ISRAEL-ah KUM HNIH

¢ Lalthakima, Israel

KAN THLEN HLIM: Shavei Israel Organisation bultum, Jews Agency te hmalaknain November 2006-a Mizoram atanga mi 218, Israel ram hruai thlente zingah ka tlin lohna ang anga pawmin, Lalpa khawngaihna avang liau liauin ka tel ve a. Bombay International Airport atanga Israel thlawhna EL-AL-a darkar riat lai kan thlawh hnu chuan November ni 22, 2006 zing khaw vawt tak karah Tel-Aviv Ben Gurion Airport-ah kan tum a. Airport chhunga room lian tak pakhatah chuan eitur tuihnai tin reng buatsaihsain min lo hmuak a, thlawhna chhunga kan lo in eipuar tawh avangin ei tha peih a bar kan awm tawh lo. Chu bakah, kan thlen hlima engemaw thil tul han lam mai nan tiin he room-ah hian pawisa, mamawh zual leina tur leh temporary identity card (teudat ole) chu chhungtinin kan dawng nghal a. Kan Mizo-pui Israel rama cheng tawh te'n an hna leh an hun hlu tak kalsanin khaw vawt tak karah min lo hmuak a, tichuan hlim taka chibai te kan inbuk zawh hnu chuan keini group chu bus mawi leh lian takin Israel ram hmar lam Nazaret khawpui, hun engemaw chhunga kan chen nana buatsaih lam panin kan tlan ta vang vang mai a ni. He group hi hmun hniha then kan ni a, group khat chu hmar lam tho Carmiel khawpui mawi takah dah an ni.

KAN CHENNA TUR HMUN
Kan chen lailawkna tur hian building lian tak pahnih, fai leh compound nuam tak, room chi hrang hrang nei buatsaih a ni.

A hmun kan thlen hian min enkawltu tur te bakah Nazaret khawpui enkawltu/hruaitu lu tak takte'n hlim takin min lo dawngsawng a. Kan room tur theuh chahbi kan han dawng sang sang a, room chhungah chuan engkim peihsa, mutbu, fridge leh thingpui/coffee han in mai theih tur leh bungbel te alo awmsa vek mai. Dinning hall lian takah chawhlui tuihnai takin min lo hmuak bawk.

Thlen hlim buai zual chhung kar khat zet chu zing leh tlaiah chaw tui tak dinning hall-ah a huhovin kan dawng ziah thin. He chaw hi thalai zinga a ei duh apiangte chuan kum tluanin an dawng chhunzawm bawk. Chhungkuaa awmte chu kar khat ral hnu chuan mahniin rawng kan inbawl ta a, kan thlairep kente kan han keu thet a, bekang rep, baibing rep, rawtuai rep rimte a nam nghal ram ram mai. Kan thlen hnu hun rei lo teah keimahni min lawmna hun buatsaih a ni a, Nazaret khawpui hotu (Mayor) te leh sorkar office-a officer lian leh mi pawimawh tak takte'n thu tha tak tak sawiin an duhsakna min hlan a ni.

KAN MIMAL HAMTHATNA
Kan chenna building-ah hian office lian tak a awm a, chuta hnathawk zawng zawngte chu keimahni min buaipuitute an ni. Kan thlen ni atangin min buaipui nghal char char a, medical check-up, insurance leh bank account te min hawnpui nghal vek a. Pawisa draw chhuahna leh damdawi in dawrna card fel tak, nawhalh bawm tiat lek, pan tha thlerh thlawrh leh rammi nihna identy card fel tak, a pathum pawha purse-a han dah mai theih vek chu hun rei lo te chhungin mimal tinte'n kan dawng nghal vek. He card pathum hi kawng engkima neitu chan min chantirtu leh mi tiawlsamtu thil pawimawh tak a ni. Chung card pawimawh takte vawnhim dan tur chen chuan min zirtir bawk.

KAN ZIRNA
Kan inchinfel thawkhat hnuah chuan kan building chhungah ngei, ni sa, ruahsur, khawvawt leh khawlum engmah tuarlovin zirna sikul kal kan tan ta a, Israeli leh Russian nu fel, hmeltha leh hawihhawm tak tak te'n nitin zing 8:30 atanga chhun 1 thlengin Hebrew min zirtir thin. Kan vaiin group 5-a then kan ni a, thalai, nu leh pa a hrangin. Khawngaih chunga khawngaih leh chhawnna tih ang deuhvin, nu leh pa, zirlaia hnufual deuh leh hmasawn duhte tan zan lamah zirtirtu dangin hunawl karah extra class min neihpui ziah bawk.

