Thlaler Pangpar

Kum sang tam a liam ta.

Chu thlaler chu a lumin a ro ngang mai; nipui lai tih takah, nungchate tan chuan han damkhawchhuah ngaihna a awm lo.

Pangpar te chu a ro bem hlawm a, hnim hring hmuh tur reng a awm lo. Pangpar kung pakhat erawh a la ro ve lo, a la naupang em a, a la thi ve lo mai mai a ni.

La thi lo na na na chu, ama than thanin a thang ve a, eng tikah emaw chuan a la parchhuak ve ang tih ngaihtuahin a hlim ve em em thin.

"Eng tikah nge ka puitlin ang?" tiin khawlum hnuaia amah en thintu ni chu a zawt thin a, ni chuan, "Nghak hram hram rawh," tiin a lo chhang thin. "Hetia ka ka rawn em che hi i tan a tha a, ka zungin a rawn chhun che te hian zawi zawiin i lo thang ve thin alawm," tiin ni chuan a lo hrilh thin.

Chutia niin thil awmzia a hrilh chang te chuan chu pangpar chu a lawm ta em em thin a, he thlaler hmun ro-ah hian a puitlin hunah a la par ve ang tih a ngaihtuah avangin a hlim thin a ni. Par ve hrim hrim a chak vanga hlim erawh a ni lo, he thlaler hmun ro leh hrehawm hi tlem talin a timawi ve ang tih a rin vanga hlim zawk a ni. Chu mawlh chu a ngaihtuah thin---he khawvel hi chhe te tala cheimawi ve a chak a ni.

Vawi khat chu, ramvakmi pakhat hi a lo kal a, chu pangpar chu a rawn rap ta mai.

Chu pangpar chu a thi lek lek a, a lungngai ngang mai. A thih dawn vanga lungngai erawh a ni lo, he thlaler tiduhawm sawt tura a par ta lo tur chuan a tilungngai a ni.

Chutia lungngai taka a awm lai chuan khuanu hian a lo hmu a, a lungngaihzia leh he khawvel cheimawi ve a chakzia a hmuh chuan a khawngaih ta. A rawn pan vang vang a, nunna a pe ta.

Chu pangpar chu a dam leh ta. Rei lo teah a puitling a, a par ve ta hial mai. A awmna thlaler, hmun ro ri re chu amah vangin a lo mawi ta a nih chu!

(He thawnthu hi damlo enkawltu pakhatin hmeichhe pakhat - 'Loki' hnena a pek - 'Flower In The Desert' tih lehlin a ni.)