¢ Debbie Chawngthu
Q1. Ka kiu leh ke tlang hi an rovin an thap a, engtinnge ka enkawl ang?
= I kiu chu nawhfein nawt thin la, i tleuhfai hnuah hul takin hru leh la, oil hnawih nghal ang che. Ser phel phawk la, i kiu nawh nan hmang ang che. Hetiang hian kartin vawi li i ti thin dawn nia. I ke tlang chu i sil apiangin nawhlungin nawt ziah la, i hruk hul hnuah olive oil in massage leh la, chumi zawhah i ke ti lumin mawza bun ang che. Hetiang hian i mut hmain ti thin la, a tha lehzual a ni. Tin, moisturiser leh oil te, glycerine te hi vun that nan lo inhnawih tan ang che.
Q2. Zing ka thawh hian mut kham lo hmel leh mit bui chukin ka tho thin a, engtinnge ka tih ang?
= Tui taka han mut hi chuan mit hi chu a bui ve duh hrim hrim a. I mut hmain undereye cream han hmang chhin teh. Tin, i thawh velah tui vawtin i mit chu dim thei ang berin han sil la, darkar chanve hnuah chuan a ziaawm mai ang. Hetianga a la reh chuan lo anih chuan reilote tal vur tlangin i dep dawn nia. A reh chuang lo anih chuan mit that loh vang te pawh a ni ve leh thei tho a, mit lam thiam i rawn dawn nia.
Q3. Ka vun hi a senin a bawl deuh a, foundation ka hmanin ka lang dang zo vek bawk si a, foundation ka hman hi a dik lo a ni thei ang em?
= A hmasain foundation kan hman dawn reng rengin kan vun mil zawng anih leh nih loh kan chian hmasak phawt a ngai a. Taksa peng hrang hranga hnawih kual ai chuan a hmanna tur lai hmai emaw nghawngah hian han hnawih chhin ila, kan vun rem tur chu a hriat mai a ni. Tin, foundation te hi vunin a huat te pawh a awm ve leh thei zel a, i vunin a hua nge haw lo i hriat duh chuan i nghawngah hnawih chhin la, darkar riat a ral hnua thak a awm lo anih chuan i vunin a ngeih tihna a ni. Make-up dang i hman hmain i kut hmawrin i hmaiah i hnawih thliah thliah ang a, lapuain nuai rual leh ang che. Foundation i hman reng rengin i sam bul ret thlengin hnawih thin ang che.
Q4. Ruahtui tam laia vun leh sam ro ven dan min hrilh thei em?
= Ni e, ruahtui tam lai hi chuan kan duh emaw duh lo emaw, thlasik lai ang thovin kan vun hi a ro chak em em a. Inenkawl that loh phei chuan vun thak leh chat te pawh a awm thuai a, a mawi lo duh em em a ni. Vun mawm tan pawh moisturiser inhnawih tam a ngai ve tho a, vawikhata inhnawih vak lovin regular taka inhnawih zawk tur a ni. Lotion pangngai leh olive oil chawhpawlh phawt la, a inhu tawka i chawhpawlh hnuah vuna ban lutuk lo turin glycerine pawlh leh la, i taksaah nuai chhuak vek ang che. Hei hian nasa takin vun ro a ti ziaawm a, vun ro leh zel tur pawh a veng a ni. I inbual zawhah phei chuan inhnawih ngei ngei ang che. Zan lamah tih a peih awm tawh lo thei a, chuvangin chhun lamah i hmai chu khawizuin chiah la,a rei lo berah darkar khat tal chiah ang che. Khawizu hi moisturiser hlang a ni kan tih tawh kha. Tun ang hunah phei chuan vun enkawl nan a tha em em a ni.
Tin, thli a tam avangin sam a ro avangin sam a phir si hma em em a. Karkhatah vawithum tal oil massage pe thin ang che. Artui var laiin i suk hmain minute 20 chiah la, samin a ngeih duh khawp mai. Tin, shampoo pawh sam ro tana siam chauh hmang ang che.
HINTS
n Mizo te hi kuhva ei hnam kan ni ti ila kan saw sual lo turah ngai ila. Kan thawmhnaw inbelah han tih kai mai pawh awlsam tak a ni. Kawra a kai hian tihreh mai a har a, i tireh duh anih chuan sertui far la, nuai la, tuilumin tleuh la, a reh mai ang.
n Pickle hawn tawh dah rei hian a tlangsir vel hi a rovin a hmaur duh hle a, a hmuar mai loh nan a tlang sir zar zarah khan tel chhuan sat puan rovin hnawih la, a ro leh hmuar mai tur lakah I veng thei ang.
No comments:
Post a Comment