Thian dun pahnih hi an zin dun a, an kalkawngah chuan thlaler pal tlang a ngai a. Khaw lum tak hnuaia hah taka an kaldun lai chuan an inhnial thinrim ta a, pakhat zawk chuan a thianpa chu a hmaiah a beng pawp mai a.
A thianpa kut tuartu zawk chuan ngawi rengin vaivutah chuan "Vawiin hian ka thian tha berin ka hmaiah min beng" tih hi a ziak a.
Inbe lo a an kal dun zel hnuah chuan dil awmna hi an thleng hlawl mai a, chu dilah chuan an inbual ta a. A thianpa kut tuar zawka bawk chu chirhdumah chuan a tang ta a, a pil dawn ta mai a. Pakhat zawk chuan harsa takin a chhanchhuak a. Dil kama lungah chuan "Vawiin hian ka thian tha berin ka nunna a chhanchhuak" tih hi fiah takin a ziak leh a.
A hmaia bengtu leh chirhdum atanga chhanchhuaktu chuan makti takin a thianpa chu, "Ka ben che khan vaivutah i ziak a, engati nge tunah hian lungah i ziah leh kher a?" tiin a zawt a. A thianpa chuan, "Miin min tihnat chuan vaivutah hian ziak thin ila, ngaihdamna thli a lo tleh anga chu thuziak chu a reh leh mai dawn a. Miin kan chunga thil tha an tih erawh chu lungah ziak thung ila, eng thli mahin a tireh ve thei dawn lo a ni," tiin a chhang ta a. n
(Having a Best Friend tih lehlin a ni - Lalthlamuana Ralte)
No comments:
Post a Comment