HAIR SHAMPOO

¢ Debbie Chawngthu

Shampoo hian sam a ti hrisel a, fai taka kan vawn theih bakah put leh mahni duh ang style-a kan siam theih vangin mi tam zawkin sam nalh tak neih theih nan shampoo man to tak tak pawh huai takin an lei ngam thin. Shampoo ah hian sam tihfaina chi khat telh a ni a, rim chi hrang hrang te hi chu a siamtu ten an hralh theih nana an pawlh belh mai a ni. Mahni sam awmdan azirin thlan thiam a ngaia, sam mawm tan siam sam ro neiin a hman chuan sam a tha thei lova, chutiang bawkin sam ro tan chuan sam ro tana siam chauh hman thin tur a ni. Sam suk hi uluk tur a ni a, shampoo hmana pawng tleuh mai lovin fai taka tleuh tur a ni a, tui herhhawnah ngei sam tleuh hi a tha ber a, sam a rik rat rat thlenga tleuh thin tur a ni.

Conditioner hman hi sam chhe tan chuan a tul hle a. Tunlai shampoo te hi chu conditioner nena inpawlh sa an ni deuh vek tawh a, hei vang hian shampoo hman zin pawh a pawi nep a, sam ro lutuk tur leh sam hmawr kak tur a veng a ni. Conditioner hman chuan sam a nem a, a pheng ve lova, sam a nung bawk a ni. Thenkhat chuan sam suk zin lutuk hian sam a titla duh an ti a, hei hi chu a dik vek lem lo. Sam hi chu tla tawk a awm reng a, to thar a awm reng bawk. Suka nuai hian a tlak hun tur aia hmaah a tla mai thin a, engmah hlauhthawn tur a awm lo. Sam tla pangngai aia tla tam anih erawh chuan mahniah engemaw dik lohna a awm tihna a ni a, mi thiamte rawn vat a pawimawh hle thung.

Sam suk zin hian sam a chhe duh an ti thin a, hei hi chu mahni sam awmdan azir a ni. Thenkhat sam chu a mawm a, nitin suk a tul laiin thenkhat chu a ro a, ni thum ni li dana suk pawhin a pawi loh nachen a awm thin. A suk zin thuah hi chuan mahni sam awmdan azir leh hnathawh leh awman a zir a ni thei. A chhiat hlauh vanga suk loh ngawt te hi a tha lova, a tenawmin a rimchhe mai mai zawk a ni. Sam tha tur chuan sam leh lulei a fai a ngai a, a fai chuan enkawl a nuam bawk. Sam su zing tan chuan shampoo vawikhat hnawih a tawk mai a, su khat tan erawh chuan vawihnih tal hnawih nawn a pawi lem lo.

Shampoo hman tur hi lei hmaa engang sam tana siam nge anih en hmasak a tha a. Chutilo chu hman loh tur hman avangin samin a chhiat phah ang tih a hlauhawm a ni. Lulei mawm chu an sam a mawm a, suk hnu reiloteah a mawm lehin a nung sar thei lo thin. Lulei ro lutuk emaw mawm lutuk lo chu an sam nihnih nithum pawh su lo mahse a lang faiin a nung sar reng tho a, mahse hetiang sam nei tan pawh hian thlahdah miah lova enkawl tur a ni.

Sam bleach, dye leh tihkir zin hian sam a tichhe thei a, chuvangin shampoo ringawt nilo, conditioner hman tel ngei a tha. Hair spray hmang thin tan chuan shampoo chak chi hman a tha a, mahse a tlangpuiin sam su zing tan chuan a chak lo chi hman a tha zawk. Shampoo i sam ngeih loh zawng chuan su zo chiah mahla, a nalh thei lo anga, a suk zawha pheng lo leh nem taka i sam a awm chuan i shampoo hman kha i mil tihna a ni.

Luphut hi vun natna chikhat a ni a. Thenkhat chu a thak duh em em a, lu vun hiah pilh te pawh a awm thei. A pilhah hian luphut hrik leh natna hrik dangte a lut thei a, chu chuan sam tla kawlh a thlen thei a, tla kawlh kherlo pawhin sam a chhe thei hle a ni. Luphut hi enkawl dam/reh theih a ni a, fai taka sam leh lulei dah reng a pawimawh hmasa a, sam kan sukna tur shampoo chu luphut nei tana siam ni thei se. Chu bakah regular takin a tlem berah vawithum tal kartin oil massage pekin a reh thei a ni. Ei leh in te, nundan phung diklo thlak te pawh a ngai hial thei a, thlai leh chaw tharlam ei te leh tui in tam te hi luphut tihreh dawn chuan pawimawh tak tak te an ni.

Henna hi luphut nei tan chuan a tha hle a, mahse henna lei dawnin a that leh that loh en ngun fo tur anih mai bakah mil loh te a awm thei a, fimkhur hle ang che. Henna hian sam a ti thang a, a ti hrisel a, a ti nemin a ti tle bawk. Thla khat danah henna hman hi a pawi lo.

HINTS
• Eitur dahlum i duh si a, dah lumna tur a nei remchang mai lo anih chuan dekchi lian deuh belte pahnih pathum dah theihna chhuang la, a chhungah tui inches 2 vela sangin dah la, meisa lo takah chhuang rawh. A chhungah chuan chawhmeh i dahlum duh chu dah la, chhin ang che. Hetiang hian reitak a dahlum theih a, gas pawh a hek nep thei.

• I cooker a phui tha lo anih chuan hawng la, a gasket kha tlemin pawt fan la, vuah lehnghal la, a tha mai ang. Gasket tlo taka i hman duh chuan cooker i hman zawh velah gasket khat tuiah sil ziah la, i rin aiin a tlo ang.

• Purun sen kheh tur a tam chuan mit a tih thip theih avangin a huphurhawm duh hle. Hetianga mittui a tlak loh nan i kheh hma darkar khat vel fridge-ah dah la, mittui ti tla lovin i kheh thei ang.

• Sai dah tha duh anih chuan i duh angin han chan la, ice-tray ah dahin i duh hunah i duh ang takin i siam thei ang.

• Brass lampang i inchhung cheimawi nana i hmang nasa anih chuan 'brasso' hmangin i nawt tle thei ang. Mahse, 'brasso' lei mai tur i hmu lo anih chuan apple kawr hmangin nawt tle ang che. Tin, ser hi chi-ah chiahin chumi hmang chuan nawt la, a tle sawt bawk ang.