Football tana inpe RC Khuma

¢ Hmingsanga

Mizoram football tournament neih mumal ber leh upa ber pawl Independence Day Celebration Football Tournament 2009-ah rinkai lo RC FC chu I Division-a an season khat awmnaah champion ni thei nghal khawpin an chetha tlat mai. Hei hi Mizoram football chanchin-ah thil chhinchhiahtlak a ni ngei ang.

Independence Day Celebration Football Tournament-ah hian I Division-a inhlangkai hlim club, champion ni nghal thei hi an la awm ngai lo. RC FC chuan I Division-a rei tei lo awm tawhte khumin final-a an khingpui, I Division-a season hmasaa kai thar ve tho SSA FC chu 2-1-a hnehin champion an ni ta a ni.

RC FC Leitan bihchianna
He club hi Mizoram club hlun leh upa pawl, kum 1977 daih tawha din, chawl lova kal zel thei club tlo berte zinga pakhat a ni. A danglamna chu veng chhung sporting club emaw pawlho enkawl emaw a ni lo a, mimal thahnemngai, VIP Tailors neitu RC Khuma leh a nupui Thiangi te'n anmahni sum leh pai leh tha leh zung senga an din leh enkawl chhoh ngar ngar a ni. An club dinna'n hian cheng nuai tel fe an sen tawh thu Pu RC Khuma chuan a sawi.

A tir takah chuan RC FC Leitan hi football club mai a ni lo a, sporting club niin, football chauh ni lo infiamna chi dang te pawh hma tel an ni. Football bakah boxing, badminton, table tennis leh hockey thlengin an kalpui vek a; Mizoramin mipa boxer a neihte zinga thlengsang ber Zoramthanga pawh kha an club member hlun, an hnuai atanga seilian a ni. Durtlang Leitan boxer duhawm, sub-junior category-a Mizoram tana national gold medal la hmasa ber Lalchawimawia pawh kha he club member bawk hi a ni.

Infiamna dang dangah pawh he club atanga chhuakte hian tunhma leh tun hun thlenga Mizoram sorkar hnuaia team tha - MAP, Power Deptt., PHE leh PWD team-ah hna an lo hmu nual tawh a, tunah chuan football lamah hian an insawrbing ta a, hlawhtlinna sang tak changin first division team an ni pha ta hial a, an football player-te zing atangin sipaia lut leh hna nghet dang hmu tawh panga lai an awm tawh nghe nghe.

Infiamna dang an kalpui tak loh chungchang sawiin RC Khuma chuan, "Infiamna discipline hrang hranga kan player tha engemawzatin tunah chuan eizawnna hna nghet an neih tak nual hlawm avangin tunah chuan football lama insawrbing hi kan thutlukna a ni ta rih a, mite tan malsawmna kan ni ve thei kha lawmawm kan ti. Mizorama team tha ber ni turin theihtawp chhuah chhunzawmin kan tih theih zawng zawng kan ti ang," a ti.

RC KHUMA KAWMNA

Independence Cup ah champion in ni ta a...
Kan champion tih ka hriat khan thinlung tak takin ka lawm a. Pathian hnathawh keimahni kaltlanga rawn inpuangchhuak ni hian ka hria a. Kan chakna leh theihna a ni lo tih kan player-te en khan ka hria a. Pathian hnathawh lo langchhuak leh kan tawngtaina chhanna niin ka hria a, ka lawm tak zet a ni.

Football club tan hian sum leh pai tha leh zung tam tak in seng a, hei hi channaah in ngai em?
Keini chuan channaah kan ngai lo reng reng. Sum leh pai tam tak chu kan seng ngei alawm. III Div, II Div, I Div thlenga kan kai theihna tur atan hian sum leh pai chu kan seng ve nual mai. Mahse, heng sum leh pai ka sente hi keini chuan missionary hnaah kan ngai a. Kan player thenkhatte hi chu sawi a mawi lo mai thei nachungin, camp chhuak hlim te te, inkhel lo se kawng dik lo lam zawh tur te pawh an ni mai thei a. Hengho nun chhanchhuahna atana sum leh pai kei nin kan lo seng ve te hi chu channaah kan ngai thei lo.

Missionary rilru pu chunga ka din te pawh a ni ve a. Kan insenna zawng zawng hi Lalpa tana kan insenna veah kan ngai a ni.

