Zofate inpui tur Zo Inpui

Hmun hrang hranga cheng Zofate inpui tur din tuma hmalakna a kal mek a, a hming atan Zo Inpui tih chu pawmfel a ni tawh.

Zo Inpui chu India, Burma leh Bangladesh-a thendarha awm Zo hnam hrang hrangte inthlunkhawmna a ni ang a, Zo hnam aiawha roreltu tur, thendarha awm Zofate hruaikhawm an nih leh theihna tur leh Zofate'n thuneihna sang ber an chan theih nana thawktu tur a ni.

ZORO (Zo Re-Unification Organisation) huaihawtin August ni 12-ah khan I&PR Auditorium-ah Zo Inpui chungchang hi heti lam tuipuite'n an sawiho a, Zo Inpui din tha an ti tlang a, a hming atan Zo Inpui an pawm bawk.

R Zamawia kaihhruai sawihona hunah hian ZORO general secretary K Hawlla Sailo chuan Zo Inpui chungchang a sawihawng a, mi hrang hrangin an ngaihdan an sawiho ta a ni. Thusawitute chuan Zo Inpui din hi tha an ti vek.

USA-a lehkha zir chhuak, H Thanglawra chuan sap thufing pakhat - 'Lean liberty is better than fat slavery' (Sal ni chunga thau kung ai chuan zalen taka cher a tha zawk) tih sawiin, putar a nih tawh avangin engmah ti thei lo mah se Zofate zalenna chuan a lung a la tihlen reng thu a sawi a, Lok Sabha MP hlui Dr H Lallungmuana chuan hemi chungchang hi sawi zawmin, "Zalenna nei lo, tu te thuhnuaiah emaw, tu te thi awrhtirin emaw kan awm chuan kan awhawm theiin ka ring lo," a ti.

"Bawih ni chunga thau ai chuan zalen taka cher a tha zawk," tia sawiin MP hlui chuan, "Mahni ram chhungah pawh thunei thei lo, passport leh VISA tel lova inhmu thei lova thendarh kan ni," a ti a, UNO-in 'indigenous peoples' (a ram neitu dik) te tana hma a lak mek avangin rei lo teah Zofate ram thar a pian a beisei thu a sawi a, chumi atan chuan Zo Inpui din ngei tha a tih thu a sawi bawk.

September ni 13, 2007-ah khan UN General Assembly chuan a ram neitu dik, thendarh leh awpbeha awmte chhan nan thupuan an siam a, chu chu 'UN Declaration on the Rights of Indigenous Peoples' tih a ni. ZORO chuan hemi chungchangah hian tum engemaw zat UNO-ah palai intirin Zofate dinhmun an thlen tawh a, UN Declaration chu Zofate'n an chhawr ve ngei theih nan tha an thawh a ni.

"He Declaration hian UNO hian tualchhuak hnamte hi kan hnam rohlu, ram leh leilung hausakna te hi keimahni kutah a neitu nihna min pe a, humhalh leh chhawr tangkai pawh keimahni kut a ni," tiin ZORO general secretary Lalmuanpuia Punte chuan kalkhawmte hmaah a sawi.

ZORO president R Thangmawia chuan UNO dawra hma an laknaah India, Burma leh Bangladesh tea cheng Zofate thuchhuak sawilan a tul thin thu a sawi a, chutianga Zofa zawng zawngte insuihkhawmna pawl/rorelna hmun a awm loh avang chuan a buaithlak thin tih a sawi a, chuvang chuan Zo Inpui din hi an rel ta tih a sawi bawk.

Zo Inpui din tura hma la turin kalkhawmte chuan ZORO an ruat a, a kalphung tur pawh a theih ang anga inrawnkhawma duan ni an rel bawk. Kalkhawm zingah thalai leh upa lam an inpawlh tha hle a, mi langsar tak tak an awm nawk bawk.

