Naupang huaisen pahnih

Huaisen lawmman dawngtu Zonunsanga chuan, "Hetianga chawimawina ka dawng hi ka lawm a, mak pawh ka tia, sawi tur vak pawh ka hre lo," a ti.

Champhai naupang, kum 14-mi a ni a, a thianpa nunna chhan tuma a beihna a ropui em avangin January ni 21-ah khan India ram prime minister-in National Bravery Award a hlan a ni.

Nikum August ni 30-ah khan Zonunsanga te thianho hi swiming pool-ah an kal a, hlim taka tui an chen laiin tui cheng thiam ve lo, a sir vela ding, an thian pakhat chu pool-ah chuan a lo tla a, Zonunsanga hian a thianpa chu tui atangin a lachhuak a ni.

A liluh a, mahse, a hmu lo a, a liluh leh a, vawi 4 a liluhnaah pawh a la hmu lo. A bei a dawng lek lek tawh. A liluh leh a, a vawi nganaah a thianpa chu hmuin, nikhaw hre lova a lo let reng chu a hnukchhuak ta a ni.

"Ka beidawng hman deuh tho a, mahse, ka hmuh hma chu zawn zel ka tum hrim hrim," tiin a hun laia a rilru a sawi a, "A mangan thlak duh khawp mai a, mahse, kan mangang hman lo," a ti bawk.

A thianpa hi tui atanga lachhuakin, an thiam ang angin an bawihsawm a, khuaah luhpuiin, damdawi ina dah a nih hnu, a zanah a thi ta a ni.

Midangte nunna chhan tura theihtawp chhuahtu Zonunsanga chuan naupang huaisen lawmman a dawng ta.

January ni 21-ah khan Indian Council for Child Welfare chuan naupangte huaisente hnenah chawimawina- National Bravery Award an hlan a, Mizo naupang pahnih- Zonunsanga leh Lalrammawia te an tel.

Lalrammawia hi Chawngtlai khua, kum 15-mi a ni a, ani pawh hi a thianpa a chhan avanga chawimawina dawng a ni.

An khuaah an thian pakhat chu khuaiin an bawm a, a mangang chu motor dahna in-ah a tlanlut a, khuai chuan an bawr hneh em avangin puitling pawhin tih ngaihna tak an hre tawh lo. Lalrammawia chuan khawnvartui-ah buara a chiah a, khuai-ina an bawm khah luk, a thianpa chu a pan ta a ni.

A buara ken hmang chuan khuai chu a bei ta a, a thianpa chu a chhanchhuak ta.

National Bravery Award dawngtu naupang 21 zingah he'ng Mizo naupang pahnih hi an tel a, pawisa fai leh certificate an dawn bakah an lehkha zir chhung chu India sorkarin an zirna senso a tumsak ang. Kum 18 an tlin hma chu India ram chhungah a thlawnin rel an chuang thei bawk ang. Company leh mi thahnemngaite hnen atangin thilpek an dawng hnem hle bawk.

February ni 1-ah Zonunsanga leh Lalrammawia te hian Aizawl an thleng a, ni 22-ah larsap hmuin, ani hian an chawimawina dawn chu a lo lawmsak a ni.

Larsap hian he'ng naupang pahnihte hi fuihin, sipai ni tur te pawhin a lo fuih a, tin, Zonunmawia leh Lalrammawia te hian sipai nih an lum tum ve reng reng bawk.

Related Posts :