Mi hausa tak tak an tam a, club an din ve chuang si lo a?
Sawi tak ang khan keini chuan heng thil hi missionary rilru pu chunga kan tih a ni a. Midangte pawhin hetiang zawng hian ngai se chuan an ti thei lutuk ang. Keini aia nei an tam ang ka ring.

RC Khuma hi football tui ve hrim hrim nge Sports tui ?
Sports hrim hrim hi ka tui phak chiah lo mai thei a, mahse, football chu ka tui ve thin khawp mai. Kan tlangval laiin Shillong-ah kan khel ve nasa a. Veng khat aiawh leh club khat aiawh tih ang velah khan goal keeper ka ni ve thin a, a nuam ka ti ve thin khawp mai. Sports-ah rau rau chuan football bakah badminton , table tennis te pawh ka khel ve thin bawk a. Mahse, football ka tui ang em chuan ka tui phak lo deuhvin ka hria a. Amaherawhchu, sports ka tui dan chu kan khelh ve phak ang tawk kha nuam ti takin ka khel ve a, ka tui phak te pawh niin ka hria.

Football ni lo game dangah pawh in hming hian club a ding niin kan lo hria a?
Ni e, aw, kan phak tawk a tlem a, mahse, Mizo thalaite sports lamah kan promote ve theihna a nih beiseiin football club bakah hman deuh khan boxing club te pawh kan din ve a. Kan Boxing club atang hian Lalchawimawia te leh Zoramthanga te hian mite hmelhriat an hlawh chho ve a. Zoramthanga te phei chu khawvel huap inelnaah bronze medal a dawng ve ta hial a nih kha. Kan chhuangin kan lawmpui tak zet a. Chawimawia leh midangte pawh Mizoram aiawhin national championship-ah an khel ve bawk a. Kan chhuang khawp mai. Badminton club te pawh kan din a, Pahnianga te leh tuna sports department-a badminton coach ni ta |anpuia te pawh hi kan club-ah khan an khel ve hman.

Football club hi engtika din nge?
Football club hi Mizoramah chuan mimala din hmasa ber kan ni mai thei a ni, kum 1977 vel khan kan lo din ve tawh a. Kan club secretary hmasa ber chu tuna excise department commissioner ni ta Labiakmawia hi a ni nghe nghe asin.

Eng rilru puin nge football club chu in din ?
Kum 1975/1976 bawr velah khan football club awm kha chu department club deuh vek an ni a, chungho zinga khel ve phak chiah lo player tha tak tak kha an tam a, hengho tana inkhelh ve theihna remchang siamsak kha tul riauva hriatna kan nei a. Veng hrang hranga a thiam leh tha nia kan hriatte lawrkhawmin department club te el phak ngei tumin kan din ve ta rawih mai a ni..

Tun tumah hian veng mipuite tawiawmna in dawng tha hlein kan hria a...
Leitan Veng mipuite tawiawmna kan dawng tha hle a. Keini chhung te hi chu heti zawng hi kan ni mai a, veng mipuite'n min tawiawm tha lo se chu hetiang dinhmunah hian kan din phak pawh kan ring mang lo hial a ni. A neitu rilru an pu a, duhsakna nen tanpui kan ngaihna apiangah min tanpui a. A club hming tumtu te chu ni mah ila Leitan Veng mipui te ta a ni zawk mah mai thei a ni.

Sports chauh nilo zai lamahte pawh in inhmang niin kan hria a.
Zaithiam phei chu ka ni lo a, zai chu ka tui khawp mai. Kum 1958 khan Zampui tlangdunga zirlaihote nen group kan din a, AIR Shillong-ah te pawh hla te pawh kan khung ve, zai hi chu nuam ka la ti reng mai.

Zaithiamte pawh in pui nasa hle a ni lo'm ni?
Ni e, zaithiamho hi an fel hlawm a, kan theih tawk tawk chuan tanpui ngai nia kan hriatte chu kan tanpui ve thin a. Eng tham mah tihsak phei chu kan nei lo a. Kan tih theih a tlem viau chung hian tanpui ngai tanpui ngai ngawih ngawih nia kan hriatte tanpui chu a hlimawm riau asin.

Tun tuma in club inkhel kha vawi khat tal i en ve em ?
A en lam hi chu ka ti vak lo. Ka hnaah hian ka buai tawk em a, a hmuna ka en ve chuan ka tang dawn lutuk a, chuvang chuan dawr lo nghah mai hi tha zawkin ka hria a. Ka en ve ngai lo. Kan nu hi ka aiawhin a thawkchhuak ve zauh zauh a, ka ai a awh zo khawp mai.