan mipui mimir en theih tur awhin kan la tarlang duh mahna” a ti bawk.

CADS convener chuan Home Minister chunga an lawm thu sawiin, “Home Minister in full support min pe a, Police plain coat a inthuam te nen thlenga kan mamawh dawn thu kan hrilh pawhin min pek a tiam thei zel a. A chungah kan lawm tak meuh meuh a ni” a ti.

SRS aiin CADS chu an kal fimkhur thu sawiin, “SRS-ah khn ti fuh tawk loh tam tak kan nei tih kan pha lova, tunah chuan experience kan nei tha tawh bawk a, kan kal fimkhur khawp mai. Member te pawh kan inzirtir nasa a, dan hnuaia kal tur kan nih thu teruihhlo zar kan hmuh leh mante pawh Excise te hrilhin a hmunah ngei kan man tir thin a ni, a ti bawk.

Damdawi hman sual hi Aizawl mai a ni lo thingtlang lamah pawh a nasa hle bawk.

Khawzawl leh Champhai-ah pawh a hluar hle niin Zozam Weekly chuan thu dawng bawk.

CADS hian damdawi tihrem an tum a, chu chu an thil tum ber a ni. Chumi atan chuan hma an la a, number 4 kan tih ang chi te hi rem duak nghe nghe.

Mahse, damdawi ti thin tam tak number 4 lei tur hmu zo lo te chuan India damdawi pangngai khuh damdawi leh damdawi dangah an tlan tan tih hriat a ni thung.

R. Lalngheta chuan, “Hei hi kan hria a, Aizawl khawpuia damdawi zuar fel tak tak awmnaah hian damdawi ruihtheih zuar lui tlat an awm tih pawh kan hria. Hei pawh hi hma kan la dawn tho” a ti.

“Drug inspector te nen pawh sawiho kan tum a, anni kaihhruaina hnuaiah hmalak kan tum a ni. Damdawi ti thin tam tak ten an pan mek tih kan hria a, a zuar tute pawh kan hria a, dan kalha thil tih kan duhloh avangin dan hnuaiah hma kan la ang. License cancel sak thlenga hmalak pawh kan tum” a ti bawk.

Aizawla number 4 zuar kan tih te hi 90% vel chu khawchhak Burma lam mi anni.

“Mizorama awm ngampa tawh Burma lam mi te hi a zurtu lian te anni tlangpui a, chutih rualin Aizawl mi hlun fa te pawh an awm tho” tiin R. Lalngheta chuan a sawi a.

“No. 4 ti reng tur chuan mi hausa tak nih a ngai a, chutiang a nih loh chuan a tih reng theih loh. Chuvangin, a ti thin nghet tak kan tihte hi chu a zuartu anni tel tlangpui. An zawrh pah loh chuan an neihin a tlin lo. “ a ti a.

“Tuna kan man chin ho chu a zuarah pawh a lian pawl an la awm lo. A zuar inkhai diata pathumna leh palina tih bawrvel chauh an la ni a. An chungah a zuar lian tak tak an awm tih pawh kan hria, chu chu kan chhui mek a, tan pawh a ngai khawp mai” a ti bawk.

No. 4 a hluar rual hian Bagha atangin damdawi chawkluh tho a ni. Chu chu Parvon leh proxyvon te a ni a, parvon hi a lar hle a, number 4 ai chuan lei a awlsam zawk a, a hluar chho tan hle.

A ti thar a piangin an thiam lova an inchui thin. Drug ti senior tawh te chuan an ei mai thin a, an inchiu duh meuh lo.

Aizawl tleirawl drug ti thar tam tak hian Parvon-ah bul an tan duh chawk niin Zozam Weekly chuan thu a dawng bawk a.

A hluar hluai hma kha chuan no. 4 man pawh a to lem lo, a hluar tak hnuah a man sangta em em thung.

Parvon leh khuh damdawi ang chi te hi rugular taka ei an awm a. Chu’ng ho chu drug ti senior tawh takte anni a. Damdawi dawr bik an nei a, chutiang zuar bik chu an awm bawk a, number 4 ti ve chuang lem lo a, chutiang damdawi ti reng chu an awm bawk.

CADS chuan chu’ng damdawi zuara hrlah thin te chu dim an tum lem lo. Khauh zawka an kal theihnan Sorkar thu neitute nen tan tlan an tum a ni.

Aizawl khawpuiah hian drug zuara ei zawng an awm a. Chu’ng mite chu man an har em em bawk niin R. Lalngheta chuan a sawi bawk a.

“Damdawi zuara eizawn nghet hi an awm a, chu’ng ho chu an fing khawp mai. Mahse, veng tin leh hmun tinah mi leh sa kan nei a, kan man chhuak tho tho ang” a ti.

Damdawi ti thin te pawh man an tum tho thu sawiin, “Kan inhremna pawh hi thlak ila Jail-a rei lo deuh tang tawh lovin rei tak an tan a tul a ni. Chumai bakah, zahthlak deuha insiam nise a thain kan ring a.” tia sawiin, “Sap rama an tih dan angin social work neih tir thin ila. Khawui lunlaia vantlang thil entirnan zun in ang chi te hi thenfai tir i la a tha viau turah kan ngai” a ti bawk.

