Zofate Parliament tur a ding dawn ta

"Hmakhawsang atangin Zofate hi Siamtu Pathianin hnama a din, ram luahchin fel tak nei, mahnia inawpna leh rorelna nei thin leh hnam nunphung mumal tak nei kan ni. Kum 1890 atangin Sapho thuhnuaiah kan awm a. Rorelna atana remchang zawka ngaih a nih avang maiin ram bung thenhrang pathum: Burma, Bengal leh Assam awpna hnuaiah te thendarh kan ni a. Sapho tin hnuah, Burma, E.Pakistan leh India hnuaiah te thendarh kan nih phah zui ta zel a ni," tiin a thuhmahruaiah an ziak a, tiang hian an ziah zawm bawk...

"Kan inzawmkhawm lehna atan hmalakna hrang hrang pawh a lo awm tawh thin. Chung zinga a langsar zualte chu: Chin-Lushai Conference, Calcutta, 1892; Lakhipur Inkhawmpui 1946; Senvawn Inkhawmpui, 1948; Kawnpui (Churachandpur) Mizo Convention, 1965; Mizoram Zalenna Sual, 1966 leh Champhai Declaration & First World Zo Convention, 1988," tiin.

"Hengte bakah hian, Political party leh NGO hrang hrangte pawhin hma an lo la tawh thin bawk. NGO zinga mi, Zo Re-Unification Organisation (ZORO) hi kum 1991 atangin Zofate insuihkhawm lehna atan liau liauva din thar a ni a. Kum 1999 atangin UNO sutpui a lo bel pha ve ta nghe nghe a ni," tiin Zofate insuihkhawm theihnana hmalakna an tarlang a, chumi dawtah Zo Inpui a lo lang ta.

"UNO hmalakna kal zelah, kum 2007-ah chuan, mahni chenna ram leilung fa, tualchhuak hnamte tan an Pianpui Dikna Chanvo chungchangah UN General Assembly chuan THUPUAN (UN Declaration on the Rights of Indigenous Peoples, 2007) a lo siam ta hial a. He UN Thupuan zaizui hian, Zofate Insuihkhawm lehna tur chungchangah, Zo hnahthlak zawng zawngte huapzo ngei tur ZO INPUI (Traditional Institution) hi din a ngai ta a ni," tiin.

Zo Inpui chu India, Burma leh Bangladesh-a Zofate inpui tur a ni a, Zofate aiawha rorelna tur, Zofate parliament ve tur a ni. August ni 9-ah Mizoram larsap-in a hawng ang.

A tirin thu a awm
August ni 12, 2009-ah khan ZORO (Zo Re-Unification Organisation) huaihawtin I&PR Auditorium-ah Zo Inpui chungchang hi heti lam tuipuite'n an sawiho a, Zo Inpui din tha an ti tlang a, a hming atan Zo Inpui an pawm bawk.

R Zamawia kaihhruai sawihona hunah hian ZORO general secretary K Hawla Sailo chuan Zo Inpui chungchang a sawihawng a, mi hrang hrangin an ngaihdan an sawiho ta a ni. Thusawitute chuan Zo Inpui din hi tha an ti vek a, Zo Inpui tih pawm lo, Mizo Inpui tih thlang zawk pakhat a awm thung.

USA-a lehkha zir chhuak, H Thanglawra chuan sap thufing pakhat - 'Lean liberty is better than fat slavery' (Sal ni chunga thau kung ai chuan zalen taka cher a tha zawk) tih a sawichhuak a, putar a nih tawh avangin engmah ti thei lo mah se Zofate zalenna chuan a lung a la tihlen reng thu a sawi. Lok Sabha MP hlui Dr H Lallungmuana chuan hemi chungchang hi sawi zawmin, "Zalenna nei lo, tu te thuhnuaiah emaw, tu te thi awrhtirin emaw kan awm chuan kan awhawm theiin ka ring lo," a ti.

"Bawih ni chunga thau ai chuan zalen taka cher a tha zawk," tia sawiin MP hlui chuan, "Mahni ram chhungah pawh thunei thei lo, passport leh VISA tel lova inhmu thei lova thendarh kan ni," a ti a, UNO-in 'indigenous peoples' (a ram neitu dik) te tana hma a lak mek avangin rei lo teah Zofate ram thar a pian a beisei thu a sawi a, chumi atan chuan Zo Inpui din ngei tha a tih thu a sawi bawk.

September ni 13, 2007-ah khan UN General Assembly chuan a ram neitu dik, thendarh leh awpbeha awmte chhan nan thupuan an siam a, chu chu 'UN Declaration on the Rights of Indigenous Peoples' tih a ni. ZORO chuan hemi chungchangah hian tum engemaw zat UNO-ah palai intirin Zofate dinhmun an thlen tawh a, UN Declaration chu Zofate'n an chhawr ve ngei theih nan tha an thawh a ni.

