Chanchin Maksak 34

Inphaman tawk chiah chiah
Charles William Eliot (1834-1926), American educator hmingthang kha university hmingthang Harvard University-ah 1869-1909 chhungin president a ni a, he chanvo a thawh lai hi a vanglai tiin a sawi theih awm e.

Vawi khat chu, chu university-a a thawh lai chuan thawktu dangte nen zanriah an eiho a, professor pakhat chuan, "President i nih atang hian Harvard chu hriatna buhzem a ni ta der mai," tiin Eliot-a chu a fak a ni awm e.

"A dik alawm, mahse, ka thawhrah zawng a ni lo ang," tiin Eliot-a chuan a lo chhang var a, tin, a'n sawi zawm leh a; "Lut tharte'n an rawn keng lut a, a chhuaka-te'n an chhuahpui tlem thung niin ka hria!" tiin.


Hlawh lak hun
1962-ah khan khawvel chu nuclear indona vangin a chhe tep a nih kha.

Soviet Union-in Cuba (US thenawm lawk) ramah ballistic missiles a bun rup mai a, chu chu US chuan a haw hle. Ram pahnihte chu an inngur chher chher ta mai a, October thla velah phei chuan nuclear indona a chhuak thuak thuak ta hial.

Khatia hlau thlabara khawvelin a thlir lai khan US president JF Kennedy (1917-1963) chuan a lo la-lap hle; "Tun kar hi ka hlawh lak hun," tiin mi pawimawhte bulah a lo titi suam suam mai!