Nghilh loh Zawlkhawpui senmei chan ni

Gate-ah chuan puanzar dum an zar a, a chhungah pawh dawhsan-ah puanzar dum leh Mizo pawndum an zar. Chu'ng chu March ni 5, 1966-a India sorkarin jet fighter hmanga Zoram a beih vanga nunna chante sunna a ni.

Dawhsan hma lam, a kotlangah chuan lemziak 10 an tar. India-in Mizoram a bomb lai lem, mi hrang hrang ziak a ni.

Tunlai titi tui- Zoram Ni chu March ni 5-ah khan MZP huaihawtin CYMA Hall-ah hman a ni a, March ni 5, 1966-a Mizorama thil thleng hriatrengna hunah hian Zawlkhawpui senmei chan ni theihnghilh lotu kalkhawm an thahnem hle. A vanglai phei chuan thutna an inchan lo hial.

Kum 44 liam taa jet fighter hmanga Mizoram beih a nih avanga lungawi lohna lantirnan puanzar dum zar a nih bakah, khami tuma thite sun nan, MZP adviser C alhmachhuana kaihhruaiin kalkhawmte hi ngawi rengin minute khat an ding.

MZP president VL Krosshnehzova'n thu a sawi a, March ni 5, 1966-a thil thleng sawi nep tum an awm nia sawiin, "Sawi nep duhna thinlung pu, Mizo zingah an awm hi pawi kan ti," a ti a, "Thil hriat fuh tawk loh vang leh hnam rilru put tawk loh vang a ni," a ti. "Sawi mawi tum avanga kha thil thleng kha rapthlak ta lo a ni lo," a ti bawk.

"Kan chunga thil thleng kha India hian hre reng se kan duh," a ti a, he ni hman a nih chhan sawiin, kan tuarna hi hrerengin hnam thinlung pu ila, a ti a, "Mizo zawng zawng, inpumkhatna kawng zawh turin kan sawm a ni," a ti.

Hunserh hmangtu, Pastor Biakthansanga chuan: "Mizote tan theihnghilh theih a nih a rinawm loh," tiin kum 44 liam taa thil thleng chungchang a sawi.

March ni 5, 1966 hre phate'n thu an sawi a, kha tawrhna kha na an tih thu leh sawi nep chi a nih loh thu an sawi tlangpui. MNF sipai zinga jet fighter beihna tuar hmasa bertu Peter Rothangpuia, Bawngkawn-a cheng pawhin thu a sawi. Peter Rothangpuia hi zalenna sualtute zinga mi a ni a, zalenna sualtu dang pakhat, H Zamliana nen jet fighter hmanga beihah a tuar hmasaah an tang niin a sawi.

Khawvelthanga chuan, "Silaimu satliahah khatiang luih luihin khua a kang thei lo," tiin 'min bomb lo' titute a chhang.

R Lalrinpuii, Khawrihnim khawchhuak chuan Aizawl kang lai a hmuh ve thu sawiin, jet fighter-in Aizawl a beih lai khan Khawrihnim atangin an thlir a, a pi te chu an tap zawih zawih tih a sawi.

Jet fighter-in Aizawl a beih chungchang bakah Mizo Nationalism chungchang an tuipui hle. MCS officer hlui, F Hmingthanga chuan: "Kan politics-a sorkarna siam zingah hian nationalism ka beisei ang hi ka hmu lo a, ka nun a hlim lo a ni," a ti hial.

He huna resource person pakhat, R Zamawia, MNF-in zalenna an puan laia defence minister chuan March ni 5, 1966 hma lama Zoram dinhmun a sawi a, "Zofate hi hmakhawsang atanga siamtu Pathianin hnama a din, thlahtu bulbal leh ram luan chin fel tak nei, mahnia rorelna leh inawpna nei thin, hnam nunphung leh sakhaw mumal tak nei kan ni," a ti.

British leh India-in min awp hnu-ah MNF chuan kawng hrang hrangin, hnam dang awpna hnuai atanga chhuah theihna tur kawng an dap a, kawng sang a awm loh hnu-ah loh theih lohna avangin zalenna sual nan ralthuam an lek ta niin a sawi a, "India sipaite chet tak tak hmaa chet khalh mai loh chu thlan tur dang a vang ta a ni. Lo sepui ruah tuar ringawt chu kan huam lo a ni ber mai. Zep thu pawh a cheng lo e. Kan duh thu erawh zawng a ni bik miah lo," a ti.

Resource person dang, March ni 5, 1966 hnua Zoram dinhmun sawitu Dr JV Hluna chuan March ni 1, 1966-ah MNF te'n zalenna an puang tih sawiin, "Buaina tuifawnin zan khat thilah Zoram pum a chim ta thut a... India sorkar mitah chuan Mizo zawng zawng chu 'hel' vek hmuhin min hmu a, ral pui beih takin min bei a ni," a ti a, "1966 March ni 5-a India jet fighter-in Pakistan ral ni mai awm anga mi a rawn beih hnu khan... India sipai te'n min han rap hrual ta a," a ti bawk.

