Vaivut leh Lung

Vawi khat chu thian dun hi an zin a, thlaler an thlen chuan an chau hle.

Chutia tuihal dang chara an inzui hnek hnek lai chuan an thu a inhmu lo a, an inhnial ta chiam mai.

Pakhat zawk chu a insum hman lo ta pek; a thianpa hmaiah chuan a beng ta sawk mai a nih chu.

A thianpa chuan engtin mah a ti let lo. Ngawi rengin a dawh a, a thianpa chu a en hou mai.

Mahse, a kun hniam a, thlaler vaivutah chuan a kutin thil a thai a; "VAWIIN HIAN KHAWVELA KA THIAN THA BERIN KA HMAIAH MIN BENG" tih hi.

An kal leh ta. An chau tawh hle. Nakinah chuan lui pakhat an thleng hlawl mai. An lawm ngang mai a, hmai phih pawh duhtawk lovin chu luiah chuan an inchiah ta a ni.

Pakhat zawk, a thianpain a hmaia a bensak kha a chesual ta tlat. Tuiah chuan a tla a, mangang takin a invai ta chawn chawn mai.

A thianpa, a hmaia lo beng tawhtu chuan chutia a thianpa mangang chu a enliam mai mai thei lo. Thih huamin a thianpa chhan tum chuan a bei a, an han invai deuh barh barh hnuah chuan an inchhan thei ta hlauh mai a ni.

Vaukamah an chhuak a, an thawmhnaw te an ha fel tihah chuan tuia tla zawk khan an piaha lungpui pakhat hi a pan a, engemaw a va ziak leh ta.

Lungpuia thil ziah chu vaivuta ziah ang ngawt a ni lo, a bei fe mai.

A ziak zo ta; "VAWIIN HIAN KHAWVELA KA THIAN THA BERIN KA TUITLA MIN CHHANCHHUAK," tih hi.

A thianpa chuan a ngaihna a hre lo hle a, a awmzia a zawt ta tawp mai.

"Ka ben che khan vaivutah khan ka ben che thu kha i ziak a, tunah lungpuiah i ziak ta thung hi eng nge a awmzia?"

A thianpa chuan a thuziak en vang vang pah chuan a chhang ta a.

"Miin min tihnat reng rengin vaivutah kan chhinchhiah thin tur a ni. Ngaihdamna thli a lo tleh ang a, chutiang chu a tireh daih ang. Miin kan chunga thil tha an tih chang erawhin lungpuiah ngei kan chhinchhiah tur a ni. Chutiang chu thli pawhin a nuai reh ve thei lo."

('Sand and Stone' tih lehlin a ni. A ziaktu hriat a ni lo.)