Cyber Crime Leh Mizo Society

¢ Lalthlamuana

1. THUHMAHRUAI
Cyber tih tawngkam hi Cybernetics tih a\anga lak a ni a, ICT thiltihtheihna khawvel sawina a ni. ICT hian electronics media zawng zawng - Radio, Television, Audio/Video, Internet leh Mobile Phone bakah Computer, Software, Electronics leh Telecommunication hmanrua hrang hrang a huam tel vek a ni. Heng Electronics Media hman khaw lohna avanga dan bawhchhiatna sual reng reng hi “Cyber Crime” an tih chu a ni.

Khawvel changkannain a ken tel Cyber Crime hian khawvel nunphung a tibuai nasa em em a, Mizoram hmun kilkhawr berah pawh hmun a rawn chang ta a ni. Tun hmaa misualte’n silai nena bank an rawk \hin kha tunah chuan Computer hmanga bank rawk a lo ni ta; lehkha thawn hmanga invauna (extortion) leh mi hruaibo (kidnapping) te pawh E-Mail leh Mobile Phone hmanga tih a lo ni ta bawk a; Nawhchizawrhna leh Call Girl te pawh Internet leh Mobile phone kaltlanga tih a lo ni leh ta zel a; khawvel hmun hrang hranga Terrorist-te tan inzawmkhawmna hmanraw \ha tak a lo ni ta.

Cyber crime thlen chhan tam ber hi pawisa duh vang te, phuba lak duh vang te, hlimhlawp bawl duh vang te leh intihtheihnana hman hrim hrim duh vangte a ni tlangpui. Mizote’n Cyber Crime kan tih chhan tlangpui chu hlimhlawp bawl nan leh huat zawngte tih mualpho nan a ni. Chanchinbu leh Local Channel-ah te mahni hming thupa mi chanchin sawi leh ziah vak vak kan ching te leh Mizo nula/tlangval saruak thlalak kan buaipui em em te hi kan hnam mawl vang nge, kan sual vang hrim hrim?.

Mizote zingah hian Cyber crime tih avanga case nei thei tur tam tak kan awm, chung zingah chuan Sorkar, Kohhran, NGOs te pawh kan bang chuang lo. Hei vang hi em ni sual kan palzam? Sual palzamna hian sual a ti ngampa a, chu chuan society-ah nasa takin nghawng a nei \hin. Cyber Crime avanga kan mualpho lohna tur leh kan tawrh lohna turin Cyber Crime chung chang hi i zirchiang ang u.

2. PORNOGRAPHY (SARUAK THLALAK)
Tunlaiin, Computer, Internet leh Mobile Phone-ah kan Mizo nula/tlangval sex video hmang lai leh saruak thlalak hmuh tur tam tak a awm ta mai hian kan society a barakhaih hle a ni. Hetianga mipui hmuh theih tura saruak thlalak thehdarhtute hi dan bawhchhetu an nih avangin hrem theih an ni. Mi tuin emaw pindan chhungah, tuma hmuh lohvin, saruakin thlala ta sela, chu a thlalak avang chuan dan a bawhchhia tihna a ni lo. Mipui hmuh theiha pho chhuah a nih chauhvin dan a bawhchhia tihna a ni. A chhan chu saruak thlalak hian mipui rilru a chhe lama a hruaikawi theih vang leh midangte nun a tihbuai theih vang a ni.

Mizo nula saruak thlalak tam zawk hi an duh vang renga thehdarh an nih a rinawm loh. Mituten emaw an thlalak, an nawhreh tawh hnu, an lo lak chhuah sak avanga darh ta niin a lang.

Hetianga mi saruak thlalak phochhuaktu leh thehdarhtute hi dan hmanga hrem theih an ni. A hremna dan chu IT Act, 2000 (Section 67) hnuaiah a ni a, A vawi khat thiam loh chantirna-ah kum 5 lung in tan bakah pawisa Rs. 1,00,000.00 thleng chawitir theih a ni a, vawi hnih thiam loh chantir a nih chuan kum 10 thleng lungin tan bakah pawisa Rs. 2,00,000.00 thleng chawitir theih a ni.

Nula/Tlangval Tana Thurawn:

(1) Mobile Phone leh Digital Camera hmanga thlalakte hi nawhreh (Delete/Format) tawh ni mah se, a thiam tan chuan Computer hmanga lakchhuah leh theih a ni tih hria ang che.

