Mizo website-ah sex video? Synod thu leh hla a rintlak em?

Mizoram Kohhran lian ber chu Presbyeterian kohhran a ni a, an thu leh hla pawhin mipui rilru sukthlek a her danglam thei nia ngaih a ni.

Synod Social Front-in August ni 26, 2010-a ‘Seminar-cum-workshop on Sex Video and pornography’ an huaihawt tuma an thu leh hla erawhin inhnialna a chawk tho.

Synod Social Front huaihawtin Synod Conference Hall Sikulpuikawnah Seminar-cum-workshop on Sex Video and Pronography neih a ni a, he zirhonaah hian mi 242 an tel. Aizawl khawpui KTP Branch tin sawm an ni.

He hunah hian Synod Social Front-in saruak thlalak leh sex video chungchang leh call girl chungchang an zirchianna (research) te ngaihthlak a ni a, Synod Social Front kamchhuak a nih avangin mite’n an ngaihven hle.

He workshop-ah hian paper pathum zirho a ni a, a vai hian mipat hmeichhiana kaihhnawh lam vek a ni.

Inhnialna chawkchhuaktu ber chu ‘Aizawl |halaite Zinga Sex Hluar Dan Chhuichianna’ tih a ni.

“Mizo sex video leh saruak thlalak te hi Internet-a dowload theihin website www.maxwebber.com leh www.alexfender.com ah dah vek a ni. He website hi USA lam atanga operate a ni a, a neitu pawh sap a ni. Hei hi open source a ni a, he website a in-register te tan chuan upload leh download hi a tih reng theih a, in-register erawh chu a har hle,” tiin chu paper-ah chuan a inziak.

“Co-ordinator-in ama hming leh e-mail address dik taka luh a tum a, an block list-a an lo telh avangin a lut thei lo a. Hemi avang hian website hi Mizo ta a ni mai ang tih chu zawhna awm thei tak a ni. Police leh thuneitu dangte’n he website hi control pawh tum ni se, USA lam atanga tih a nih avangin, Indian Cyber Law in a huam lo a ni, tiin dan hre mite chuan an sawi,” tiin an ziak bawk.

Alexxfender.com neitu hi USA-a hnathawka awm, Mizo tlangval Zothansanga a ni a, chu chuan sawi zui a hlawh ta a ni.

He website administrator zinga pakhat chuan zirchiang tawk lova thil tia a ngaih thu sawiin, “Alexxfender.com-ah hian tu pawh an in-register thei. In-register thei lo an awm kan la hre lo a, kawhmawh bawl tak an awm chuan an IP address kan dang thei. An IP address pawh lo dang ta ila hmun dang atangin an la lut leh thei tho,” tiin a sawi.

“Website-ah duh duh sawina leh thu post te comment-na tur kan siam a, chutah chuan a then chuan links pawh an pe a ni thei. Chutiang zawng zawng chu khawi website-ah pawh a awm tluk a ni,” a ti.

Hetih lai Alexxfender.com website siamtu chuan www.lawrkhawm.com-ah heti hian a website chu finfiah a ngam thu a rawn ziak.

"AF.Com server/hosting FTP access ka pe dawn em ni? Folder zawng zawng pawh hai vek se, Mizo Sex Video Clip leh picture pakhat te mah an hmu lo ang!" a ti.

"Synod Social Front thil zirchian hi a ril teh chiam lo. Material an nei tha tawk lo tih an paper present atangin a lang thei a. Chutih rual erawh chuan mipui mimir hriatsa, thil thar a awm lo," tiin chanchinbumi pakhat chuan a sawi.

"Sex video chungchang an ziahna phei chu ngaihtuah zui tham tak a ni. Nupa khawsa lai pahnih awm anga an ziah pawh chu ai chuan a tam a, titi-a veng pakhat nupa sex video chungchang hre vea thutlukna siam ta mai an ang. An hmuh chin zawng an zir a nih hmel a, chuti a nih chuan sawisel theih pawh a ni lo a," a ti bawk.

"Camera pangngaia midangin an laksak hi chu hmuh theih chinah video clip pahnih a awm," paper-ah hian an ti a, pakhat zawk phei chu Manipur lam nula nia hriat a nih thu leh mihur tih ang chi niin a lang, an ti bawk.

"Social Front meuhin branch tin te kohkhawma workshop neih nana paper present atan chuan duhthu a sam lo hle a, material an khawn ngah tawk lo a, an research neih hun chhung a tawi bawk a, zirbelh tur aiin hriatsa a tam zawk bawk," NGO-a thawk pakhat chuan a ti.

He research paper-ah hian 'niin a lang' tih ang vela ziah a awm nual a, hei hian sawi zui a hlawh ang reng.

"He zirchianna hi a that viau laiin a funkim lo a, research methodology a tha tawklo viau mai. He research in a hmuh hmaih emaw a tarlan loh chu khawtlang nun chhiain a nghawng zawk a ni. Chu chu Kohhran leh ram hruaitute inenletna ber tur zawk a ni," social worker pakhat chuan a ti.

He paper-a Mizo sex video awmna website nia sawi- www.maxxwebber.com chu website awm lo a ni.

"Mizo sex video leh saruak thlalakte hi internet-a download theihin website, www.maxxwebber.com leh www.Alexxfender.com-ah dah vek a ni," paper chuan a ti a, www.Alexxfender.com-ah hian chutiang hmuh tur a awm lo. Tin, www.maxxwebber.com hi tarlan tawh angin website awm lo a ni bawk.

Hetianga Synod Social Front programme-ah meuh a lan takah hian, seminar-cum-workshop neih hnuah www.Alexxander.com-ah hian inziaklut (in-register) an pung hluai a, in-register a theih leh theih loh test duh leh Mizo sex video a awm leh awm loh hre duh an ni mai thei.

"Hetianga in-register theih lohna website nia an sawi avang hian ka'n ti ve chhin a, a lo theih reng si a," tiin inziaklut thar pakhat chuan a sawi.

He seminar-cum-workshop hian ngaihven a hlawh hle a, a bikin internet hmangtute'n an ngaihvenin an khel zui lehzual niin a lang. Paper te'n fak a hlawh rualin, a dik lo thenkhat hi a dik loh dan a pawi theih deuh avangin thenkhat chuan an khel zui ta deuh nia sawi a ni.

Related Posts :