Ka Sawi Ve Ni A Ni Tlat Mai Le!

¢ Robert Thangmawia

Thianpa Stephen Auhmun te anga thu lawi lo mai mai leh zeldin thu mai mai ziah hi ka inthlahrung deuh thin a; nimahsela, anni ang tan hi chuan an awmna hmun apiang hi an 'auhmun' a ni mai zel reng a. Chanchinbuah man chawiin kan lo la chhiar ta dah a! Chuvang chuan ka inthlahrung peih tawh bik lo. A thu hrimah anni ang thuziak hi chu ngaihzawngte nena inthen hlima khawhar hnawt tiauah emaw, mitthi lumennaa thingpui lumna vela nuihpui tawk vel a nih laiin, keini thuziak erawh hi chu Pathianni tuka chhung inkhawma chhiarchhuah tlak a ni chawk.

Kan naupan laia kan pawnto hla zinga pakhat - "A hnu hnung hnung phungin seh, a lai lai lai-pawngah, a hmasa sa kel-in rai," tih kha hman ni chu ka rilruah a rawn lang a. Chutih hun lai chu, Auhmuna te, Hruaia Chawngte te pian hma daih, a sap tawng chuan - long long ago/once upon a time – daih kha a ni. Zan thla eng hnuaiah kan pawnto a, kan intihthaih a, he pawnto hla chham chung hian kan tlanchhe dar dar thin. Tlan hmasa fal kan awm lo a, hnuhnung fal lah kan awm hek lo. A tlan chak ber tan pawh first prize khi a duhawm tehchiam lemlo bawk a; kan tlanchhe rual a ni ber e.

Tun hunah erawh hi chuan kan naupan lai pawnto hla hi a dik tawh lo. A hmasa fal tan lawmman tha a awm a; a hnuhnung kawl-ek thai tan chuan kal hmasate kuang bang zut tur pawh a awm ta lo a ni. A ruhno no chhuakah tih chu a takin Mizo fate pawhin kan hmang ve tak tak ta. Infiamna a ni emaw, sumdawnna, lehkha zirna leh khawvel nun kawng tinrengah khawvel hi a rawng sawt ta em em a ni. Mihringte zingah hian Pathian hian mi danglam bik tura a duan an awm a ni mai thei e; nimahsela, chutiang mi tlemte tih chauh lo chu mi vantlanga piang vek kan ni. Hausa deuh leh rethei deuh chhungkua atanga piang pawh kan awm ang; chutiang mite chuan remchanna kan neih pawh a inchen lo ngei bawk ang. Nimahsela, vanduai tur hrim hrima khuanu ruat hi chu kan awm ka ring thei lo. Bible pawhin, “Mi chakte chuan Vanram pawh an pawnglak thei” a ti mathlawn lovin; Ama anpuia a siam mihring zinga tupawh mai hian kan beih chiam chuan hlawhtlinna hi kan sual chhuak thei tih hi sawi nawn a ngai lo ang.

Hlawhchham leh beidawng kan tamna chhan hi chu kan tumruh loh vang emaw, kan thawhrim loh leh huaisen loh vang a ni ngawt lo. A chhan bulpui nia ka hriat zawk chu kan khawvel zin kawng kan zawh tan tirh atang hian khawi lai nge kan zin tawpna tur tih pawh hre lova kan ar-kawt chhuah mai mai thin vang nimahin ka hria. Kan zin tanna kawtchhuah chu a inang theuh a; mahse mi tam zawkte hi chu mahni zin kawng zawh tawp huna tih tur pawh hre lawk lo emaw, khualpang zin mai mai emaw, zin kawng zawh tawp peih lova sazupui ang maia intlansiak laklawh laia muhil ta te kan ni chawk a ni. Hetiang mite tan hian khawvel hian consolation prize pawh a siam lo hrim hrim. Paula thuchah ang deuhin, ‘intlansiakna chu bei hram hram’ tur kan ni zawk.

Tun hnai deuh atang khan Mizoram Youth Commission chuan Lord Krishna IAS Academy nen tangkawpin Govt. Aizawl College-ah Civil Services Coaching kan nei tan a. Hetianga civil services coaching buatsaih tura man to taka New Delhi atanga mithiam kan chahchhuah hian chhan pahnih a nei: Civil Services/Central Services-ah Mizote hian par kan chhuang leh tur a ni tih leh, phai lama coaching man to lutuk chhim ve phak lo, lehkhathiam tam takte ban phaka keimahni buzawl ngeia chhawpchhuah hi a ni. Lo ngai reng mah rawh u, kan Mission 2011 hi Pathianin mal a sawm ang a; Mizoram leilung ngei atang hian Mizo thalai engemaw zat chu eng service-ah emaw ber chuan an inhlangkai mawlh ang tih hi ka chiang ngam tlat a ni.

Nimahsela, ka han sawi duh zawk tak chu, kan thalaite zingah hian Lal Isua thu zawm pawh ni chiah si lova ‘nun tam’ nei an tam lutuk thung. Civil Services coaching kal paha zaipawl member ni duh te, football khel duh te, inneihna apianga fatu pah duh leh thil dang nena fawmkem duh an kat nuk mai. Chutiang mite erawh zawi zawia til turah ngai ila. IAS hi tun ang hunah ram-awmpawng zakzeh ngah lutuk chunga tlin theih a ni lo. Khawtlang leh Kohhran thil tih tam zawkah hian awl ngam ila, khawtlang leh Kohhran pawhin hetiang mite hi chu i awl ngam bawk ang u. Kan ram leh khawtlang hian rualawhna dik nei ila, chumi intlansiaknaa tlan ngamte chu fuih ila, khawtlang thiltihah pawh an inhmang ve lo a nih pawhin rel mai lovin ngaihhnathiam teh ang u.

Engpawhnise, kan thalaite pawh hian kan rualawhna leh kan ngaihpawimawhte hi kan thliar thiam a hun ta hle mai. Mobile handset to fe fe kan lek a, laklawh thilah han hmansak dawn ila “Balance ka nei lo” an ti tuah leh hum a. Hla ngaihthlakna atan leh tute emaw mipat-hmeichhiatna hmang lai dahkhawlna atan te kan hmang vel mai mai a nih hi le! Technology hi hman tangkai tur a ni a, kan hmang thiam tur pawh a ni; hmanrua a ni tih hrereng ila. Achuti ta lova a technology zawkin min control zel dawn a nih chuan Rel lo luh a ngai lo, kan ral tho tho ang.

E khai, Auhmuna te ka ang sawt riau mai, thu lawi lo ka ziak ve tan dawn tlat. Duh tawk phawt teh ang. A hmawr bawkna atan chuan kan thalaite hian awm hmuna ang ang leh sawrkar emaw, rual u zawkte tawng tawng lo hian mahni hmakhua theuh hi thlir ila, tih hlawhtlin i tum teh ang u ka ti duh a ni. Thiante vanram kai vek tawh hnua sephung kawrama ‘Tik’ la tih hi a hun tawh lo. Tin, Pathian hnam thlan tia inchhalte hi heti mai maia kan intawllen a, kan inhlimchhuah mai mai chuan hnama min thlangtu hian min hnuchhawn ngei ang tih pawh a hlauhawm hlel lo e.