Aizawl Enkawltu Tur Chu!

¢ Lallianchhunga

Mizoram University Mizoram khawpui enkawlna tur dan leh hrai siam chungchangah District Council hun lai atang tawh khan thuneituten hma an lo la nual tawh a. The Mizo District (Administration of Town Committee) Act, 1955 pawh UT a hlan kai kan nih khan hman tur a ruahman a ni a. Mahse, kan UT sorkar khan he dan hi hmang lo in, town committee aiawh turin District Commissioner kha a ruat daih mai a. He kan dan sawi hi District Council hun lai atang khan mumal taka hman ni se lang chuan Mizoram a khaw lian deuh deuh (town) ah Town Committee awmin, he committee hian an awmna khua theuh te kha mumal deuh zawkin a enkawl dawn a ni. Mahse, he dan hi District Commissioner hnuaia an han dah takah chuan ani lahin mawhphurhna tam tak a lo neih sa avangin khawng takin a kengkawh thei ta lo a ni ber mai. Hei vang hian Mizorama kan khawpuite chu enkawltu nei lo ang mai an lo ni ta a,Village Council lah anmahni khuate pawh enkawl thei turin thuneihna mumal pek an ni hek lo.

Hetiang hi a tir atanga kan kalphung a nih avangin a thei theiin nakin hnu dawn hauh loin vantlang ram la hekin in an sa a; kan kawngpuite lah chu sorkar tan pawh tih zauh leh zualna tur awm hauh loin mi malten an nek a; kawngpui bula in sa te lahin an mahni motor dahna tur tak ngial pawh an zuah duh lo bawk a; mi hausaho lahin a leilung ngheh leh ngheh loh chhut miah loin a chhawng sang thei ang berin in sak an tum zel tawh mai si a; mi mal in nei te pawhin an tui chhe paihna tur mumal tak an siam lo te, tuihawk luankawr mumal loh lutuk avanga kan kawngpuiten an tuarna zawng zawng te hi khawpui enkawltu tur, municipal sorkar kan neih loh vang a ni.

Mi thahnemngaite hmalakna leh India Danpui siamthat vawi 74-nain ti tura a tuk ve avangin kan State sorkar po’n khawpui inawpna tur ruangam dan duang turin kum 2002 khan Pu L.T.Zothankhuma chu OSD in a ruai a, ani hian kan hriat tlan theuh angin The Mizoram Municipalities Bill,2002 chu a rawn duang chhuak ta a. He bill hi kum 2007 khan MNF ministry in a pawm a, April 16, 2007-ah Governor-in a hming ziakin a pawmpui ta nghe nghe a ni.

Mahse, MNF Ministry khan inthlan a buatsaih hman ta lova, chutih rualin Mizoram sorkar-in Asian Development Bank (ADB) atanga loan a puk tur chungchangah ADB in consultant atana a rawih LEA Associates, South Asia Pvt. Ltd. in The Mizoram Municipalities Act, 2007 in India Danpuiin tihlawhtling tura a tih thil engemawzat chu ‘Gaps in Legislative Provisions and Proposed Actions-Mizoram’ tih a buatsaihah chiang takin a tarlang ta a; chuvangin, Aizawla Municipal Council din tuma Congress Ministry-in hma a lakna kawngah he Act siamthat hi hna hmasa berah a nei ta a ni. Review Committee on the Mizoram Municipalities in Mizoram, 2007 chu din a ni a; he Review Committee hian Mizorama a Municipality din theihna khuaah Tualchhung sorkar mumal tak a awm theihna atan ruahmanna a siam ta a, he ruahmanna zulzui hian Assembly hnuhnung berah khan The Mizoram Municipalities (First Amendment) Act, 2009 chu pawm a ni ta a ni.

He Dan siamthatna a thil langsar zualte chu : (i) Municipal Corporation tan mihring nuai nga chin, Municipal Council tan nuai khat leh sing nga leh Municipal Board tan mi singkhat chin bithliah fel a ni. A chunga kan tarlan mihring chenna khuate tan Village Council aia changtlung zawk municipality din tura hmalak theih a ni ang.. (ii) Hmeichhia-te tan seat awm zawng zawng hmun thum atanga hmun khat hauhsak tur a ni. Hei hi India sorkarin tunlaia a thil ngaih pawimawh berte zinga mi a ni nghe nghe. Panchayat lamah phei chuan za zela sawmnga tih a ni tawh zawk. (iii) Mizoram hi Scheduled Tribe (ST) te chen tamna a nih tho a vangin India Danpuiin min phut Scheduled Caste (SC) leh ST te tan seat hauhsak na tur a awm a. Tuna SC (2001 census-ah Mizoram pumah 272 an awm) awmzat atanga chhutin leh an pundan atanga chhutin Municipal Council dinna tur Aizawlah SC tan seat hauhsak a ngaih dawn chuanloh avangin ST (Mizo) te’n lungdam takin inthlan kan hmachhawn thei dawn tho a ni.

