CM ÂN HLA!

¢ HC Vanlalruata

Tun tum Independence Day lawmnaa Chief Minister Pu Lal Thanhawla’n sorkar function pawimawh, hetiang Independence Day anga sorkar hnathawk an kal tlem lutuk tha a tih loh thu leh ‘indiscipline’ chiang tak a nih thu a sawi chhuah kha a sawi chhante khan zah nachang an hria ang em aw? Zah nachang hre tan chuan zah ngawih ngawihna tur a ni. Sorkar hnathawkte hian National Day kan tih mai Independence Day leh Republic Day te ang hi sorkar chawlh (public holiday) pangngai emaw an ti tawh mai niin a lang a. Awmawlna hunah emaw fehna ni-ah emaw an hmang ta mai mai hlawm a, a fello ngawt mai.

Sorkar office chawlh hi India ram hian kan ngah em em a. Sapho phei chuan hmusit takin, “A Nation on a holiday” min tih phah a. India ramah rau rau pawh Mizoram hi chawlh ngah ber kan la ni mai thei. Krismas leh Kumthar vuakvet laite hian law and order harsatna lian tham a thleng ang tih hlauhawm tak a ni a, sorkar neilo ang chiahin kan chawl rei lua a ni. MHIP Day thlengin chawlhah kan puang tawh a, chawlh ngah tak kan ni. Chutih laiin India ram pum huapa hun pawimawh, sorkar office leh zirna inte khara kan lawm thin ‘national days’ te hi chu ‘a sorkar lai tak’ a ni a. Sorkar hnathawkte phei chuan an ngai pawimawh ngei ngei tur a ni a. Sawmna lehkha dawng chinte phei chuan rokhawlhna bik tak leh damlohna thil a nih loh chuan kal ngei ngei hi an bat a ni a. Sawmna dawng velote pawhin, sorkar hna kan thawh phawt chuan kan ngai pawimawh tur a ni.

Rambuai lai khan tihluihna ang rawngkai deuhva sorkar hnathawk leh zirlaite kal tir an ni thin a. Khatihlai kha chuan MNF-te an rammu a, India laka inlakhran kan tum hunlai a ni a. Tihluihna rawngkaia inkhawrh chhuah pawh a tul chin a awm a ni ang e. Tunah erawh chuan kan zavaiin Mizoram hi India ram bung khatah kan pawm tawh a, inlakhran tumte pawh an lo haw vek tawh a. Kan ram ‘national day’ te phur taka kan lawm hi kan mawhphurhna a ni tawh. A bik takin sorkar hnathawkte chuan he an mawhphurhna hi an hlen ngei tur a ni.

Chumi ruala pawimawh em em chu hun vawn dik leh sorkar kalphung (protocol) ngaih pawimawh hi a ni. National Day kan lawmna inkhawmah emaw official thila inkhawmna reng rengah Governor kha khuallian a nih chuan a thlen hma-in Chief Minister, Minister leh mi pawimawh dangte an thleng ngei ngei tur a ni a, sorkar hnathawk phei chu an tlai thiang lo. Khuallian kha Chief Minister a nih chuan CM thlen hma-in midang zawng chu an thleng tur a ni.

Mipui mimir chu hetiang thlap hian a thunun theih loh. Minister leh sorkara mawhphurhna neitu dangte, sorkar official-te erawh chuan an zawm ngei ngei tur a ni. An kal tlaia CM hnu-a an thlen chuan hrem theih pawh an ni. Election Commission hotute an lo kal tuma inkohkhawmnaa tel tura tih Bawrhsap pahnih tello pawh hmun leh hmunah an suspend nghal mai kha. Kha kha mi tih dan a ni a, tlai ta ringawt pawh ni sela an suspend tho mai thei a, an suspend loh pawhin na taka zilhhau (censure) tal chu an pumpelh hauh lovang.

Hetiang nikhuaa ka ngaihmawh leh em em chu hnam puanzar (national flag) leh hnam hla (national anthem) kan zah thiam tawklo leh kan ngai pawimawh tawklo fo hi a ni. Sawi tawh angin India sorkar laka zalenna kan sual lai kha chuan kan rilru chu eng pawh lo ni rawh se, tunah chuan India Hnam Puanzar leh Hnam Hla hi kan ta a ni a, kan zah thiam leh kan mawi a ni tih hi kan hre tur a ni.

India Hnam Hla an sak/rem laia zirlai rual dinna chang hrelo ka hmuh thin hian an zirtirtute’n an zirtir lo a ni ang tih hi ka rilru-ah a lo lut ziah thin. Hei hi an zirtir ngei ngei tur a ni. A zirtir ngailo zirtirtu leh sikul hi hrem dan pawh a awm hial ka ring a, dan a awmlo a nih pawhin zirtir ngei turin sorkar, education department hian a ti tur a ni ang.

Kan Hnam Hla chauh a ni lo. Ramdang Hnam Hla pawh kan zah sak tur a ni a, United Kingdom Hnam Hla “Kan Sap Lal Duhbera” tih hla an rem/sak pawhin kan din sak ngei ngei tur a ni a. Chu chu mi pangngai tihdan a ni. A nachang kan hriat loh phawt chuan mimawl kan ni. Mi Hnam Hla zah sak nachang kan hria ang a, kan Hnam Hla leh Kan Hnam puanzar phei chu kan zah thiam em em tur a nia, kan Hnam Ni pawimawh pawh kan zahin kan ngaisang tur a ni.