Chhantu ka ngai, puitu ka ngai...

Ka nu leh pa, ka ute leh thenawmte chungah thlengin ka lawm lo. An chunga lawm lo nih hi dik ka ti lo a, lawm hram hram ka tum thin. Mahse, ka natna hi an hrethiam lo a, a chang phei chuan tiderah min puh a, thatchhiat vangah te min puh a, ka rilru hi a na ngawih ngawih," tiin nula pakhat, depression (rilru lam natna) tuar mek chuan a sawi.

He nula hian dam a thlahlel lo a, intihhlum a ngam chiah si lo. Vawi hnih emaw chu muthilhna damdawi tam tawk eia harh leh tawh lo tura muthilh a tum tawh. A vawi khatnaah chuan a neih zawng zawng a ei a, mahse, a lo ngah tawk lo a ni mai thei, a harh leh. A vawi hnihnaah chuan ei a tum laiin a pindanah a thiante an lut a, a ei thei ta lo.

"A hnu-ah chuan ka inchhir a, khatiang ka lo ti kha ka inchhir. Mahse, a hnu-ah tih duhna rilru ka pu leh tho," chu nula chuan a ti.

Mipain mipathmeichhiatna hmanpui tumin an 'fight' tawh thin a, amah beiseitu pakhat phei chu an thenawm tlangval a ni.

"U ena ka en a ni a, ani leh zelin khatianga min ti kha mak ti a, ka ngaihtuah let chang pawhin ka la khur thin," a ti.

"Ka chhungte'n hnathawh peih loh vangah te min puh a, ka chak ber chu lehkha zir zawh thuai thuaia hna neih a ni. Mahse, lehkha zir zo ila hna ka hmuh ka ring chuang si lo. Theihtawp chhuaha zir tum thin mah ila hetiang natna nei chunga lehkha zir chu a har khawp mai," tiin a dinhmun a sawi.

"Khawvelah hian thlakhlelh ka nei lo a, mahse, thih hi ka ngam lo, hremhnun ka hlau. Mahse, rilru hah zual lai chuan hremhmun pawh ka hlau lo thin," a ti bawk.

Zozam Weekly-in a hriatchian nula pakhat, dam thlahlel lo chuan: "Khawvelah hian dam chhan awmin ka hre lo a, tuna ka awm dan anga awm zel hi ka ngam lo a ni," a ti.

He nula hi nula hmeltha tak a ni a, eizawnna lamah pawh sorkar hna tha tak vuan a ni. Rilru lamah harsatna nasa tak a tawk a, dam a thlahlel lo tih hi a thian thate ngei pawhin an hre lo a, a chhungte meuh paw'n an hre lo.

"Ka hnaah ka hlim thlawt lo. Pute tilawm thiam thiam an tlatlum ni berin ka hria," tiin a hnaa a hlim loh chhan a sawi.

"Pute thilsual tihah kan tel zel a, pawisa an thamnaah pawh a thuptu mai ni lo, a tihpuitu-ah ka tang fo. Ka thil tih hi a dik lo a, sual a ni tih ka hria. Mahse, ka hnial ngam si lo a, hre kur chungin thilsual ka ti fo a, ka inthiam thei lo. Tumah tak tak hi vanram an kai pawh ka ring lo thin," tiin a sawi zawm a ni.

"Chutah insawi neuh neuh a lo awm a, pute tilawm thiam thiam an tlatlum a ni mai a, mahni nawmna tur a nih chuan thiante rel te a lo ngai a," a ti a, "Kum 3 vel liam taa ka thil tihdik loh thleng vawi khat pawh an lo sawichhuak a, chu phei chu hna thil pawh a ni lo, mimal thil tak tak a ni a, chutiang te han tawn han tawn chuan rilru hi a na ngawih ngawih mai a ni," a ti bawk.

2006 vel atang khan Mizoram-ah mahni intihlum an tam sawt hle nia hriat a ni a, 2009 kum chawhnu lamah phei kha chuan tualchhung chanchinbu lamah pawh mahni intihlum an awm thu chhiar tur a tam viau. Nikum August thlaah phei kha chuan Aizawl-ah ringawt mahni intihlum 8 zet an awm a nih kha.

Aizawl SP Lalbiakthanga Khiangte chuan kumin chhunga Aizawl District-a mahni intihlum zat a chhinchhiah zel a, kuminah mi 37 an intihlum tawh tiin a chhinchhiah.

Kumin January ni 1 atanga April 19 thlengin Aizawl District-ah ringawt mahni intihlum mi 16 an awm hman. Nikum khan mahni intihlum an tam thu khan sawi a hlawh viau na a, kumin ngaihtuah chuan a lo nasa vak lo niin a lang; nikumah kha chuan Mizoram pumah January atanga July thlengin mi 16 an intihlum a, kuminah chuan April ni 19-ah Aizawl District bikah ringawt pawh mi 16 an intihlum hman!