MUNICIPALITY CHU ENGE: Municipality awmzia chu khawpuite tana din “mahni a inrelbawl thei sorkar” (an institution of self-government) tihna a ni a.(Art. 243P-E).

Municipal dinna khawpui kha Assembly bial then ang hian then ve tur a ni a; chung bialte chu ward tih an ni a, heng ward atang hian mipuiin an aiawhtu tur, tuna MLA kan thlan dan ang hian an thlang ve leh dawn a ni. Inthlan zawhah chung mipuite’n an thlan tlin Councillor-te chu inhmukhawmin MLA kan thlan hnua sorkar an siam thin ang hian municipal sorkar an siam ve dawn a. Chairman te thlangin, ani hian a thawhpui theih tur awm mi te chu Vice-chairman atan leh Executive Council member atan a ruat leh ang.

Municipal sorkar a Councillor-te hi MLA te ang bawkin khawpui tana dan siamtu an ni dawn a. Chung an dan siamte chu kengkawh turin Chief Executive Officer hoin hnathawktu engemaw zat an awm leh bawk dawn a. Mahse, heng hnathawktute - CEOtelin - te hi Municipal Chairman thu hnuaia mi vek tur an ni thung. Hei vang hian CEO leh a hnuai a miten Councillor-te dan siam an kenkawh that leh that lohah chuan Chairman leh a thawhpuite huai leh huai lohah nasa takin a innghat thung dawn a ni.

MUNICIPAL SORKAR THUNEIHNATE: Municipal sorkar tihtur ber chu mumal taka khawpui enkawlna tur dan siam ti ila a tawi thei ber awm e. India Danpui siamthat vawi 74-na khan khawpuia municipal sorkar thuneihna leh a tih tur hrang hrang 18 (sawmpariat) lai a siam. Chung zingah chuan khawpui te tan a plan mumal tak siam te, tui sem dan mumal zawk nei tur a ruahmanna siam te, mipui vantlang hriselna tur atana khawpui chhung vawn thianghlim dan tur te leh Mimal In sak dan tur (building regulation) chenin thuneihna an nei a ni. Mipui tan leh mimal tan a tui sem te, bawlhhlawh paihna tur mumal tak siam te, vantlang zun in leh ek in siam te, kawtthler kal dan tur mumal tak a ruahman leh lei (over-bridge) siam leh enkawl te, kawngpui leh vantlang hmun tihen nana street light dah te, kawngpui hrula thing phun te, bazaar hmun siam leh enkawlte, rantalhna hmun enkawl te leh kangthelhna tur tui supply te hi Public Work hnuaiah he bill hian Municipal sorkar kuta awm turin a ruahman a. Tin, vantlang hriselna lam(public health and sanitation) lamah pawh municipal sorkar chu thuneihna sang tak a pe bawk . Khawpui enkawlna (Town Planning and Development leh administration) lamah pawh he dan hian municipal sorkar tihtur tam tak a ruahman bawk a. In (building) sak dan turte, mimalin vantlang ram an nek leh nek loh endik a an nek a nih chuan tihchhiatsak te, in sak hlauhawm (dangerous building) tihchhiat te, leh khawpui cheimawina lam thlengin municipal sorkar hian thuneihna a nei dawn a ni.

Central INC in sorkar-na a siam hnu lawk khan khawvela chanchinbu lar ber pawl Time chuan PM Manmohan Singh-a tih tur nia a ngaih thil pawimawh tak tak a tarlang a, chu chu sorkar aia mumal zawka India ram khawpuite enkawl a ni. Mizoram a sorkar-na chelh mektute pawh hian kum 1953 daih tawha dan siam hmanga kan khawpuite enkawl tum lo hian mipui tel ve theihna hmanga langtlang sorkar siamtheihna hmanrua Tualchhung Sawrkar tha tak din hi an tum ve tur a ni. Transparency kan tih te pawh hi mipui kaltlang loin a awm thei miah lo. Peoples’ participation leh transparency hi The Mizoram Municipalities Act, 2007 ah hian a awm sa a, chu chu Good Governance siamna tur tobul chu a ni.