"He Declaration hian UNO hian tualchhuak hnamte hi kan hnam rohlu, ram leh leilung hausakna te hi keimahni kutah a neitu nihna min pe a, humhalh leh chhawr tangkai pawh keimahni kut a ni," tiin ZORO general secretary Lalmuanpuia Punte chuan August ni 12, 2009-ah hian kalkhawmte hmaah a sawi.

ZORO president R Thangmawia chuan UNO dawra hma an laknaah India, Burma leh Bangladesh tea cheng Zofate thuchhuak sawilan a tul thin thu a sawi a, chutianga Zofa zawng zawngte insuihkhawmna pawl/rorelna hmun a awm loh avang chuan a buaithlak thin tih a sawi a, chuvang chuan Zo Inpui din hi an rel ta tih a sawi bawk.

ZORO huaihawt bawkin November ni 24, 2009-ah I&PR Auditorium-ah bawk hmun hrang hranga cheng Zofa zawng zawng huapa rorelna in tur din chungchang sawihona hun hman a ni leh a, kalkhawmte an lungrual hle.

Zo Inpui din tura hma la turin kalkhawmte chuan ZORO an ruat a, a kalphung tur pawh a theih ang anga inrawnkhawma duan ni an rel bawk. Kalkhawm zingah thalai leh upa lam an inpawlh tha hle a, mi langsar tak tak an awm nawk bawk.

Mizoram, Manipur, Assam, Tripura, Burma leh Bangladesh atangin he hunah hian Zofate an kalkhawm a, US-a inbengbel tawh, Lalthangliana Sailo a tel bawk.

Kalkhawmte hian Zo Inpui din tul an tih leh tih loh an sawiho a, din tul an tih thu an sawi vek. ZORO-in lo bawhzui se tiin an rel.

Hemi tuma sawihonaa thusawitu pakhat, Lalthangliana Sailo chuan 'UN Declaration on the Rights of Indigenous Peoples' chungchang sawiin, "Violence lova independence hmuhna kawng a awm a, mahni duh ang anga awm theihna UNO-in min pe niin a lang," a ti.

He huna khuallian, trade & commerce minister Lalrinliana Sailo chuan Look East Policy vangin inkalpawhna a tha ang a, lawngchawlhhmun thlengin Mizoramah a awm dawn tih a sawi a, chu chuan hmun hrang hranga Zohnahthlakte a pawhkhawm a rin thu a sawi.

"Chu'ng hunah chuan, tuna inhmu thei mang lo, Bangladesh-a kan unaute, Burma-a kan unaute, sea outlet kan neih chuan kan lo inhmu tawn zung zung thei ang a, Zohnathlakte insuihkhawmna hi a thleng dawnin a lang tlat," tiin minister chuan a beiseina a sawi a ni.

Zofate chanchin chhuitu hmingthang Dr Vumson-a fanu Bianca pawh Zo Inpui chungchang sawihonaah hian a tel a, thu sawiin, a pa-in 'Zo' chu a fate ai pawhin a buaipui zawk niin a sawi. Dr Vumson hi Sihzang (Chin Hills) chhuak a ni a, German mi nupui-ah neiin USA-ah a inbengbel a ni. Bianca hian a hming chu 'Mangkhamching' a nih thu sawiin, 'Nu-Mang' ti-a ko turin kalkhawmte hi a ngen nghe nghe.

Kalkhawmte chuan tiang hian resolution an pawm:

"Vawiin ni 25.11.2009-a I&PR Auditorium, Aizawl-a Zofate Inkhawmpuia lo kalte hian Zofa zawng zawngte hi thlah khat, unau, chhulkhat kual kan ni tih kan pawm a. Chutiang tak kan nih avang chuan khawvel hnam dangte ang bawka siamtu min ruatsak kan chanvo dik tak chu kan hnam hian a chan leh theih ngeina turin tualchhuak hnamte United Nations-in, kaihhruaina dan thar (UN Declaration on the Rights of Indigenous Peoples) a lo siam tawh zaizuiin ZO INPUI (Traditional Institution) din ni se kan ti.

"He ZO INPUI din dan tur kalhmang leh ruangam, Zofa zawng zawng huapzo tur chu, ZORO General Headquarters-in a tul anga phungbawm sawmin hma la nghal se kan ti," tiin.

Hei le Zo Inpui chu
November ni 25, 2009-a kalkhawmtute resolution chu ZORO chuan a bawhzui a, Zo Inpui kalphung tur pawh an duang fel ta.