Zo Inpui chu hmun hrang hranga cheng Zofate tana roreltu tura ruahman a ni a, India, Burma leh Bangladesh-a cheng te leh India ram state hrang hranga chengte'n an aiawh an tir thin ang. Tuna a lan dan chuan, Zo Inpui-ah hian rorelna chhawng hnih a awm ang a, India parliament-ah Rajya Sabha leh Lok Sabha a awm ang hian lower house leh upper house a awm dawn a ni. Chu'ng rorelna chhawng hnihah chuan Zofa, hmun hrang hranga chengte leh chi peng hrang hrangte'n aiawh an tir dawn a ni. Amaherawhchu, hei hi ruahmanna mai a ni a, a chi dangin an kalpui mai thei bawk.

He'ng vel ngaihtuah tur hian ZORO chuan October ni 28-ah zau zawka sawihona hun huaihawt an tum a, India, Burma leh Bangladesh-a cheng Zofate chu a zau thei ang bera sawm an tum a ni. Mizoram chhunga tlawmngai pawl hrang hrangte leh political party hrang hrangte sawm an tum bawk a, heti lam tuipuitute pawh a mimala sawm an tum. Chutah chuan a kalphung tur leh a enkawl dan tur te an sawiho dawn a ni.

Dinfel a nih hunah chuan Zo hnahthlak hnam hrang hrangte aiawhin Zo Inpui chuan UNO a dawr ang a, Zofate dinhmun leh harsatna te thlenin, hmalakpui turin a bel ang. Zofate'n 'UN Declaration on the Rights of Indigenous Peoples' kan chhawr theih nan hma a la ang. Zo Inpui din tul tihna hi 'UN Declaration on the Rights of Indigenous Peoples' hrinchhuah a ni.

"Khawvela ram leh hnamte, UNO Thupuan dungzuia an insingsak tan mek dan en hian, keimahni leh kan ram leh leilung hausakna humhalh tura Zofate insuihkhawm leh hi thil hmanhmawh thlak tak ni tawhin kan hria a ni," tiin ZORO chuan August ni 18-ah khan thuchhuah an siam a, "UNO hian tualto hnamte tan dikna chanvo thar siamsakin, Thupuan hial a siam a, inawpbehna (colonialism) te chenin kum 2001 atanga 2010 chhung hian nuai reh vek tumna a nei hi lawmawm kan ti a (Basic Facts About the United Nations phek 320 – 2004 puiblication). Chuvangin kan dikna chanvote chu Zofate’n kan chan vek theih nan a rang thei ang bera insuihkhawm hi tih makmawhah kan ngai a ni," tiin Zo Inpui chu Zofate insuihkhawm theih nana hmalakna a nih thu an tarlang.

"Zofate kan insuihkhawm leh theih nan, ngaihdan hluite hnawla phum bovin, inhnuhhniam a tulna zawna inhnuhhniam hret hreh lo turin Zofate zawng zawng kan ngen a ni," an ti a, "Kan inlungrual theih phawt chuan, UNO-in mithiam a tirh thin (Rapporteur) pawh kum 2010 chhung ngeia kohchhuah theih kan inbeisei tlat a ni," an ti nghe nghe.

August ni 12-a Zo Inpui sawihoa kalkhawmte chuan tiang hian resolution an pass:

"Vawiin August ni 12, 2009 (Nilaini)-a ZORO huaihawta International Day of World Indigenous Peoples hmanga lo kalkhawmte hian kan hnam hmakhua zel tur ngaihtuahin UN Permanent Forum on Indigenous Issues duh dan angin UN Declaration on the Rights of Indigenous Peoples (UNDRIP) zaizuiin cultural based-a traditional institution neih ve tulin kan hria.

"He traditional institution hi a hmingah ZO INPUI vuah ni se kan ti a, he ZO INPUI hi mumal taka siam a nih theih nan Zofa hmun hrang hranga chengte inkohkhawma din fel thuai ni sela, he rawtna hi tih hlawhtlin thuai a nih theih nan ZORO General Headquarters-in mawh lo phur se kan ti," tiin.