Zarzokima thih chhan chu...

November ni 13, 2009-ah a thi a, a thihna chungchang chu vawiin thlengin police te'n an la chhui zel. A kaptute hriat a ni tawh tiin a sawi theih a, an kahhlum chhan pawh hriat a ni tawh tiin a sawi theih ang.

Bungthuam naupang, Zarzokima hi vawkchaw la tura ram lam pana a kal lai, mi tu tih hriat lohte'n an lo kaphlum a, a kaphlumtute chuan lehkha hnutchhiahin, Bru Re-Unification Union niin an inchhal a nih kha.

Mizoram Police te chuan he thihna chungchang hi ngawrh takin an chhui zui a, thu zawhfiah atan mi 4 an kawl mek, Vanlalfela, Chusarai, Lalthazuala leh R Laldawngliana te.

Vanlalfela, Chusarai leh Lalthazuala te hi hel pawla tel thin an ni a, R Laldawngliana erawh hel pawla tel ngai lo, Mizoram Police te pawhina an la man ngaih loh a ni. Midang an man belh leh thuai a rinawm.

Thudawn danin, Zarzokima thattute khan an tum reng vanga Zarzokima kha that ta an ni lo, an sahimna an ngaihtuah vanga that an ni.

Tripura refugee camp-a awm, Tuikuk-ho Mizorama an letna turin November ni 16-ah thawh tan tur tih a ni a, Tuikuk hruaitu thenkhat, Mizorama let duh lote'n chu ruahmanna tihtlawlh dan tur ngaihtuahin Mizoramah mi thenkhat an rawn tir a, chu'ng mite chuan Zarzokima an that ta nia hriat a ni.

"November ni 16-ah Tuikuk-ho Mizorama an let theihna tura hmalak tan tur tih a ni a, chumi tihthuanawp nan chuan Tuikuk an rawn kal a, Zarzokima an that ta niin a lang," thudawn chuan a ti.

Amaherawhchu, mihring that tura rawn kal chu an ni lo, an tum aia nain an che ta niin thudawn chuan a sawi.

"Mizoram sorkar tibuai tura rawn kal an ni a, an intirh dan chuan, sorkar bungrua tichhe turin an inhrilh. Sorkar office building emaw, lei (bridge) emaw, MST bus emaw, sikul emaw, a rem rem tichhe turin an inhrilh a, sorkar thil leh bungrua a rem ta lo a nih chuan sumo service emaw pawh tibuai turin an inhrilh niin a lang," thudawn chuan a ti.

Tripura atangin Mizoram an pan ta a, Mizoram an luh tirh, Bungthuam khaw ram an thlen laiin hmeichhe pahnih leh mipa pakhat an hmu a, hmeichhe pahnihte chuan anmahni chu an hmu ve lo a, mipa chuan a hmu ta si. Chutia mipain a hmuh takah chuan, khawtlang hruaitute hnenah emaw police te hnenah emaw a 'report' ang a, chuti a nih chuan an thil tih tur a tlawlh phah thei. Tin, an tan a him lo bawk. Chutiang rilru chu puin vawkchaw la tura kal, Zarzokima kha an kaphlum ta mai tih chu tun thlenga a lan dan a ni.

Hemi tum hian mi 10 vel an thawkchhuak nia hriat a ni a, thudawn pakhat chuan 10 an tling kher lo mai thei tiin a sawi.

Mizoram sorkar tibuai tura an thawkchhuak hi, Tripura refugee camp-a an hruaitu thenkhat ruahman a ni a, cheng nuai 3 hlawh tura tiamin mi an tir nia hriat a ni.

November ni 13-ah Zarzokima an that a, Tuikuk-ho an let theih nana ruahmanna pawh chu thawh a ni ta lo. Amaherawhchu, an pawisa intiam chungchangah a tirtute leh a thawkchhuakate thu a inhmu ta lo thung niin thudawn chuan a sawi.

"Khatia Zarzokima an thah hnu khan anmahni tirtute chu pawisa chu an dil ta ngei a, anni'n an lo pe leh duh si lo. An intithinrim viau a, 'kan report dawn che u' te pawh an inti hial a ni awm e," thudawn chuan a ti.

Chutih lai chuan police te'n Vanlalfela leh Chasurai te an man ta a, a bail dan tur ngaihtuaha a buai laiin Lalthazuala hi police te'n an man ve leh niin a lang. Tuikuk hruaitu thenkhat hnenah Lalthazuala hian an thiante 'bail' nan cheng sing nga a dil niin thudawn chuan a sawi.

Lalthazuala hi Zarzokima ruang bula lehkha hnutchhiah ziaktu niin a lang a, kap tura thu petu pawh niin a lang. Vanlalfela leh Chasurai te hi Mizoram sorkar duh loh zawng ti tura thawkchhuak zinga tel nia ngaih an ni a, R Laldawngliana hi a roreltute zinga pakhat, he thila a meizang hlaptu ber nia hriat a ni.

Zarzokima kaptu, a silai hmetpuaktu-a tak hi la man loh zingah a tel nia hriat a ni a, police te chuan amah an hria niin thudawn chuan a sawi. An veh/thlithlai reng niin thudawn chuan a sawi nghe nghe.

Zarzokima thihna chungchanga police kawl mek mi palite hi inbe phak lo turin hmun hranah dah an ni a, police te hnena an thusawiah pawh inmil lo leh inkalh a awm lo nia hriat a ni.

Related Posts :