Vawi Khat Inkawmna-ah Engtin Nge? - II

Kar hmasaa kan thu bawk khan i'n sawi zawm leh teh ang. Hnam dang tih dan angin in-date tih vel kan ching ve tan nachungin, Mizo society-ah tlangvalin nula a rim hi kan kalphung leh kan tih dan a ni a. Hei hi mi tam zawkin kan kalpui dan pawh a la nih rih avangin Mizo nula leh tlangval tam zawkte mitthla chungin kan sawi leh dawn a ni.

1. RILRU PEK: Inrim vawi khatna hi a pawimawh hle. I inlengpa / i nula rim chu i duh ve tak tak a ni tih a hriat theih nan rilru pe takin kawm tum ang che. Rilru pe lo deuha inkawm hi a nuam lo a, sawichhuah tur erawh chhawpchhuah thiam a tul. Kan sawi tawh ang khan vawi khatna a nih miau vangin nakin zel atana in hmalam hriltu a nih tlat vangin, i rilru in pek chu a ngai khawp.

2. KAWM NUAM NIH TUM LA: Mipa chuan hmeichhe kawm nuam tak hi an atchilh bur duh khawp mai. Chutiang bawkin mipa pawh kawm nuam tak a nih theih bawk. |awng zuah zuah erawh a fuh ber rih lo. Kawm nuam tih hian titi thiam te pawh a huam ang. Titi tur vawrh chhuah thiam hi thil pawimawh tak pakhat a ni.

3. INSAWI THEIH HI: Hei hi chu a hmei a pain, thil tha lo leh mawi lo a nih bakah, mipain an ngai thei lo a, hmeichhiain an ngai thei lo zual. Mipa insawi thei lutuk a fuh lo chiang. Khawvela kan awm chhung hian kan nih tur ang tawk tein, Siamtu hian min dah a. Mahni nih phak bak leh neih phak bak anga lan tum talh hi a fuh lo chiang mai. Sawi thui a ngai lo hei hi chu tihian a chiang mai awm e.

4. PHI CHUNG SUH: Inleng neih dawna phi chung chi hi awm ve theih a ni. A bikin nulate hetiangah hian fimkhur a pawimawh hle. Thenawm leh thian tha zawng zawng chumi khami chu a lo leng dawn tih emaw nizanah a lo leng tih ang chi zawng zawng hrilh nghal vek a fuh lo. Tunlai khawvelah chuan mobile phone te a awm ta bawk a, tlangvalin message a thawn zawng zawng, thiante hrilh nghal emaw chhiar tir emaw hi a fuh lo.

5.INSIT LUTUK SUH: Mipa tan pawh hmeichhe tan pawh, mahni tawkah in-reserved chin neih tur. Chutih rual chuan, insit lutuk vanga inkiltawih lutuk hi a fuh ber lo. Nihna anga lan chhuah tum a fuh, mahse vawi khat inkawmna erawh sawi tawh ang khan a tawk hriat a pawimawh khawp mai. Anni chu an chuti si a, kei engmah ka ni si lo tih boruak hi inpawh taka inkawmna daltu pakhat a ni ve thei tih theihnghilh ngai suh.

6. TAWNG TAM NGE TAWNG TLEM?: Vawi khat inkawmnaah chuan mipa emaw hmeichhia emaw tan pawh tawng zuah zuah a fuh loh bakah tawng sual palh a awlsam, chuvang chuan inven fimkhur a fuh. Sawi tur hriat loh luatah mi chanchin sawi vak pawh awl tak a ni. An laina hnai te kha i lo sawi chhe palh ve thei a nia. Sawi tur hriat loh vanga ngawih dun vang vang chang pawh a awm thei ang. Chungah mipa fel leh fing a lang chhuak thin. Titi tur sawi chhuah thiam a pawimawh a, remchang zawn thiam a pawimawh. Tawng tui laklawh a awm a, sawi tur neih ang zawng zawng leh mahni tui zawng sawi a, midang ngaihtuah miah lo a tawng vak vak a awm thei fimkhur a tha.

7. ZEI BON TOP: Nula thenkhat, inleng te bula chet zei tum luat vanga che chhe ta sawi tur an awm ang bawkin, tlangval pawh chutiang chuan a awm theih. Zei hi chu thil pek pkhat a ni ve tih hriat a tha, mi zawng zawng hnenah zeina hi pek an ni vek lo tih pawm la. I zei lohna lai tak pawh kha a rilru luah tlattu te pawh a ni ve thei a nia. Zei tak i nih pawhin insum rih deuh a pawi lo mai thei. I lo zei leh lutuk chuan ngaihthat loh rukna pawh a awm ve theih a nia. Awm dan leh chet dan chin tawk thiam hi a pawimawh hmasa a ni rih e.

Related Posts :