India zalenna sual kawnga hmeichhiate

Mizo thu fingin”Hmeichhe thu, thu ni suh. Chakai sa, sa ni suh” te an lo ti thin a. Hmeichhe thu chu engah mah an ngai lo mai ni lovin thu takah an ngai lova, mihringah pawh an chhiar lo emaw ni tih theih tur khawpin hmeichhia hi an ngai nep a. Hetia hmeichhia te an ngaihsan loh leh an dah pawimawh loh em avang hian khawtlangah hmeichhia ten pawimawhna leh dinhmun tha an chang ngai lova, ngaihnep an hlawh viau thin a ni.
India ramah pawh hian hman lai atang tawhin hmeichhiate hi endawng leh dahhniam an ni thin a. Thiltihna reng rengah dinhmun tha an chang ve ngai lo. Amaherawh chu, kum zabi 19-na chho velah khan hmeichhia te dinhmun chawikang tur hian nasa takin beih a ni chho tan a. Tunah hi chuan mipa ten hmeichhiate hi kawng thenkhatah chuan kan tluk lo tan a ni chho ta zawk hial mai. Kum 1857 a India sipaiho British laka an helna(sepoy Mutiny) ah pawh khan Rani of Jhansi kha India mite hruaitu zingah a langsar hle a nih kha. India in British ho awpna laka tanga tal chhuah tum a a beih(freedom movement) lai pawh khan India hmeichhia te hi a thawh hlawk ber pawl an ni chho tawh a. Amaherawh chu, anmahni ah indahhniamna an neih thin avangin harsatna an tawk fo thin. “India hmeichhiaten an hriatthiam hunah leh an duh hun hunah India hi British-ho awpna ata a chhuak thei” tiin Mahatma Gandhi chuan hmeichhiate chona thu a lo sawi tawh a. Heta tang hian India in zalenna a sualna kawnga hmeichhia te tangkai dan tur leh an thawhhlawk theih tur zia a lang a, an han beih ve tak tak chuan Pu Gandhi-a hian a lo sawi dik zet mai a tih theih.
` Mahatma Gandhi khan India hmeichhia te chu, India in zalenna a sualna kawng a lo inkuangkuah bik mai lova, a tak tak a tel ve turin a sawm thin a. Kum 1920 hnu lamah chuan zalenna sualtute zingah hmeichhe hming a lang ta nual reng a. Chung zingah chuan Madame Cama, Kasturba (Gandhi a nupui), Sister Nivedita, Annie Beasant, Pandita Ramabai, Sarojini Naidu, Kamla Nehru, Maniben Patel, Vijayalaksmi Pandit, Sucheta Kripalani, Aruna Asaf Ali, Prabhavati Devi leh mi dang tam tak an tel a. An ni ho bakah hian Durga Bhabhi, Satyavati Devi, Khurshed Ben, Lado Rani Zutshi, Usha Mehta, Pritilata Waddedar, Ramabai Tambe, Basanti Debi(CR Das-a nupui) te pawh an bang bik lo.
Indian National Congress(INC) din chhoh tirah te khan India hmeichhiate hi politics ah an la inrawlh nasa lem lova. An tel pawhin a hming deuh chauh a ni awm e. Amaherawh chu, kum 1890 a INC Session ah chuan Kadambini Ganguli, Calcutta University atanga hmeichhe graduate hmasa ber, chuan thusawina hun a chang ve tlat a. Ani hi Hmeichhiate tan a kawng sattu hmasa kan ti thei awm e. Heta tang hian India hmeichhiate hi politics ah a kul a tai ah an inrawlh chho ve tan ta a ni.
Madame Bhikaji Cama hi hmeichhe zingah chuan tha thawh hmasa tu pawl a ni bawk awm e. Pu Gandhi-a rawn lan tak tak hma, kum 1907- a International Socialist Conference, Stutgart(Germany)ah khan Sardar Singh Rana te kaihhruaina in India hnam puan zar a lo pawt pharh tawh a. Hetih lai hian kum 46 mi a ni. Hemi tum hian India khua leh tui te chona thu tha tak a sawi a, “he flag hian India ram zalenna a entir a, Indian martar- te thisen a tih thianghlim/ hlan a lo ni tawh a. Vawiin ah hian India khua leh tui, nula leh tlangvalte u, lo tho chhuak ula, India zalenna puanzar hi chibai rawn buk rawh u’ tiin. Hemi tum hian conference a tel zawng zawngin India hnam puanzar hi chibai an buk a ni. Madanlal Dhigra, kum 22 mi, India ram zalenna tur atan a nasa tak a lo thawk ve tu leh London- a Engineer zirlai chu, kum 1909- a khaihlum a nih pawh khan, a ui thu a sawi chhuak hial a, ‘hetiang ram tan a mi thahnemngai leh huaisen hi tun dinhmun a India ram mamawh ber te an ni’ a ti. A hnu deuh ah, thian pakhat, Virendranath Chattopadhyay nen, Berlin, Germany atangin chanchinbu pakhat, Madan Talwar an tichhuak a, hei hi India mite tan chuan than harhna meichher chhi tu a lo ni ta. India thalaite an lo thanharh a, mahni ram vei na chang an hriat theihnan nasa takin hna a thawk a. “Ram dang mi te awpbehna ata talchhuak tur a beihna hi huaisenna dik leh ram leh hnam hmangaihna a ni” (successful rebellion against foreign rule is patriotism) a ti thin. A hunlai hian mi tam tak chuan ‘Mother of Revolution’ tiin an ko hial thin.