Zo Inpui hi a in tur sak a la ni lo a, chu in chu sak a nih hunah rorelna hmun a ni ang. Rorelna in hi India parliament angin chhawng hniha kalpui a ni ang a, Tlangbawih In leh Zawlbuk te a awm ang. Tlangbawih In hi Rajya Sabha ang a ni ang a, Zawlbuk hi Lok Sabha ang a ni ang. Member tur hi mipui thlan tur a ni a, mahse,a tirah chuan inruat phawt a ni ang.

Zo Inpui hian Zofa zawng zawngte a huam ang. Zo hnahthlak chi leh kuang, chi peng leh chi tepeng zawng zawng tutemah inenhran leh inthlei bikna a awm lo ang. Zofa chi bil leh chi tepengte nunphung leh khawsak dan pi leh pute atanga lo chin than tawh thil thate chu humhim a, inzahtawn sak leh chawisan a ni ang.

Zo Inpui huam chin ram chu tiang hian then a ni rih ang: Zoram-Lai, Zoram-Khawchhak, Zoram-Khawthlang, Zoram-Chhim, Zoram-Hmar, Zoram-Chhimchhak leh Zoram-Hmarchhak.

Bial pasarihah hian rorelna in a awm ang a, Zo In tih a ni ang. Zo In chu rorelna sang ber dawttu, Hnam Inkhawmpui (National Assembly) dawttu a ni ang. Zo In member-te hi Roreltute/Executive Member an ni ang. Zo In hnuaiah hian a tul dan a zirin Zo Inpeng leh Zo Intepeng te pawh din theih a ni ang.

Zo Inpui Inkhaichhawn dan chu hetiang hi a ni ang:

(a) Hnam Inkhawmpui (National Assembly): Hei hi Zo Inpui inkaihhruaina leh inrelbawlna chungchanga thuneitu sang ber a ni ang a, a tul ang zela koh thin a ni ang.

(b) Roreltute Inkhawm (Executive Council): Hei hi thuneitu sang ber dawttu a ni ang a, Hnam Inkhawmpui remchan loh thulhah a aiawhtu a ni ang. A tul ang zela koh thin a ni ang a, Zo Inpui rorelna thu kal lam leh haw lam a thlir thin ang.

(c) Puipate Inkhawm (Office Bearers’ Meeting): Hei hi Zo Inpui kaihruaitu leh enkawltu bulpui ber a ni ang. Inrelbawlna leh thil tul apianga sulsutu tur a ni. A tul ang zelin hna thawktu HUANG BIK (Cell/Sub-Committee) leh DAN TESEP (Entirnan: Puipate leh Roreltute thlan dan te, Sum enkawlna chungchanga dan tulte leh thuneihna chin dan te) a siam thei ang. Puipa (office bearers) hi mi 6 an awm dawn a ni.

Tiang hian inkhaidiat dan hrang hrang awm mah se Tlangbawih In leh Zawlbuk te chu roreltu ber tur an ni.

Hmun hrang hranga darh ta Zofa zawng zawng Zo Inpui hian a huap ang a, thendarha awmte'n mahni pual ngeia mahni tana ro an rel theih nana UN duh dana din a ni.




Zo Inpui huam chin chu hmun 7-ah then a ni a, chung then pasarihte huam chin tur chu tiang hi a ni:

(i) Zoram-Lai: Aizawl, Lunglei, Lawngtlai, Saiha, Hnahthial, Serchhip, Champhai, Khawzawl, Saitual, Kolasib leh Mamit Bialte. (Bial 11)

(ii) Zoram-Khawchhak: Tonzang, Tiddim, Falam, Hakha, Thlantlang, Gangaw bialte. (Bial 6)

(iii) Zoram-Khawthlang: Jampui, Vawmsual, Longtoroi, Saisawm Sazai, Darchawi, Lukhuh leh Changpui bialte. (Bial 7)

(iv) Zoram-Chhim: Lemro, Sami, Matupi, Sekulh, Lailenpi, Hnaring, Rezua leh Paletwa Bialte. (Bial 8)

(v) Zoram-Chhimchhak: Pakhoku, Mindat, Minbu, Hteelin, pauk, kyaukhtu, Yaw, Zedouktara, Ngaphe, Ann, Salin, Seihphiu, Pwintphiu, Mindon, Minhla, Thayet leh Pyi bialte. (Bial 17)

(vi) Zoram-Hmar: Sadar, Kaihlam, Thanlawn, Chandel, Lamka, Tamenglong, More, Vangai, Ngaihban leh Khawbawn bialte. (Bial 10).

(vii) Zoram-Hmarchhak: Tahan, Khampat, Tamu, Somra Tracts, Myothit, Homalin, Sawngsup, Mawlaik, Kalewa (Runkhawm), Lahe, Layshi, Phongpyin, Kani, Mangkeng bialte. (Bial 14)

Related Posts :