"Tuna India ram state ralmuang ber kan ni te hi a va lawmawm tak em. Hmasawnna kawngah chak takin ke i pen ang u. Tumah hlemhle leh khaw lo zawnga awm lovin, Chanchin |ha Dan te zawm ila. Sual, suala thungrul lovin; hauhna, hauhnaa thungrul hek lovin kum tin March ni 5, Zoram Ni hi hnam inpumkhatna ni-ah hmang ila. Zoram leh hnam tana martar-te zahna entir thin ila, Pathian hnenah inhlantharna neiin A malsawmna dil ni-ah urhsun takin i hmang thin ang u," a ti.

Kalkhawm zingah patling an tam ber a, thalai an thahnem ang reng viau bawk. Hmeichhia erawh kut chang thliaka chhiar tham chauh an ni.

Eptu party lian pathum thalai president an tel thap; Lalvenhima Hmar (MPYC), PC Vanlalruata (ZNP |halai) leh Lalchhandama Ralte (MNYF) te.

Zoram Ni hmanna hi MZP vice president S Lalrinawma'n a kaihruai a, general secretary H Lalremsiama'n report a pe a, Zoramchhani leh Mimi Renthlei te an zai. MZP treasurer Lalhmachhuana'n ram pawn atanga tawrhpuina thu thawn a chhiar.

Khasi Students' Union, Boro Women Justice Forum, All Tribal Students' Union of Manipur, Twpra Students Federation, Garo Students' Union leh All Manipur Students' Union te'n March ni 5, 1966-a thil thleng vanga tawrhpuina an rawn thawn a ni.

NESO vice chairman Lalmuanpuia Punte-in a tlang a kawm a, "India thil sual tih thup pui duh Mizo zingah an lo awm nual mai!" a ti.

Zoram Ni pual hian MZP chuan 'India-in Mizoram a bomb' tih thupui hmangin zirlaite tan lem inziahsiak an huaihawt a, mahse, March ni 4-ah Mizoram sorkar chuan sorkar sikul naupangte tel a khap.

School education directorate lamin Aizawl khawpui chhung sikul tinah, primary school atanga higher secondary school thlengin, he lem inziahsiakah sorkar sikul naupangte tel khap a nih thu order an tichhuak a ni.

Lem inziahsiak hi a hmuna ziah tura tih a ni lo a, naupangte'n an duh ang tawka an ziah hnu-ah thehluh tur a ni. March ni 2 thlenga thehluh theih a ni a, chuvangin, khatia sorkarin order a chhuah khan lem inziahsiak kha an zo fel tawh. March ni 5, Zoram Ni hmannaah lawmman sem tur tia ruahman a ni. Mahse, sorkar-in a rawn khap tak avang khan MZP lam hian lawmman pawh an sem ta lo a ni.

"India-in ngaihdam a dil tur a ni"
Zoram Ni hmannaah NESO (North East Students Organisation) chairman Dr Samujal Battacharya chuan March ni 5, 1966-a Mizorama thil thleng chungchangah India chu ngaihdam dil tura a phut thu a sawi a, Mizoram chungah mai ni lovin hmarchhak chungah ngaihdam an dil tur a ni, a ti.

"Khawi ramah mah tualchhung buainaah bomb an thlak lo, Mizoram chuan chutiang chu a tuar. A ram pum tan Black Day a ni," a ti a, "India hrilh rawh u," tiin, Zoram Ni sawiseltu an awm chu pawi a tih thu a sawi.

August ni 12, 2005 Financial Express issue-ah Operation Blue Star chungchanga Parliament-a India ram prime minister Manmohan Singh-a thusawi an tarlan dan sawiin, "I have no hesitation in apologising not only to the Sikh community but the whole nation because what took place in 1984 is the negation of the concept of nationhood and what’s enshrined in our Constitution, " a ti tiin a sawi a, "March ni 5, 1966-a thil thleng chungchanga an ngaihdan hi eng nge? NESO-in a hre duh a ni," a ti.

"India ram hruaitute hian Kolkata thleng bak an ngaihtuah lo," tia sawiin, hmarchhakah India sipaite vanga tawrhna nasa tak pawh India-in a hre lo niin a sawi.

"Assam, Manipur, Meghalaya, Assam, hmarchhak state hrang hrangin mahni ram venhim kan tum apiangin kan tuar ziah," a ti a, counter insurgency hming chhalin India-in hmarchhak mipuite tawrhna a thlen thin, a ti.

"Kan chunga an rilru put dan kan hria...Kan history hi kan hre tur a ni," tia sawiin, "Hnam kan nihna hi kan lantir tur a ni," a ti a, "Chu hnam nihna chu thang leh tharteah pawh kan tuh zel tur a ni," a ti bawk.

Mizoram sorkarin Zoram Ni painting competition-ah sorkar sikul naupang tel a phal loh tih a hriatin mak a tih a sawi a, "Kan chunga thil thleng hi thangtharte'n an hre tur a ni," a ti. 'Jet fighter hmanga beihna lemziak hmanga tarlan chu eng nge a natna?' tiin kalkhawmte a zawt a ni.

Hmarchhak mipuite tanrual tul a tih thu sawiin, "Pakhat kan ni tih hi India hian hre rawh se," a ti.

Related Posts :