(2) Mobile Phone leh Computer hmanga nula/tlangval saruak thlalak inpekchhawn (transfer) hi dan bawhchhiatna sual a ni tih hre bawk ang che.

3. COPYRIGHT LEH PIRACY
Mi tu pawh, a neitu phalna la lova Lehkhabu, Video Film, Audio Cassette leh Computer Software te lo Copy chhawn leh sumdawn nana lo hman hi COPYRIGHT dan kalh a ni a, “PIRACY” an ti. Heng hi dan bawhchhiatna sual lian tham tak a ni.

Hetiang tihching hi Mizoram chhungah tam tak kan awm, chungho chu – (1) Kawng sira CD/DVD zuartu te leh an zawrhlai Movies te; (2) Video Library neitute leh an movies kawl laite; (3) Computer zuartute leh an Computer hralh ruala Pirated Software an thun tel ziah te; (4) Mizoram chhunga Computer Institute neitute leh an Software hman lai te; (5) Sorkar Office-a Software an hman tam zawk te; (6) Printing Press neitu te leh an Software hman te; (7) Computer neitu te leh an Software hman zawng zawng te, (8) Mobile Phone chhunga hla dah zawng zawngtu te, (9) Cable TV Operator te leh an Movies chhuah zawng zawng te, (10) English/Hindi/Korean Film te Mizo tawnga lettu leh a zuartu zawng zawng te, etc., sawi tur a tam mai sawi sen a ni lo ang.

Heng dan bawhchhetute hi dan anga hrem theih an ni a, a hremna dan chu Copyright Act 1957 (Section 51/63B) hnuaiah a ni a, ni 7 (days) atanga kum 3 (years) thleng lungin tan theih a nih bakah pawisa Rs. 50,000 atanga Rs. 2,00,000 thleng chawi theih a ni. Mahse, sumdawn nana hmang lova personal copy atana hmangtu chu lungin tang lovin pawisa Rs 50,000 thleng chawitir theih a ni.

Mipui Hnena Thurawn:
(1) Kan zaithiamte leh lemchang thiam ten, Audio/Video Cassette siam turin hun-leh-tha, sum-leh-pai tam tak an seng a, chu chu awlsam taka, nang leh keiin kan lo copy chhawn avangin an hlawk tur angin an hlawk loh phah a, Music leh Film lamah kan ram a than theih loh phah a ni tih hria ang che.

(2) I Computer leh Mobile Phone chhunga I hla dah te kha dan lo anga i neih anih avangin dan anga hrem theih I ni tih hria ang che.

4. INTERNET/ E-MAIL/ MOBILE PHONE HMAN KHAWLOHNA
Computer, Internet, e-Mail leh Mobile phone hmanga intihmualpho leh intih-hmingchhiatna hi “Cyber Defamation” an ti a, hei hi Cyber Crime chikhat a ni. Mizoram chhunga Chanchinbu leh Cable TV kal tlanga fakselna, ka vei zawng leh mipui aw programme-ah te hian SMS leh E-Mail hmangin kan huat zawng sawi chhiat nan leh tihmualpho nan kan hmang nasa hle. Hetiang platform lo siam saktute leh titute hi dan bawhchhetute an ni a, dan anga hrem theih an ni.

A tlangpuiin hetiang tih chingte hian E-Mail account lem siam chawpin an duh duh thu an ziak \hin. Tin, SMS hmanga thawntute pawhin SIM Card Pre-Paid tih nunsa, midang hminga Registered in, an duh duh thu an thawn bawk \hin. A thawntute zawnchhuah theih an nih loh chuan, a chhuahtu Chanchinbu leh Cable TV Local Channel neituten hremna hi an tuar thei a ni. A hremna dan chu IPC (Section 499) hnuaiah a ni a, A hremna chu cheng nuai hnih (Rs 2. lakhs) chawi theih anih bakah lungin tan theih a ni.

Heng bakah hian Computer, Internet, e-Mail leh Mobile phone hmanga mi vau leh tih thlabar hi “Cyber Stalking” an ti. Mi tu emaw, a hnathawhna hmuna a awm lai emaw, ama chenna ina a awm lai emaw, khawi hmun pawh ni se a tihlauthawng zawng leh tithlabar zawnga phone leh thuziak hmanga vaute hi dan bawhchhiatna sual a ni. Heng dan bawhchhetute hi hrem theih an ni a, a hremna dan chu IPC (Section 503) hnuaiah a ni a, a hremna chu lungin kum 2 atanga kum 7 thleng tan tir leh pawisa tam tham tak chawitir theih an ni.

