Tute nge? Eng vang nge?

"Mizo zingah mahni intihlum an tam sawt hle a, mahni intihlum kher lo, dam thlahlel chuang lo pawh an tam. Ka ngaihtuah mai mai thin a, kum 5 hnu-ah chuan Mizo thalaite zingah mahni intihlum leh dam thlahlel lo mi beidawng hi an tam tawh awm ange, ka ti thin," tiin Dr Zawmsanga Sailo, NELICS general secretary chuan Zozam Weekly a hrilh.

NELICS (New Life Charity Society) hi NGO a ni a, nun beidawng, dam thlahlel lote chhan tuma beitu pawl an ni.

September ni 10, 2009 atang khan a duh apiangte tana dawr theih turin an inhawng a, pantu an thahnem sawt hle. An chhinchhiah dan chuan, nikum September ni 10 atanga December ni 31 thleng khan mahni intihhlum tum mi 67 an chhan hman a, kumin APril ni 10 thleng khan mi 49 an chhan tawh.

Kuminah hian pantu an ngah hle; mi 400 chuang an chhan tawh tiin a sawi theih ang.

Dam thlahlel lo, mahni intihhlum rilruk, NELICS pantute hi chi thumin an then a, mahni ngei kala an hnen pan, hmaichhana an kawm mi 70, phone call hmanga an hnena mahni harsatna thlentu mi 243, sms hmanga mahni harsatna thlentu 200 vel kuminah an nei tawh a ni.

"Mi hi kan inang lo a, a then chuan mahni ngei rawn kal an duh a, a then chuan phone hmanga min rawn biak an duh a, a then erawh chuan sms lo chu an hmang ngam lo," Dr Zawmsanga Sailo, psychologist chuan a ti.

"Hmaichhana inkawm te, phone call hmanga inkawm te chu a tih theih mai a, sms hmanga counselling tih erawh a hautak khawp mai," a ti bawk.

"Hetia sms-a in rawn betute hi chuan call an duh lo a, call chi an ni lo, sms hmanga biak ngat ngat a ngai," a ti.

"Kan hnena rawn tlulut zingah thalai an tam a, mipa aiin hmeichhia an tam zawk. Hmeichhia hi za zela 80 an tling hial ang," tiin a sawi a, hmeichhia an tam zawk chhan an hriat bik loh thu a sawi a, mipa aiin hmeichhiain harsatna tawrh an chak zawk nia a rin thu a sawi.

Mizom nunphungah hmeichhia chu in chhungkhurah mawhphurhna an ngah a, han hauh deuh te pawh an tawng zing a, chuvang chuan mipa aiin hmeichhia tawrh a fei zawk niin an ring a ni.

"Dam thlakhlelh loh vanga kan hnena rawn kalte leh phone leh sms hmanga min rawn betute zingah maltlat kan tih ang chi, midang zinga awm lova mahnia awm melh melh chi an tam," tiin an dinhmun a sawi.

"Mahni inngai ropui, midang ngaisang bik lo, mahse mahni theihna hmang tak tak chuang lo an tam a, mahni khawvel zim taka khawsa an tam," a ti bawk.

An hnen pantute hian midang an ngaisang lo a, ngaihsan an nei lo mai ni lovin, rin pawh an nei lo niin a sawi.

"Kohhran hruaitute emaw tlawmngai pawl hruaitute emaw pawh an ngaisang lo a, tin, an ring bik lo a. 'Mahni intihlum tamna society nih a zahthlak' tia sawi an awm thin a, kei chuan kan inhmeh ka ti. Kan society hi a buai a, a fel lo a, corruption a nasa a, uar taka sawi phei chuan 'tu hi nge corrupt lo?' te pawh a tih theih hial ang. Chutiang khawvelah chuan kan thalaite hi an mangang a, an beidawng a ni," Dr Zawmsanga Sailo chuan a ti.

Lehkhathiam rual inkawm pawhin "hmanlai kha la ni se aw" an ti vawng vawng thin nia sawiin, unemployment problem-in thalaite a timangang niin a sawi a, "Chutah hna hmu tur chuan sawipuitu nei tha nih a ngai tih te an hriat dan a ni leh zel a, a buaithlak khawp mai," a ti bawk.

"Kan rin ve tak takte'n an eiruk thu kan han hria a, chutiang chu hriat tur a tam hle a, chutiang khawvelah chuan hausa tawh phawt eiru tur te'n an ring a, ngaihhlut tur, rin tur an tlachham a, kan thalaite'n harsatna an tawk ta niin ka hria," a ti a, "Kan ni tin nun danah hian thil dik lo a tam a ni. He thil hi sutkian a tul khawp mai," tiin thalai beidawng an kawm atanga ngaihdan a siam thu a sawi.

Thalaite'n harsatna an dawl lo a, an tawrh a fei lo niin a sawi bawk.

"Nu leh pate'n kan fate kan induatsiak a, chutiang fate chuan harsatna an hmachhawn ngam lo a, an thiam hek lo, mahni kawng an su kaw zo lo," a ti.

Tun hnaia inawhhlum tum an chhan hman pakhat chanchin sawiin, "Motor a ni emaw, thil dang pawh ni se a pain a duh duh a leisak theihah a inngai tlat a, a pain chutiang a lo tlin bik si lo a, duat loh niin a inhre ta a ni," a ti a, chutiang chu an tawng hnem niin a sawi nghe nghe.

"Sual ni lo, mize dam lo Mizo zingah an tam. Hei hi tihdam a ngai a, inpuih a ngai khawp mai," a ti.

Pawisa vanga mangang leh beidawng an tam tih pawh a sawi a, a pung awma pawisa puktir emaw mi pawisa puk emaw, loan la emaw, a let leh dawng ta si lova mangang an tam tih a sawi a, chutiang zingah chuan nu an tam tih a sawi bawk.

"Kan bulah mi beidawng, mahni intihhlum hial duh an lo awm reng mai thei; hei hi kan ngaihtuah a ngai a, kan khawsakhonaah hrim hrim hian inngaihsak a tul. Na deuh deuha intih te hi ching lo ila, fimkhur takin i khawsaho ang u, kan zavaia mawhphurhna a ni," tiin psychiatrist Dr C Lalhrekima chuan Zozam Weekly a hrilh.

"Mahni intihlum duh khawpa beidawngte hi enkawl an ngai a, heti lama inzir deuh deuh kan mamawh. Mahni intihlumte hi depression vang a ni mai a, chu rilru natna chu mi tam takin an nei a, enkawl dam theih a ni. A enkawlna lamah hian tanlak a ngai," a ti.

Mizo zingah miin depression an neih chhan sawiin, "An nunah harsatna an tawk a, chu chu an hmachhawn thiam ta lo a. Tin, rilru zirmite leh anmahni pui theitute pan nachang kan la hre tawk lo a, chumi tura inzirtir chu a ngai a ni," a ti.

"Harsatna tawk lem lo pawhin depression hi an nei thei tho; entirnan- zunthlum te pawh miin an nei mai a, chutiang deuh chuan mihringah depression a rawn awm ve tawp thei. Thluak lam chak loh vang, chemical a in-balance loh vang te a ni thei. Engpawhnise, hetiang natna hi kan la hrethiam tawk lo a, a thiamte pan hi zah-a la lo tura inzirtir kan ngai," a ti bawk.

Related Posts :