RABBI FEL TAK MIN PE
Kan han inremfel atanga thla 2/1 hnu atang chuan vanneihthlak takin kan thlarau lam nun kaihruai turin Shavei Israel bultumin Rabbi Yahuda Gin, Rav fel leh duhawm tak chuan min rawn chenchilh nghal a, nitin chhun leh zanah kan hunawl neih dan te siamfel a nih hnuah tawng lehlin chawp ngai miah lovin mahni tawng ngeiin Pathian thu tha tak tak thahnem ngai takin min zirtir thin a, kan lawm hle a ni.

MIN ENKAWLTU MIZO NGEI
Ram neitute, keimahni min enkawltute bakah kan damloh mangan emaw, kan mamawh kawng tinrenga kan harsatna kan tawng ngeia kan sawi theihna tur leh a tul ang anga min buaipui turin Israel rama hun rei tak awm tawh, tawng thiam Mizo mipa 1 leh hmeichhe 2 fel takin min chenchilh bawk. Anni hian an hna an tlin em em a, kum khat chhung min enkawl a, an chungah kan lawm em em a ni.

EXCURSION KAN NEI THIN
Kan zir chhung hian a khat tawkin excursion kan nei thin a, Israel ram hmun pawimawh tak tak te, kan thlahtute lo chen tawhna hmun te leh hmun hmingthang tak takte min tlawhpui thin. He'ng kan zinkualnaah hian kan eitur min buatsaihsak bakah kaihruaitu (guide) tha tak leh fel takte'n a bul atanga a tawp min thlenpui thin a ni. Kan thawmhnaw inbel dan tur, pheikhawk bun hahdam tur thlengin min hrilh thlap zel.

THILPEK KAN DAWNG NASA
He hmun kan thlen hlim hi thlasik khawvawh vanglai a lo ni a, 'khawilama mi zozai nge?' tih mai tur khawpin Israel rama lo cheng tawh kan Mizo-puite leh Israeli-te hnen atangin thilpek hlu tak tak kan dawng teuh mai. Thawmhnaw lum, kamis, kekawr pheikhawk thlengin hak sen rual a ni lo, ip lian pui pui hian a lo thleng tup tup reng mai a, keini ang rual, thawmhnaw lum pawh nei zo lo kha, Lalpa thatna avangin, kan vaiin, a te ber atanga a lian ber thlengin kan lum veng veng mai chu a nih kha. Mahni sum seng miah lovin kawrlum te kan han hak thlak sek mai zawng a nih hlawm kha! Kan ha seng lo a, a dahna a indaih bawk si lo, bawlhhlawh bawm lama paih lut tawk lah bo lo! Thawmhnaw hak sen rual loh kan vaiin vawiin thleng hian kan dawng zel.

KAN KHAWSAK DAN
He hmuna kan zir chhunga kan khawsakna atan chhungkaw tinte kan bank account-ah sum a lo lut zel a (he sum hi kan rulh leh tur a ni lo a, ramtiama hawte thilthlawnpek dawn liau liau a ni). Mizorama kan awm laia keini angina kan hmuh phak loh bawnghnute duhtawk, apple, grape leh thei chi hrang hrang duhtawk tak meuh, theitui chi hrang hrang duhtawka chhungtinte fridge mawi hmak mai khawpa a han inhung tlar thut mai te, chu bakah arsa, bawngsa, sangha chak zawng zawng duhthala kan han khai haw ve ta te, chawei tui lo tana han inhnawh puarna tur eitur tha chi hrang hrang lah a tam ropui si.

"Insak loh inah in cheng ang a, in chin loh theirah in ei ang" tih te chu a taka chentuah Lalpa thatna leh zahngaihna chuan min lo siam ta der mai.

A ram theirah hi a tui em em vek a, tin, thei chi hrang a tam bawk. Dawnfawh te hi a lian thei khawp a, pum khat kg 10-20 hi bazar-ah te hian a lum hul mai a, a man a tlawm ropui si, a thlum em em hlawm lehnghal.

"Vawiin chu tui a lo haw dawn, in nghah a ngai," tih a tul tawh lo, tuisemtute biak that deuh lah ngai tawh lo, heti khawpa ruahtui tlak tlemna ramah hian chhungtin hmansen loh, kang ve ngai lo, in tinah tui lum leh vawt duhtawka herhchhuah theiha a awm reng mai te hi a mak a ni.