Chanchinbu leh Cable TV Local Channel neitute hnena thurawn:
(1) Chanchinbu leh Cable TV Local Channel neitute’n hei hi i hria ang u – kan programme- Fakselna, Ka veizawng leh Mipui Aw-ahte hian “mawh kan phur lo ang emaw editor ngaihdan a ni kher lo” kan tih avangin dan hmaah min hum zo lo tih kan hriat a \ha ang. Chuvangin Cyber Defamation Case kan awrh hmain i fimkhur ang u.

5. MOBILE PHONE LEH SIM CARD
Mobile Phone connection hi ID Card leh Thlalak tel lo chuan pek chhuah theih a ni lova. Mahse Reseller thenkhat ten mi voter’s ID leh thlalak hmangin SIM Card tihnunsa an zuar thin. Hetianga SIM Card tih nunsa zuartu te leh mahni hming nilo SIM Card hmangtu zawng zawng te hi dan bawhchhetute an ni a, hrem theih an ni.

Hetiang tih kan chin avang hian miin kan hriat miah lovin, kan hmingin sual rawng an bawl thei a ni. Chuvangin engtik ni-ah emaw chuan tuemaw pawisawi miah lo khan hremna nasa taka tuar thei dawn a ni. Entirnan – Misual pakhat-in SIM Card tihnunsa leiin mi vau nan emaw bomb kam nan emaw lo hmang ta se, thil tisualtu hi man tumin chhui ni ta se, a tawpa an man tur chu SIM Card hming neitu kha a ni.

Tin, kan SIM Card hmanlai hi clone theih a ni a, clone anih chuan kan number hmangin midangin sual rawng an bawl thei a, SMS leh Call pawh an duh duhin an siam thei a ni. Chuvangin kan Mobile Phone te hi SIM card telin Unauthorized Service Centre-ah siamtir tura pek mai mai tur a ni lo.

Hetianga SIM Card tihnunsa zawrh leh lei leh cloning hi dan bawhchhiatna sual lian tak a ni a, dan bawhchhetute hi hrem theih an ni. A hremna dan chu IPC (Section 507) leh IT Act (Section 66) hnuaiah a ni a, a hremna chu lungin kum 2 atanga kum 7 thleng tan tir leh pawisa Rs. 2 lakh thleng chawi tir theih a ni.

Thurawn:
(1) SIM Card tihnunsa zuartute zawng zawngin hei hi i hre \heuh ang u – SIM Card tihnunsa kan zawrh avangin mipawisawiloten hremna an tawrh theih avangin SIM Card tihnunsa hi I zuar lo ngam ang u.

(2) Mahni thlalak leh voter’s ID te SIM Card booked nana midangte hman tir loh tur a ni. Tin, Mahni hming lova SIM Card neih hi dan bawhchhiatna sual anih avangin mahni hming ngeia SIM Card neih \heuh i tum ang u.

6. E-MAIL LEH SMS HMANGA INBUMNA
E-Mail leh SMS hmanga inbumna hi tunlai khawvelah a hluar hle, chu’ng zingah chuan “Nigerian Scams” hi a lar berte zinga mi a ni. Chu’ng an thu thawn tlangpui chu “Pawisa tam tak i dawng a, i bank account min hrilh la, kan rawn deposit dawn nia….. Africa ramah mi hausa tak a boral a, thurochhiah a neihloh avangin a pawisa hi i account-ah rawn dah a ni anga, 50% i ei dawn nia….. Lottery i man a, a processing fee $ 4,000 hi he account number-ah rawn deposit rawh….” tih vel an thawn \hin a, mi tam takin a tak tak emaw tiin an sawi ang angin an ti \hin a, a tawpah bumna thang a ni tih an hriat hnuin a lo tlai tawh \hin. Mizoram chhungah hetiang inbumna avanga tuar chhungkua an awm nual tawh a, chung zingah chuan in-leh-lo chan ta sawi tur an awm nual bawk. Heng in bumna lakah hian i fimkhur ang u.