YMA in ruihhlo a do hmasakin SRS din a ni a, hming hliauna tam tak a nei. Thamna lo la tawkte pawh an awm a, mahse, CADS-ah chuan fimkhur zawka an kal thu leh thamna lo la emaw an awm palh hlauh chuan chawlh tir nghal annih tur thu an sawi bawk.

CADS hian kalphung leh ruangam fel fai tak an nei a, ruihhlo zuar leh ti thin tan chuam pumpelh hleihtheih anni lovang.

“Rawngbawlna leh ram hmangaihna rilru pua hnathawk kan ni a, thil nuam ber pawh a ni lo a lawm. Mahse, Mizoram hian hmangaihtu a nei a ni” tiin R. Lalngheta chuan a sawi bawk a.

Aizawl mai a ni lo, Mizoram pum huapa damdawi tha lo tih bo chu an tum a ni.

“Tunah pawh ruihhlo zuar tam tak chu thingtlang lmah an tanchhia tih pawh kan hria, mahse, kan hmaih dawn chuang lo. Thingtlangah pawh damdawi avang tho hian an buai tih kan hria a, in zawn chhuah a huphurh awm lem lo. Aizawla kan tih tawh chuan thingtlang lam chuan an ti ve nghal mai dawn a, min gnai chang reng thin zawk a ni” a ti.

“Mipui mimir hian damdawi hi an haw em mai a, hei hian min ti chak niin kan hria. Mipui tena kan huat tlan hi chu do hneh a harsa lovang. Hmun tam tak atangin min hrilh duh tlat a, chuvang chuan an chep lo thei lo” a ti bawk.

“Kohhran pawh hian min support viau niin kan hria a, ruihhlo kan do hmasaka kan hlawhtlinna pawh Kohhran ho tawngtaina a ni a, zam lo leh hlau lova kan kal ngam thinna chhan pawh Pathian duh zawng a nih vang a ni” a ti.

R. Lalngheta chuan a chang chuan chhungkaw pa ber ni chunga ruihhlo do chu buaithlak chang a awm thu sawiin, “Nupui fanau te bula awm tha hman lovin kan phusa a, zanin chaw i rawn ei dawn em te kan in ti mai chauh thin a, a hahtlak chang chu a tam khawp mai. Mahse, Mizoram hian hmangaihtu a nei a, a chhiat kan phallo. Tin, rawngbawlnaah kan ngai a, chumi tello chuan peih chi pawh a ni lo” a ti bawk.

An mi mante chu an chunga an thinrim ngai loh thu sawiin, “Ruihhlo do hmasaah pawh khan a ni tho, kan duhsa a ni tih an hria a, min haw zui ngai lo. Min ngaina zawk a, pawsa te hi min dil ang chawt chawt a. Duhsak taka thiltih chuan min haw let lo khawp mai” a ti bawk.

R. Lalngheta chuan an thawhhona a that thu leh Central YMA OB te pawh an fakawm a tih thu sawiin, “Hman zanah pawh dar 12 pel rakin Aizawl khawpui kan fang a, Kan OB te an tel vek a, an fakawm khawp mai” a ti.

Harsatna erawh an nei a, chu chu sum chungchangah a ni thung.

“Hun leh tha a hek si a, sum hi kan harsatna ber a ni. Pakhat kan han man a, tute nge tia in zawh chawp hnuah a dang a kangkai zel a, rin aiin kal velnan sum sen a awl khawp mai” a ti a, “Tunah pawh kan member te motor kan hmang a, petrol pawh kan inthunsak chuang lo, mahni tlawmngaihna hlir a la ni rih e.” a ti.

CADS hian hna an thawk rim hle a, an hnathawh hi nghah peih ngai chi te a ni tlangpui a, hman hmawh rum ruma thawh theih loh chi a ni.

Hemi a nih avang hian tlai lamah Office-ah chaw an ei mai thin a.

“Chaw hi kan ei mai thin a, chawhmeh erawh sangha tin a ni mai a. Kan hnathawh hi chhuah ngai thut thut te a nih avang hian In ah pawh kan awm hman meuh lo chu a ni” tiin R. Lalngheta chuan a sawi.

Motor hman tur an nei lova, member temotor in an kal mai thin a, petrol thlengin member ten an intum chawp mai rih. Central YMA chuan budget a siam sak a, mahse, an hnathawh hian sum leh tha a heh em avangin a bik takin sum an mamawhna a sang em em thung.

Ram tan theih tawp an chhuah a. Hun leh tha a heh a ni. Pawisa an mamawh a, mi inpha thenkhatte erawh an bengvar thiam thung.

CADS te hi Home Minister chuan pawisa faiin a tanpui tawh bawk a, an hmalakna kawng engkimah full support a pek thu a hrilh bawk.

Related Posts :