Mizoramin ram dang university 28 pawm

Japan, China leh South Korea a\anga zirchhuak tan chuan an zirna chu eng anga university \ha leh hmingthang pawh ni se Mizoram sorkarin a pawm lo a, an tan awmzia a awm lo. Germany university pawh pakhat mah a pawm lo.

India ram pawn university zingah Mizoram sorkar chuan 28 chauh a pawm a, university awm lo University of Andrews chu a pawm zingah a tel mauh thung! University of St Andrews leh Andrews University te chu a awm a, mahse, Mizoram sorkarin a pawm tak University of Andrews hi chu a awm lo. Chutih lai chuan university hmingthang UCLA (University of California, Los Angeles), Princeton University, London School of Economics, Standford University, Cornell University, St John's University etc te chu a pawm lo lawi!
Mizoram sorkarin India ram pawn university a pawmte chu - Burma-ah 2, England-ah 12, Scotland-ah 4, Ireland-ah 3, Pakistan-ah 2, Bangladesh-ah pakhat leh America-ah 4 a ni. India \henawm China leh Sri Lanka-ah Mizoram sorkar chuan university pawm a nei lo. Thil mak deuh chu Mizoram sorkarin Burma-a university a pawm zingah hian English and Welsh Universities tih a tel mauh mai bawk a, chutiang hming pu university chu khawvelah a awm miah lo hi a ni! American university a pawm pali zingah University of Michigan chiah a taka awm a ni a, The University of Harvard tia tarlan hming dik tak chu Harvard University niin, The University of Yale tia tarlan chu Yale University a ni a, The University of Columbia tia tarlan chu Columbia University a ni bawk. Pakistan university zingah pawh The University of Punjab pawm a nih laiin University of the Punjab a awm. Pakistan University zingah University of Sindh a awm laiin The University of Sind chu hmuh tur a awm lo!
Heng university-te hi Mizoram Police Service Rules, 1997-a a lan dan a ni a; Schedule II-ah List of Universities Approved by the Government of Mizoram tia dah a ni. He rules hi The Mizoram Gazette Vol XXVI, Issue No 415-ah December 9, 1997 khan chhuah a ni nghe nghe.
Hetiang a nih avang hian Singapore a\anga zirchhuak emaw Russia, Ukraine, Germany, Japan, South Korea, Thailand, Italy, Denmark, Australia leh khawi ram pawh ni se a chunga ram pasarih tarlan a\anga zirchhuak lo tan chuan Mizoram sorkarah hian beisei tur tehchiam a awm thei lo ang. Ram pasarih tarlan a\anga zirchhuak tan pawh an zirchhuahna chu Mizoram sorkarin a pawm university 28 zingah a tel a la ngai tho a ni.
Tunhnaia Mizoram sorkarin DRDA hnuaia thawk tur a lak pakhatah pawh UK university lar ve tak pakhat a\anga zirchhuak chu a zirna Mizoram sorkarin university a pawm 28 zinga a tel loh avangin admit card pekchhuah a nih tawh hnuah 'verbal' complaint a awm avangin a dilna hnawlsak a ni a, chutiang khawp chuan Mizoram sorkar hian India pawn lama university a pawmte hi a ngai pawimawh a ni.
Sorkar rules a nih chuan a kaihhnawih department hrang hrang a kaltlang a ngai a, chuvangin Police Service Rules-a mi ni mah se Mizoram sorkar hnuaia zirna zawk buaipuitu higher & technical education department pawh hian he thil hi hriatpui ngei turah ngaih a ni.
Mizoram sorkarin university a pawm list aia he rules chhiartute tana thil hriat thiam zawk la awm chu he rules Schedule II hi rules 7 (2) (c) tlawhchhana siam a nih laiin Mizoram Police Service Rules 1997-ah hian a tlawhchhan rules ber chu a awm hauh lo si hi a ni. Rules 7 (2) chu a awm a, chutah chuan university emaw qualifications chungchang emaw engmah sawi a awm si lo. "The names of persons included in the list shall be arranged in order of merit" tih a ni daih. Chuti chung chuan law department hian rules turin an lo 'vet' tho ni ngei tur a ni.

Related Posts :