NLUP SEM HUN

¢ HC Vanlalruata

Tuna sorkarna chelh mektu Congress party hi inthlan hmaa NLUP behchhana cheng nuai khat sem mipui hnena tiamtu kha an ni a. An tlinna chhan ber pawh a ni awm e. MNF kum 10 chhung kan hrawn hnu-a khati khawpa chakna an chan theihna chhan kha chhan dang chu awm ve bawk mahse, an NLUP zawrh kha mipuiin an duh hle tih chu thingtlanga zing tam apiangin an hria ang.

Inthlan hma khan an party hruaitu thenkhat chuan NLUP hmangin cheng nuai khat kha an sorkar tuk atanga sem mai turin an insawi a. Chutiang taka sawilo-te pawhin hma taka sem chu an tiam hrim hrim a, an insawi ang chuan an sem hma thei talo chu a nih hi.

Congress sorkar hi kum 2008 December ni 2-a Assembly inthlanna neih, December ni 8-a vote chhiar-a result puan a nih hnu-a Assembly member 40 zinga 32 thlan tlin an nih hnu-a December 11, 2008-a sorkarna siam ta kha an ni a. Kum 2008 kumah chuan thla chanve awrh chauh hun an neih avangin NLUP an sem hman lo kha a hriatthiam theih a. Kum 2009 kum bul chhova an sem hmanlo erawh kha chu a dem duh tan chuan a dem theih tawh viau awm e.

A chhan chu sorkar laipui-ah an party pui kaihhruai an sorkar a. Inthlan campaign laia khulam hotute intiamna zawng zawng te kha ngaihtuah chuan kum 2009 thlai chi thlak hma khan chet hman a ni a, chu chu sorkar thar, ‘change’ sawiritu sorkar laka mipui beisei pawh a ni. Ram changkangah chuan eptu party hian sorkar veleh-a hna thawk mai thei turin ‘Shadow Cabinet’ an nei sa vek a. Sorkarna an chan veleh ihe lovin mipui laka an thutiam chu an tipuitling mai thin.

Thlai chi thlak hma leh horticulture lam khawih hun chhunga an semlo rau rau a nih chuan kum 2009 tawplama pek kha chu a fuh tawh lova, an pelo kha thil awm tak pawh a ni. Krismas dawn hnaih khan NLUP sum sem ni ta sela chuan thil ho mai mai-ah an hmang ral mai hlawm ang tih a hlauhawm a ni.

Tunah hian kum 2010 kan lo chuangkai ta a. Mizo in thlawhhma kan lak dan ngaihtuah chuan vuaicha a hun tawhlo hle. Hlawhtlin tum NLUP dawngtu tur tan pawh inbuatsaih tan a hun hle tawh a ni. Hun chep lutuka sem a nih chuan a thlai chi te, a vawk note te leh thlai tiak chungchangah te hnawhchih takin thil kan ti leh ang a, duh angin a kal fel leh lovang tih a hlauhawm a ni.

NLUP chungchanga kan sorkar a fimkhur a, dante hial a siam hi a lawmawm a. Chutih rual chuan a fimkhur dan leh fimkhur chhan hi an party mi chauh invulh tum luat vang a nih chuan a pawi khawp ang. Party invulh hi tunhma atanga kan chin than, political party tinin an chakna tur emaw an tih, a takah chuan ni silo a ni a. Chuvangin a diklo leh fello siamthat a pawimawh rualin a dik leh diklo tehfung kha beneficiary thlan tawhte rorellai party mi an nih leh nih loh a inghat a nih chuan a dik hauh lovang.

A pawimawh chu huan nghet siam tumte tan hun khawtlailo thei ang bera hmanhmawha tihpuitlin ni tawh se tih hi a ni a. Hnawhchih lutuka innawr ngailo turin tun atangin chak taka tha thawh a tul tawh a, sorkar hi a vuaicha thiang tawhlo. Hun kan bawhpelh leh vaih chuan a chhan chu engpawh sawi ila mipui an beidawng tawh ngawt ang le.