Engpawhnise hetiang zat inkhel entu hi Argentina leh Venezuela pawhin an tawng tam bik lo tawp ang. Kan ngaihsan leh en tam English Premier League-ah hian enkhel entu tam ber \um chu mi 83,260-in an en \um kha a ni a, chu chu Manchester United leh Arsenal inkhel a ni.
September ni 2-a Kolkata-a Messi & Co inkhel te inkhel kha India ram mai bakah khawvel hmun dang a\ang pawhin an en nasa hle a, ram dang a\anga he inkhel en tura Kolkata-a zin an tam hle.
FIFA hriatpuia international friendly India-in a thlen hmasak ber Kolkata khawpuiin a thleng hi a inhmeh a, India ram hmun danga football fans te tel miah lo pawhin Kolkata hian heng ram pahnih player-te hi a mikhual tawk tho ang.
Zan dar 7-a inkhelh \an tur kha, chawhma dar 11 velah chuan gate chhunga luh tumin an intlar put tawh a. Venezuela lamin sawi an hlawh ve lo, mipui tam zawkin Argentina an \an em a ni! Messi-a'n ngaihsan a hlawh zual a, a hming inziahna Argentina national team jersey ang, addidas siam chu Kolkata-ah hralh a kal hle a, a khelhna club FC Barcelona jersey Nike show room-ah hralh a kal hle bawk. Kolkata tualchhung kutchhuak Argentina leh FC Barcelona jersey ang pawh hralh a kal hle.
Inkhel entu te'n Argentina jersey ang an ha sup sup a, hmai chei rang an awm a, Argentina colour anga hmai chei ran man chu Rs 100 a ni a, scarf pawh Rs 100 man a ni.
Flag quality \ha deuh chu Rs 150 a ni a, taxi pu te'n Salt Lake stadium-a an passenger-te an hruai thlen nan ni dang zawng aiin rate an ti to deuh vek. Kawngpui dunga thingpui zuar a\anga shoping mall leh show room lian tham leh a te deuhte zingah pawh hlawk lo fa an awm lo ang. Hei hi Messi & co te vanga thil thleng a ni.
Inkhel an \an hmain 'warming up' la tura khelmual chhunga an rawn luhin Messi-a'n ball a khawih apiangin thawm a ring zual a. Venezuela tan away ground-a khelh ai pawhin a la 'away' zawk mah emaw tih mai tur khawp a ni thung. Argentina tan erawh an home ground ang maiin lawm leh hlut an hlawh si.
Kolkata-a Salt Lake stadium kha Messi ngaisangtute inhmuhkhawmna hmun emaw tih tur khawp a ni a, Messi-a'n ball a chan apiangin an au ring zual \hin. Chutiang mipui hmaah chuan Argentina-in 1-0-in Venezuala an hneh.
Zan dar 6.59-ah khan team pahnih player-te'n Salt Lake stadium centre an pan a, dar 7.10-ah inkhel turte hnam hla an sa. Argentina hnam hla sak turah Venezuala hnam hla an sa a, Venezuala hnam hla sak turah Argentina hnam hla an sa thung!
An inkhel ta. Team \ha zawk Argentina-in game an thunun nghal a, an nawr na nghal hle. Mahse, Venezuala lamin an nawr ve changin an hlauhawm thei hle.
Venezuala defender-te an inringtawk hle a, tunlai football khawvela attacker hlauhawm rual, Argentina hmatawngte hmaah an zam lo.
Messi a che \ha a, ball a chang ngunin a bei hmuhnawm thei hle. A \hiante tan \ha deuh deuhin a siam thei reng a, goal-ah a hlauhawm thei hle bawk.
Messi hi mipuiin an ngaisang hle a, ball a chan hlek chuan thawm a ring thei hle. Mahse stadium kha amah ngaisangtutein an khat a ni tih hria ang pawhin a awm lo a, vawi khat corner a pet dawna mipui lam hawia a kut a vai ve zeuh tih lohah chuan mipui a 'khel' lo. Salt Lake studium mipui khan Argentina an \an hle reng reng a, Argentina tan chuan mahni 'home'-a khelh ang mai a ni.
Messi bakah Maria, Higuain, Pastore leh Argentina player dangte pawh an che tha a, Aguero erawhin \um dang a pha lo tiin a sawi theih ang.
Minute 67-naah Messi corner chhuih chu Argentina defender Otamendi chuan a tauh lut a, an coach Alejandro Sabella hnuaia an khelh hmasak berah Argentina hian si khat faiin hnehna an chang ta a ni.
Minute 16-naa Rondon-a \helh leh minute 34-naa Feltscher-a \helhte kha Venezuala tan a uiawm hle.
Venezuela lam khan first half tawp lamah an khel \hat avangin inkhel thawh hnihna lamah chuan lawmtu an ngah ta deuh.
Team pahnih player-te hian khaw lum uap chuar mai an zo lo deuh a, second half-ah pawh rei lo te an chawl nghe nghe.
Ten Sport-a an commentator lar Joe Harrison pawhin he inkhel hi a en a, Dubai a\angin Kolkata hi a pan vang vang. Bhaichung Bhutia pawhin a en a, Kolkata-a football club hrang hrangte'n a huhovin an en deuh vek bawk. Mizo pawh an \hahnem hle a, 300 vel lai an nih a rin thu a hmuna entu Mizo pakhat chuan a sawi.
Inkhelh a zawh hnuaah Messi Mania chu a zual zel a, security lamin harsatna liam tham tawk lo mah se Argentina team-in Mother Teresa din Missionaries of Charity hmun an tlawh \umin, Lionel Messi erawh fimkhur thu hla vangin an kaltir ve ta lo. He hmun hi Argentina's legendary football player Diego Maradona pawhin kum thum kal ta khan a tlawh tawh. An thlenna hotel lamah bawrtu an nei chhunzawm reng a, 'a puan hmawr chauh pawh dek ila' ti ni awm takin, Hyatt Hotel bulah mi za tel an fuankhawm deuh reng.
Messi & co ten India ram an rawn thlawh hian India football-ah rah \ha a chhuah ngei a beiseiawm. Zofate tan pawh a hring a hrana Messi hmu theia kan awm ve kha malsawmna a ni. Messi, kan ngai a che.
No comments:
Post a Comment