DUHSAKNA KAN DAWNG
Thla 2/1 kan awm hnu chuan kan khua Nazaret khawpui dinthar leh hnu kum 50 tlin (golden jubilee) lawmnaa sawmbikte Israel ram prime minister leh minister dang pawimawh tak tak leh sorkar miliante fuankhawmna hmunah keini group aiawhin nupa tuakkhat thlan chhuah an ni a, min duhsakzia lantirnan lawmna mei dettuah hial hman an ni a, a ropui khawp mai.

Tin, kan chenna building-ah police lam hotute lo kalin, chetsualna laka kan fimkhur dan tur leh kan taksa him dan tur te, mitinin 'right' kan neih dan te, kan khawlai vahchhuahna a ni emaw, in lamah a ni emaw, kan fimkhurna tur thil leh kan tih ngei tur chi te chiang takin min zirtir bawk. A bengvar thlak khawp mai.

HRISELNA LAM
Hriselna chungchang hi an ngai pawimawh em em a, doctor-in thisen, zun engkim min check-sak chamchi bakah kan chenna hmunah ngei health deptt lam te lo kalin, kan eiin siam dan te a hrisel tawk em, eng nge breakfast/lunch-ah kan ei a, naupang eitur eng nge kan siamsak thin? tih te an rawn enfiah thin. Ei leh in tur siam dan leh hrisel zawkte min zirtir thin bawk. Tin, kan bazar dan tur chungchang thlengin, thil hrisel, man tlawm si kan lei dan tur te, kan thil lei hrisel tawk leh tawk loh kan check dan tur thlengin engkim min hrilh fai leng a ni ber e.

NAUPANG ENKAWL DAN
Chhangchhe nu leh pa te hnenah an fate enkawl/kaihhruai dan tur bakah inchhungah pawh ni se an intihpalh leh chetsual mai theihna laka ven dan tur thlengin, engkim min zirtir thin. Tin, electric leh gas kan hman te a him tawk em tih te, fel lo lai te a awm em tih check kual reng a ni bawk. Gas bur hi inchhungah an dah ve ngai lo a, thil thiang lovah ngaih a ni tawp mai.

Naupangte hi an sikul kalnaah a ni emaw kan zinchhuah pui dawn a ni emaw, an inchei dan tur an pheikhawk bun tur chi leh an inthuam dan tur engkim hrilhlawk thin kan ni a, tin, an sikul ban hnu tlai lamah kan building chhungah enkawltu hranin thil dang, infiamna lam an zirtir leh thin bawk. Naupang zawng zawngte chu an kum phu tawk ang zelin sikul-ah an dah a, naute pawmlai te pawh an nu te'n tha taka an zir theih nan tiin nauawmna hmun tha takah an dah thin.

SOCIAL WORKER DANGDAI
Kan chenna hmunah hian social worker fel tak pahnih kan nei a, kan thlen hlim hlawl atangin mitin mai hi kan vaiin a mal malin interview min neihpui vek a, eng phurrit nge kan neih min zawt thin. Harsatna bik riau kan nei em tih te, kan hun kal tawh leh kan tawn mek thlengin chipchiar takin min zawt thin. Kum upa lamte pawhin hetiang hi an la tawn ngai reng reng loh thu an sawi.

Anmahni hi an nelawmin a fel em em a, thian kawma kawm theihin a awm thiam a, an bulah duh aia tam sawi a awl hle. Interview min neih pui atang hian tunge ka nih, eng mize pu nge ka nih, englam hawi zawnga enkawl chi nge ka nih tih hi kan thlen hnu chawlhkar khat lekah min hre vek thei.

Ka sawi fo thin chu - Mizoram chu sawi loh India rama kan awm lai chuan kan mizia tam tak chu kan thupin kan thukru a, tu deptt mah hetiang taka mimal nun leh chhungkaw chik awm hek lo, a rethei kan rethei ngawr ngawr a, a hausa an muk telh telh a, kan inkar a hla telh telh chu a nih kha maw?

Ram thianghlimah zet chuan mihring nung ve kan nih chuan a tu a te pawh min ngai pawimawh em em a, nun hian awmzia a nei a, kan nihna a langchiang ta kawk mai a, zep theih leh thupbo theih rual a awm ta lo. Kan nihna chiah chiah kha pholanin a lo awm ta a ni ber. He mimal interview atanga an hmuhchhuah - nupa kar harsatna a ni emaw, pa/nu leh fa kar a ni emaw, harsatna ruk engemaw tak nei a ni emaw, a tanpuina kawngah hneh takin midang hriat si lohvin hma an la nghal char char a, hei hian mihring nun an ngaih pawimawhzia a tilang hlein ka hria.