Annie Beasant hi India mi chu ni chiah lo mahse, India ram zalenna sualna kawngah hian hmeichhiate zingah chuan a langsar pawl tak a ni awm e. Kum 1893 ah India ramah lo lutin Theosophical society pawlah a tel nghal a. Kum 1914- ah Indian National Congress zawm lehin a kul a taiah tangin politics a khel chho tan a. Nitin chanchinbu pakhat ‘ New India’ a ti chhuak a. Mrs. Annie Beasant hian Congress party tan nasa takin hna a thawk a, British leh India chu inrem tak a an awm theihnan tan ala bawk a. India chu British-ho awpna lak ata chhuak a, mahni a ro inrel a awm theihnan tan a la bawk a, ‘All India Home Rule Leaque’( a hnuah National Home Rule Leaque tih a ni. Msl.) a din a, hruaitu dang - Bal Gangadhar Tilak, H.B. Mandavale, Kanji Dwarkadas, Umar Shobani etc. te nen chu Home Rule Movement chu an bei chho ta a ni. Kum 1917 bawr chho vel kha a vanglai a ni awm e.
Satyavati Devi pawh hi kum 37 mi a nihin kum 1945 khan a thi a, a dam chhung hun tawite ah hian kum 12 chhung tawp mai Jail -ah a hun a hmang. Mahatma Gandhi hova Civil Disobedience Movement-ah khan a kul a taiah a tang a, British-ho bungrua leh ram dang thil hrim hrim han tihchhiat a, han boycott vel te kha nuam a tiin , a thawh hlawk hle reng a. Amah hi mahni ram thil te ngaisang mi a ni. Lado Rani Zutshi leh a fanu te pahnih - Janak Kumari Zutshi leh Swadesh Kumari Zutshi te pawh hi Civil Disobedience Movement-ah a hnar kaitu pawimawh tak an ni pha bawk. Anni kaihruaina hian ‘women satyagrahis movement’ kha an ti lar a, kawr hring ha in lukhum var an khum far mai a. India zalenna atan a an hnathawh a lang sar hle.
Bombay lam atang a rawn chuak, Usha Mehta hi Quit India Movement lai a mi tangkai tak a ni pha a. Radio hmangin, a rukin thu a puang darh thin a. ‘Voice of freedom’ tih thin a ni. Dr. Ram Manohar Lohia meuh pawhin ‘hmeichhe huaisen dangdai leh chungnung a ni’(women of rare courage and rare attainments) a ti hial.
Amah ang bawk a Quit India Movement lai a hmeichhe tangkai zet mai, Aruna Asaf Ali hi sawi hmaih chi a ni lovang. Pu Gandhi-a zirtirna(i.e. non-violence) a chawm len a ni a, Delhi-a Mayor hna lo chelh tawh a ni a, mi tam tak ngaihsan leh zah kai a ni. Dr Ram Manhar Lohia leh Jayaprakash Narayan te nen inkawpin, Indian National Congress(INC) atanga chhuakin Socialist Party an din a. India ram zalenna tura beihna ah hian a hnathawh hi a langsar pawl a ni awm e.
‘Nightingale of India’ an tih thin, Sarojini Naidu hi Pu Nehru-a kaihruaina hnuaia India zalenna sualtute zing ami a ni a. Amah hi nu huaisen leh fing, remhre tak a ni bawk. British officials leh sipai officer te pawhin an hlau em em mai a. Tum khat Sal Satyagraha an neih tumin British sipai hovin man an tum a. Ani chuan huaise takin, ‘in rawn kal hnaih chuan ka tingmit ang che u’ (don’t come near me, i will annihilate you) a ti mai a. An man ngam ta lova. Chanchin sawi tur a ngah hle a, sawi sen pawh a ni awm lo ve. Amah hi India hmeichhiate zinga state Governor hna chelh hmasa ber a ni nghe nghe.