Tin, E-Mail account password vawn him that tawk loh avangin kan password te hi midangin min lo hriatruksak thei a, chutiang avang chuan kan e-Mail account hmangin sual rawng an bawl thei a ni. Kumin May ni 20, 2009 khan Reverend pakhat E-Mail chu, mi tu tih hriat loh ten a e-mail password (hotmail) chu lo thlak sakin, a e-mail account hmangin Reverend thian te hnenah London a zin thu te, a wallet a tih bo thu te leh hotel bill pawh pek tur a neih loh thute a thawn a, pawisa US Dollar $ 2,500 chu Western Union kal tlanga puk tir turin a lo dil tih hriat chhuah a ni. Hetiang hian misual tuten emaw kan E-Mail hmingin sual rawngbawl nan an hmang thei a ni tih kan hriat a, kan fimkhur a tul tawh hle.

Tunlaiin e-Mail leh SMS hmangin thu pawimawh tak tak kan in thawn thin a, hemi chung changah hian fimkhurna tur tam tak kan nei – Kan thawhpui pakhat pawh a fanu-in E-Mail rawn thawnin pawisa a rawn chah a, a fanu E-Mail rawn thawnah chuan Bank Account Number kim chang tarlan a ni. Mahse, he e-mail hi misual (Hacker) in lo tidanglamin a ma bank account number-in a lo thlaksak a, tichuan, kan thawhpui chuan a fanu bank account emaw tiin pawisa a dahlut (deposite) a, mahse misualpa (Hacker) bank account-ah a lo lut daih si a, hriatchhuah a nih meuh chuan a lo tlai zo tawh a ni. Heng inbumna hi tunlai khawvelah a hluar hle a ni tih hria la, fimkhur hle ang che.

Hetianga E-mail neitu hming dik tak hmang si a, midangin thil tha lo tih nan an hman thin hi “E-Mail Spoofing” an ti a. Hei hi dan bawhchhiatna sual a ni a, hrem theih an ni. A hremna dan chu IPC (Section 463) hnuaiah a ni a, a hremna chu lungin kum 2 thleng tan tir bakah pawisa chawitir theih an ni.

7. INTERNET BANKING LEH ATM
Tunlai khawvel changkanna in a ken tel pawimawh tak pakhat chu Internet Banking hi a ni. Internet Banking hmangin awlsam takin Bank Account kan monitor thei a, ramdang thil pawh kan lei thei a, phaia school kal naupangte hnenah pawisa awlsam takin kan thawn thei bawk. Amaherawhchu, kan fimkhur loh chuan kan hriat miahlovin mituten emaw kan Bank Account atangin pawisa an la chhuak thei a, chuvangin Internet kaltlanga Bank Account Monitor thin tan te, Sumdawnna ti thintu tan te leh thil lei thintu tan te fimkhur a ngai hle.

Tunlaiin ATM khawl hmangin awlsam takin pawisa kan lachhuak thei tawh a, hei hian kan nun a tih awlsam phah hle. Amaherawhchu, ATM machine te hi kan hriatchian a pawimawh hle. Hmun thenkhatah chuan ATM Card Skimmer te leh Hidden Camera-te an lo fit ru thin a, chung hmang chuan kan ATM card ang chiah an siam chhuak a, PIN number an lo hreru bawk a. Tichuan ATM machine a tangin kan Bank Account te chu rawk a lo nit a thin a ni.

Phai rama zirlaite tan zirlai zir zawh hnu a, Mizoram lama lo haw chhoh dawnin Passbook leh ATM card te midang hnenah hlan chhawn emaw hralh emaw tih loh tur a ni. Hetiang tih avanga harsatna tawk mek mi thenkhat Mizoram-ah kan awm, hei hi a pawi hle a ni. Phai ramah khuan mi thenkhatin zirlai haw turte hnenah Bank Account lei tur an zawng a, an hmuh chuan bank account kaihhnawih zawng zawng, Pass Book, ATM Card (Pin No nen) an la thin a. Heng ho hian Internet kaltlangin mi Bank Account atangin pawisa an ru chhuaka, chu an pawisa ruk chhuah chu an Bank Account lei thar (zirlaite atang a an lei) ah khan an dahlut (transfer) thin a, tichuan ATM card hmangin chu pawisa chu an va lachhuak leh thin. Hetiang ang thil ah hian Mizo zirlai tam tak an awk tawh a, phaiah te lehkha zira an kalin an account te an hralh ta mai thin a, hei vang hian harsatna an tawk mek a ni. Tunah pawh Mizo tam tak hetiang avang hian an buai mek a ni.

