Zirtirtute Ni lawm nan vawksa!

Naupang \henkhatin thil man to pui pui hmangin an zirtirtute an chawimawi laiin anni chuan zirtirtute 'present' tur an nei ve lo a, mahse, an ei phak zen zen loh- vawksa an ei thung.

TNT sikul naupangte chuan September ni 5-ah khan sikul dang ang bawkin Zirtirtute Ni an hmang ve a, chhunah thingpui paw, a thlum ngat lehnghal an in bakah tlaiah puar el euhin vawksa an ei.
Thutak Nunpuitute Camp, 'TNT Camp' tia hriat lar, Zuangtui-ah hian sikul an nei ve a, Kalvari Comprehensive School tih a ni. Nursery a\anga pawl 10 thleng he sikul-ah hian a awm a, sikul dang ang bawkin Zirtirtute Ni (Teachers' Day) an hmang ve a ni.
Sikul naupangte chu enkawltu nei loh vanga TNT Camp-a awmte an ni a, naupang dangte angin pawisa han dilna tur nu leh pa an nei ve lo. Mahse, an zirtirtute chu chawimawi ve ngei an duh si a, an theih tawk- pangpar \hi an awrhtir ve a ni.
An pangpar \hi chuan 'pangpar \hi' tih hming pu ve mah se pangpar a\anga siam pawh a ni tak tak lo a, lehkha cheh mawi hmanga siam a ni.
Chu pangpar \hi chu han hmuh mai pawhin a hlui tawh tih a hriat a, tun hmain tute emawin an lo awrh tawh \hin ang tih a hriat. Mahse, an neih chhun a ni a, phur takin Zirtirtute Ni-ah zirlaite'n an zirtirtute an awrhtir ve tho.
An thiam thil hrang hrang an entir a, hnam lam leh rimawi hmangin kalkhawmte mit leh beng an titlai hle.
Zirtirtute Ni lawm nan sikul naupangte chuan thingpui paw, a thlum lehnghal an in bakah tlaiah ruai an \heh a, vawksa an hmeh. A tukah erawh atta thlum chhum an hmeh ang. Chini tuiin atta an chiah a, chu chu chhumin an chaw-ah an ring \hin a ni.
Education deptt. lam a\angin sikul dang ang bawkin he token flag hralh turte pawh an dawng ve a, mahse, an tan chutiang thil chu hralh ngaihna a awm loh avangin Zirtirtute Ni an hman lai pawhin a kim thlapin an la kawl. An zirtirtute'n a tihral dan tur ngaihtuah an tum nia hriat a ni.
Kalvari Comprehensive School-ah hian zirtirtu 22 an awm a, he sikul a\ang hian mi 40-in matric an pass tawh. BA pass tawhte pawh an awm a, an sikul chhuakte chu zirtirtu-ah an \ang zui tlangpui.
Teachers' Day hi SSA state project director T Rohmingthanga'n a hmanpui a, a zuitu pakhat chuan, "Mittui tla zawih zawihin Teachers' Day kan hmang," a ti.
Zirtirtute Ni hian ngaihhlut a hlawh deuh deuh a, a sum hrawm pawh a na deuh deuh bawk. Krismas leh Valentine's Day te ang em chu ni lo mah se card leh thil inpek chi (gift item) zuarte pawh an inhralh theih phah viau mai. Kum tinin an inhralh thei deuh deuh nia sawi a ni.
Naupang \henkhat chuan card leh 'gift item' mai ni lovin calculator leh sana te hial an lei a, zirtirtu \henkhat chuan an dawng hlu sawt khawp mai.
Sikul \henkhat chuan hetianga naupangin an zirtirtute thilpek an pe \hin hi a hautak avang \ha an tih loh hrim hrim avangin inkaihhruaina te an siam a, sikul \henkhat phei chuan an khap hial. Kalvari Comprehensive School-ah erawh khap a ngai ve lo!