Kum 16 ngawt mai Mahatma Gandhi- a secretary hna lo chelh tawh, Rajkumar Amrit Kaur pawh hi nu namai a ni lo. Vawi tam tak Jail bang lo zut tawh a ni a. India in zalenna a hmuh hnu, Pu Nehru-a hova Interim sawrkar ah pawh khan Health Minister a ni a. India hmeichhiate zinga Central Minister hmasa ber a ni.
‘Iron Lady’ an tih ve mai, Durgabai Deshmukh hi salt satyagraha vel lai a a hnarkaitu te zinga pakhat a ni bawk. Chanchinbu ‘Andhra Mahila’ a enkawl a, hei hian hmeichhia te freddom movement-a an thawhlawk theihzia leh an tangkai zia te a tarlang thin a. Hmeichhiate tan chona thu a tlangau pui nasa hle. Ani bakah hian, Ammu Swaminathan(Cheri Amma) pawh hi All India Women Conference dintute zing a mi a ni a, kum 1934- ah INC a zawm a, Quit India Movement lai kha a vang lai a ni awm e. Gandhi-a zirtirna zuitu(Gandhian) rinawm a ni. A hnu lamah chuan Constituent Assembly-ah te pawh member a ni chho ta hial bawk.
Heng kan han tarlan tak bakah hian India hmeichhe huaisen, India zalenna sualtu leh ropui tak tak te an la awm nual a. India hmeichhia te zinga Chief Minister hmasa ber - Sucheta Kripalani te, hmeichhe minister hmasa ber -Vijayalaksmi Pandit te bakah lang sar lem lo te pawh an awm bawk a, sawi kim vek sen an ni lo. India hmarchhak(northeast) ah pawh hian hmeichhe ropui tak tak, freedom movement laia tangkai tak tak te pawh an awm ve nual a.
Sawi hmaih hauh loh tur chu Manipur ami Rani Gaidinliu hi a ni. Rani Gaidinliu hi January 26, 1915 ah Manipur-ah a piang a, amah hi Naga hnam a ni. Kum 12 mi lek a nih in kum 1927 khan British ho laka helna (revolutionary movement against the British) a bei tan a, Haipou Jadonang-a hnung a zui a, ani kaihhruaina hnuaiah hian hnam rilru pu tanin ramdangmi te huatna leh duhlohna rilru a nei tan a. Kum 1931 khan a zui ber Jadonang chu British in an man a, August 29, 1931-ah an khaihlum ta mai a.Jadonang thih hnuah hian Gaidinliu chu British lak helna chu a kal chhoh pui zel a. British lam pawhin an ngaimawh chho ta hle a, Gaidinliu man thei apiang hnenah Rs. 500/- pek an tiam ta ngawt a. A tawpah October 17, 1932 khan Poilwa (Pulomi) khua (tuna Nagaland) ah an man a, damchhung lung In tang turin an ti ta a. Hetih lai hian kum 16 mi chauh a ni. Pandit Jawaharlal Nehru khan Shillong Jail-ah kum 1937 khan a tlawh a, Gaidinliu chu a ngaisang hle a, ‘daughter of the Hills’ ti a kovin “Rani Gaidinliu” or Queen of her people’ nihna a pe ta hial a ni. Kum 14 zet Guwahati, Aizawl, Tura, Shillong leh hmun dang Jail-ah te a tang kual a, kum 1947-a India in Independence a hmuh khan chhuah zalen a ni ta a ni. Jawaharlal Nehru chuan a chungchang thu hi kum 1932 khan tihian a sawi a,” Rani hnathawh hi India ram mipui ten an hriatrengna ni tur leh an chawimawi hun a la her chhuak ngei ang”( a day will come when India also will remember her and cherish her).
Ani bakah hian Amal Probha Das, Pushap Lata Das leh Anna Barua te hi Quit India Movement laia Assam leh a chhehvel a hmeichhiate huikhawm tu leh kaihruai tute an ni. Keini mizo te zingah pawh sawi hmaih hauh loh tur chu Lalnu Ropuiliani kha a ni. A huaisen zia leh mahni ramchhan tur a thih thlenga a tan ngam dan te kan hria a. Sapho/ram dangmi a huatna a lantir mai bakah khan Mizo hnam a dah chungnun zia leh a zah pui loh zia te pawh kan hre thei awm e. India zalenna sualna kawngah hian hmeichhiate thawh(contribution) hi a sang in a ropui hle a. Hun thenkhatah chuan mipa ten an hnung zui chang te pawh a awm thin. Hmeichhe pawl hrang hrang - All India Women’s Conference, Mahila Stra Raksha Samiti( Women’s Self Protection Society) etc. te pawh din a ni bawk. A huaisen zawk leh a hnarkaitu a an tan chang a tam awm e.