Mipui leh Phaia zirlaite tan a thurawn
(1) ATM Machine hman dawnin Hidden Camera in vuah a awm em tih leh ATM Card Skimmer vuah a ni em tih uluk taka en thlithla hmasak thin tur a ni.

(2) Phaia lehkha zirlaiten Pass Book leh ATM Card te midang hnenah hralh emaw hlan chhawn emaw tih loh tur a ni.

8. CABLE TV NETWORK LEH LOCAL CHANNEL
Mizoramah kum 1990s chho vel atang khan Cable TV Network kan nei tana, tunah phei chuan Local Channel neiin mizo programme leh film tha tak tak chhuah thin a ni. Amaherawhchu heng kan film pek chhuah chung changah hian kan fimkhur a ngai hle. Kan fimkhur tawk loh avangin thangthar naupang, zirlai ten nun dan thalo an zir chhuah phah thei. Chuvangin, Mizoram chhunga Cable TV Operator ten hei hi i hre theuh ang u - Cable Television Networks Acts, 1995 leh Cinematograph Act, 1952 danin a phut angin eng film pawh mipui hmuha chhuah a nih hmain Central Board of Film Certification (CBFC) an pal tlang ngei ngei tur a ni a, a chhuah dan tur pawh table-a mi ang hian category hrang hrang thliar a ni:



Cable TV Operator te hian heng Category thliar hrang miah lo hian, film chi hrang hrang, an duh hun hunah an chhuah thin a, heng hi dan bawhchhiatna sual a ni.

Tin, Local channel-a fakselna, kaveizawng leh mipuiaw programme a an vei zawng thu rawn thawntu tam berte hian mi dangte siam that duhna aiin tihmualpho duhna rilru atanga lo chhuak niin a lang. Heng avang hian Mizo mipuite min indo tir mai ang tih hlauhawm thei tak a ni. Heng programme hi khawtlang inpumkhatna tichhetheitu leh inhmelmakna thlen tir theitu hmanrua anih avangin a tha lo hle a ni. mihring nun siam thatna aiin in huatna thlen tir theitu a nih avangin Local Channel pechhuaktute pawh fimkhur deuh se a that a rinawm.

9. CYBER CAFÉ LEH INTERNET
Tute pawhina Internet man chawia an hman theihna hmun “Cyber Café” hi khawvel hmun hrang hrangah a awm deuh vek awm e, Mizoram chhungah pawh hmun tam takah hmuh tur a awm. Cyber Café hmang hian kan thalai ten Internet leh e-Mail hmandan an zir thin.

Cyber Café te hi mipui vantlang hman theih tura siam a nih avangin khawvela Cyber Crime lo chhuahna hmunpui ber a ni. A tlangpuiin Cyber Café neitute hi an fimkhur lova, an Computer leh Internet hmangtute an chhinchhiah that tawk loh avangin thilsual titu dik tak manchhuah a harsat phah thin. Chuvangin Cyber Café neituten hremna an tawrh phah fo thin.

Tin, Mizoram chhunga Hotel thenkhatah, an mikhualten Internet an hman theihna turin, Wireless LAN hmangin Internet connection a free-in an pe thin. Hetianga mi hrang hrangin Internet an hman theihna hmunah reng reng hian fimkhur a ngai tak zet a ni. Kan fimkhur loh avangin kan thil tihsual ni lovah hremna kan hmachhawn thei a ni tih hi kan hriat a pawimawh hle.

Cyber Café neitute leh Hotel chhunga Internet Connection pe thinte tana thurawn:
(1) Cyber Café neitu zawng zawng ten hei hi i hria ang u – Mi tuten emaw thil sual tih nana kan Cyber Café-te an hman pawh a hremna kan pumpelh theihna turin Users Log Book vawn that leh Photo ID card nei lo te I hman tir lo ngam ang u. Tin, Photo ID Card pawh a photocopy I kawl sak ngei ngei tur a ni.

(2) Hotel neitute zawng zawng ten hei hi I hre bawk ang u – Mikhualte hman tura Internet connection a free a kan pekin Unanonymus Users hmanga Internet luh tir hi a fuh lo thei, mikhual thenkhatin Internet leh E-Mail hmangin thilsual lo ti se, chhuichhuah mai har tak a ni. Chuvangin Hotel neituten hremna kan hmachhawn hmain i fimkhur ang u.