Tin, taksa leh rilru lama rual ban lo, hnathawk tak tak ve thei tura an ngaih loh te phei chu sorkar atanga tanpuina an dam chhunga thlatin an hmuh theihna tur kawng dapin hma an la char char a, hetiang tanpuina dawng hi keini Mizo zingah pawh engemaw zat an awm. Thlatin sum a dawn ve miau avang khan a chhungte tan khan phurrit a nih loh phah a, chu chuan chhungkaw hlimna a thlen alawm.

Social worker hi Israel ram khaw tinah an awm a, bial an nei hrang theuh thung. An training-na a tha hle a ni ang, an hna hi an hneh em em vek mai a ni. Keini chhungkua hi mi duhsak ta ber emaw'n le tih a awl khawp mai. He hmalakna duhawm tak, mimal nun ngaihvenna hian chhungkaw tinah, khawltlangah, ramchhungah rahtha a chhuah a, an ram pawhin heti taka chaka hma a sawnna rahbi pawimawh tak pakhat chu a lo nih dawn hi.

COURSE KAN ZIR LEH
Chutianga duat taka thla 7 lai tawng zirna sikula kan zir hnu chuan final exam te neiin a thawh khatna chu kan zo ta rih a. Tichuan chawlh (holiday) hun engemaw chen neiin chumi chhung chuan hmun pawimawh hrang hrangah te min han zinkual pui leh te te a. Chumi hnu chuan kan eizawnna lam tur hawi course chi hrang hrang min chhawpchhuahsak leh ta a, he course kan tan hma hian kan zavaiin mitinte dinhmun, eng course zir tur chi nge kan nih, kan thluak chak dan (talent) test chipchiar tak min neihpui leh vek a, Mizoram te anga tute emaw hmelhriat vanga mahni tlin loh leh phak loh puia inhnimphum mai chi chu a ni hauh lo.

Kan test result atang chuan mahni phak tawk ang course chi hrang hrang zir tura hnimphum leh vek kan ni.

Kan awm dan leh thil tawnte ka chhut chet chet hian, naute a lo piang a, chaw kan barh a, tawng kan zirtir a, sikulah kan hruai a, a silhfen, a ei/in tur, a damdawi leh doctor rawn ngai zawng zawngah kan kai hruai a, a lo puitlin hun atana tha tur kawng kan dap a, kan kaihruai chho zel hi ka inchan ber thin. Kan ke chheh tin rengah min kaihruai char char a ni ber mai.

KAN INTHENDAR TA
Course kan zir zawh meuh chuan kum khat a lo vei ta der mai a, kan awmna hmun chhuahsana mahni kea ding ve thei tura ngaih kan lo ni ta. Mahni chenna hmun tur duh kan thlang a, mahni thiantha leh chhungte chenna pan an awm laiin kan hotute'n awm se min duhsakna hmun pan an awm bawk. Intihluih a awm lo a, mahni duhthlanna kha a lal ber chu a ni.

Khaw hran hran - Carmiel, Maa lot, Afula, Kiriat Arba, Bet el.Sederot etc-ah te kaldarhin awmhmun benbel kan tan ve ta. Tichuan kan inluah neitu nena kan contract denchhenin inluah man engemaw chen sorkar chuan min tanpui zui ta zel a, chhungtin dinhmun leh member a zirin tanpuina dawn zat hi a inang lo. Hei hian khawsak a ti ziaawm khawp mai. Inluah contract sign hi a tlangpuiin kum khat a ni ber a, chumi hnu-ah duh chuan chhunzawm leh zel a ni.

KAN AWMNA KHUA TEN MIN LO DAWNSAWN DAN
Khua kan luh hlim, tu khaw khain min rawn um e hma ni 2/3 chu a bangbo thlak khawp mai. An han hriat ve tak chinah erawh chuan a hria an lo pung zel a, chaw leh chawhmeh hminsa tuihnai tak in tinah min han hlui phawt a, thawmhnaw buara ip engemaw zat kawngkhar bulah a lo intiang nghek nghuk ta fo mai. Hak duh chi a awm laiin hak duh loh chi lah a tam bawk. Mut puan lum chi hrang hrang leh meilum ai chi te nen lam kan dawng zel. Thilpek petu nih hi an duh hliah hliah a, rawngbawlna pawimawh takah an ngai a ni.

