Remna Leh Muanna

Hmanlai hian Lal fing tak pakhat hi a awm a, chu lal chuan a ram chhunga lemziak thiamte a ko khawm a, 'Remna leh muanna' lem a ziahtir hlawm a. A ziak ang ber hnenah lawmman tha tawk tak pek a tiam nghe nghe a.

An zawh hnu chuan Lal chuan lemziak hrang hrang chu uluk takin a endik hlawm a, remna leh muanna lantir thei tur ber ni a a ngaih pahnih chu a dah hrang a, ngun takin a han en dun leh vang vang a.

Lemziak pakhat chu dil mawi tak, reh ruih mai lem hi a ni a, tlang sang pui puiin a hual vel a. A chung lama van dumpawl ruih mai karah chuan chhum var pan te te a awm bawk a. Han en reng reng pawhin rilru a tihahdam hliah hliah mai a ni. Chu lemziak entu apiang mai chuan duhthusamin remna leh muanna a lantir niin an ngai zel nghe nghe a ni.

Lemziak pakhat zawkah pawh chu tlang lem tho a ni a. Mahse, pakhat zawk ang lo takin chhengchhe zet leh kawlh vul mai hi a ni thung. Chumai a ni lo a, tlang chungah chuan ruahsur leh tek tla lai lem hi fiah takin a awm a. A hnuai lam tlang bul thut inkarah chuan tuikhawhthla so phuan buah buah lem a la awm cheu bawk a.

Mahse, Lalpa chuan chu lemziak chu ngun takin a han enchiang a, tuikhawhthla hnunglam lung khi chat kara hnimbuk hi a zu hmu a. Chu hnimbukah chuan sava pakhat hian bu a chhep a. Tuikhawhthla so phul bulh bulh kiang lawka a bu chhehah chuan chu sava chu thlamuang takin a bawk hle hle mai a... remna leh muanna tak tak a entir hliah hliah niin a ngai ta tlat mai a.

Tichuan, Lalpa chuan lemziak hnuhnung zawk chu lawmman dawng turin a thlang ta a. A thlan chhan chu ti hian a sawifiah a, "Remna leh muanna chu harsatna leh buaina awm lohna hmun hi a ni ringawt lo a, bengchheng leh thil ninawm tel reng reng lohna hmun lah a ni hek lo. Remna leh muanna tak tak chu chu'ng thil chi hrang hrangten min hual vel kara rilru thlamuang taka kan awmna hi a ni zawk. Chu ngei chu remna leh muanna awmzia tak tak chu a ni" tiin.

(Peace tih lehlin a ni, a ziaktu ber hriat loh - Lalthlamuana Ralte)