Chini, chi, coffee, chhang leh thei chi hrang hrang nen mi hrang hrang hnena atangin kan dawng ta zawih zawih mai. Hun a lo ral deuh hnu phei chuan fridge, almirah leh washing machine thar te thlengin kan dawng ta. A mak hi ka ti lutuk a, awih pawh har ka ti rum rum thin. |hutna lam sofa, khum te pawh second-hand kan hung ve ta dul mai a, kan mamawh tinreng hi an rawn vawm lut a ni ber. Tichuan Kut chi hrang hrang kan han hman dawn te hian bazar-na kan neih loh hlauvin pawisafai leh Kut chhunga ei/in tur chi hrang hrang min mawlh mawlh hlawm bawk.

Kan thilpek dawn hi chu a uar lo thei ang bera ka sawi a ni a, a chipchiara sawi dawn phei chuan a awihawm lo mah mah ang tih te pawh ka hlau rum rum! Mizorama ka awmlai hun kha leh chenah khan mahni tih ve phak tawkah thilpek te kha ka lo va uar tawk lo em ka tri rilru a, inchhirnain ka khat thin.

HNATHAWK LO TEN SUM AN DAWN
Hnathawk nghal an awm laiin thawk nghal mai remchang rih lo pawh awm a ni. Hnathawk lote tan hian hming sign-na office a awm leh zel a, chutah chuan hna hmuh hma chu hming sign mai tur. Thawh loh vanga harsat lutuk lohnan sum tlem a zawng sorkarin a pe thin a ni. Heta hming sign chhung hian anni office lam hian kan thawh theih tur awm min lo zawnsak zel thin.

An hlauh ber pakhat nia ka hriat chu hna la hmu remchang rih lo kha a lo rethei lutuk ang a, a rualawt ang a, ngaihtuahna tha lo te a lo neih phah ange tih hi niin ka hria. Chhungkaw tinte sum lakluh leh khawsakna inmil tawk leh tawk loh hi an thlirin an chik em em bawk. Khaw hotute hian a khaw chhunga cheng chhungkaw hrang hrangte dinhmun hi an hre chiang em em a, tanpui ngai leh ngai lote an hre hneh hle.

A ram dinthar lehna la rei lohzia te ngaihtuahin a sorkar inrelbawlna hi a fel ka ti. Khaw kar kawng a tha em em vek a, tui, electric, gas kan hnianghnar em em vek mai, chhungtinin. Tin, naupang leh upa an ngai pawimawh em em a, naupang infiamna tur park nuam deuh deuh hi inkar hlat lo te teah a awm zel a, an sikul kal piah lamah an chawlh lai leh hunawla an tih tur, music zirna, tui chenna, lemziak zirna te leh an intihhlimna tur thil chi hrang hrang hi sorkar hian a ngaihven hle.

Chutih rualin tar leh upa lam inawmtlei vena tur thil hrang hrang an buatsaih peih em em bawk. Upa lam tan 'function' chi hrang hrang an siam fo a, bazar leh kawngpui sir leh park-ah te an thut hahchawlhna tur thutna nuam tak tak an siam zel bawk. Zing leh tlai lamah te hian kawngsir hmun nuam tak takah hian an thu a, an inkawm laih laih thin. Kan ram lama tar leh upate ka ngaihtuah chhuak thin. In nghak tur leh a la chak deuh phei chuan nauawm tura kan dah ngawt nen kha chuan inang lo ka ti hle. Tar leh naupang an duat em em laiin thalai erawh hnathawk turah an dah a, an dim miah lo ti ila kan sawi sual awm lo e.

Heng ka han tarlante hi a tlangpui chauh a ni a, kum hnih chhunga kan thil tawn leh malsawmna kan dawn te hi chipchiara ziak vek sen rual a nilo, a sei lutuk dawn tlat mai. Kan sawi uar a ni lo a, dawt a ni hek lo. A tawng ve lo tana 'a ni em em dawn em ni?' tih tur hi kan tawng tlat a ni. Chutih ruala kan hriat reng tur chu Israel ram pawh khawvel a a ni a, vanram la ni lo hek lo, famkim lo leh sual te pawh khawimaw laiah a la awm ang tih hi a ni. Engpawhnise, keimah bik chuan kan thlenthlak atanga malsawmna ka dawn zozai hi ka chhiar seng lo a, ka lo suangtuahna thin piahlam vek a ni e.