Mizoramah thlawhna tumhmun dang, A kawng erawh a biboh rih hle

Mizoram sorkarin chhimlama thlawhna tumhmun siam a tum chungchangah sawi neuh neuh a awm a, politics-a inbeihna hial a tling ta.

MNF-in an hun laiin bul an tan a, mahse, sorkar thar pian hnu-ah pawh a hmun tur a la chiang thei lo. Sorkar hmasain Saitluk rama airport siam a lo tum tawh chu PWD lamin an enfiah hnuah senso a sang dawn lutuk nia sawiin Lunglei District Airport Committee chuan hmun dang zawn an rel.

Thawnthu chu
MNF sorkar lai khan chhimlama thlawhna tumhmun siam tuma ruahman a ni a, District Airport Survey Committee pawh din a ni. Survey Commiuttee hian hmun hrang hrang an enkual hnuah Saitluk ram chu thlawhna tumhmun siamna atan hian tha ber dawna hriain Revenue Deptt lam chu a hmunhma enfiah tur hian an tir ta a ni.

Surveyor pakhat a riak lut a, a bak chu a hmuna en an awm awm hriat a ni lo. Chhimlama airport siam tumah hian khatih hun laia sports minister ZH Ropuia leh Wng. Cdr. J. Lalhmingliana te chu a phusa nasa ber zinga mi an ni.

Congress sorkar a pian hnuah chhimlama thlawhna tumhmun siam tur hian hmalak chhunzawm a ni a, Mizoram Assembly thutkhawm hnuhnung berah pawh Lunglei 'S' bialtu MLA, pParliamentary secretary S Laldingliana resolution putluh- Mizoram chhimlama thlawhna tumhmun siam tura hmalakna chungchang chu lungrual taka pass a ni.

Hetianga thlawhna tumhmun siam tuma hmalak chhunzawm a nih lai hian April ni 19, 2010 khan chief minister Lal Thanhawla chuan Lunglei Chanmari Hall lungphum a phumnaah Saitluk ramah aAirport siam theih a nih loh tur thu hi a puang ta a ni. Hei hian sawizui pawh a hlawh hle. April ni 23, 2010-a MNF Sub.Hqrs, Lunglei Office-a thusawitu MNF vice president Dr R Lalthangliana pawhin hemi chungchang hi sawichhuakin, Saitluk rama airport siam theih a nih loh thu chief minister-in a sawi chu pawi a tih thu a sawi.

“13th Finance Commission-ah Airport siamna atan hian Rs. vaibelchhe 250 an dil a, mahse an hmu lo a, hei vang hian an siam thei ta lo pawh a ni mai thei a ni,” tiin a sawi nghe nghe.

Saitluk rama airport siam a rem tak loh hnu-ah airport siamna tur hi hmun dang zawn chhunzawm a ni a, Lunglei leh Lawngtlai inkar, Mualcheng khaw bula Thlisam ram chu en a ni. Lunglei bul Kawmzawl chu en a ni bawk. Chhimlama airport siam tur chungchanga hmala turin Lunglei District Airport Committee din thar a ni bawk.

Lunglei District Airport Committee hi July ni 29, 2010 khan a vawi khatna atan Lunglei bawrhsap pisaah an thukhawm a, he hunah hian parliamentary secretary S Laldingliana, High Powered Committee for Lunglei District vice chairman Joseph Lalhimpuia leh aviation principal consultant Wng. Cdr. Lalzawma te pawh an tel.

He meeting-ah hian Saitluk ram enfiahtu PWD lam aiawhin SE Er. Bowman chuan Saitluk rama airport siam tur hi senso a sang hle dawn tiin a report. Tlang rawt a ngaih dawn bakah ruam hnawhkhah tur a tam hle dawn tih a sawi bawk.

"Saitlukah hian airport hi siam theih loh chu a ni lo, mahse senso a sang hle dawn a ni" a ti.

PWD lamin report an pek hnu hian Committee chuan, "Saitluk rama airport siam tum chu a hmunhmain a zir loh avangin tawpsan ni se an ti a. Airport siamna atan hian Kawmzawl leh Thlisam ramte en ni se" tiin an rel ta a ni.

S.Dinga vs Ropuia
He meeting-ah hian parliamentary secretary S Laldingliana chuan Saitluk rama airport siam tum chhunzawm a nih tak lohna chhan chu sorkar hmasa thil tih chhunzawm an duh loh vang a ni lo tiin a sawi. Sorkar hmasaa sports minister ZH Ropuia chu Saitluk ram hi uluk taka enpui a duh thu a sawi bawk.

Parliamentary secretary hian Congress sorkar chuan Saitluk rama airport siam tum chu chhunzawm a duh nia sawiin, Assembly House-ah pawh private member resolution hial pu lutin, an pass tih a sawi. Hetihlai hian PWD lamin an enfiah hnuah airport siamna tlak nia an hriat loh avangin loh theih lohna avangin chhuahsan a ngai ta niin a sawi.

Mithiamte report atanga a lan danin, Saitlukah hian airport siam pawh ni se thlawhna lian chi a tum thei dawn lo niin a sawi a, “Kawmzawl-a tum thei tur ang chi bak a tum thei dawn lo” tiin, minister hlui ZH Ropuia chu Saitluk ram enpuia sawm a duh thu a sawi bawk.

Parliamentary secretary-in Saitluk enpui tura a sawm chungchangah hian minister hlui ZH Ropuia chuan lawmawm a tih thu a sawi a, “Lunglei District hmasawnna atana project lian duan tawh hi a tihlamzuih zawnga hma la lo turin ka sawm let ve a ni,” a ti.

S Laldingliana’n Saitluk ram enpui tura a sawmna chu ZH.Ropuia chuan lawmawm a tih thu sawiin, “Remchangah en dun ngei tha ka ti,” a ti.

Hetih rual hian ramhnuai reng reng chu a hmuna en aiin satellite leh map atangin a chiang zawk nia sawiin, “Kal pawh ni ila, ramhnuai pik tak kar atang chuan engmah tak tak a hmuh theih ka ring lo,” a ti.

Ropuia chuan PWD lamin senso a sang dawn tih an sawi chu a pawm thlap thu a sawi a, “A hautak dawn an tih hi ka pawm thlap. Lengpui Airport ai pawha lian tura duan a ni a, a hautak reng ang chu,” a ti.

“Lengpui Airport pawh hi harsa taka siam a ni a, Mizoramah awlsam taka airport siamna tur hmun a awm lo hrim hrim,” a ti bawk.

Saitluk rama airport siam chu tha a la tih reng thu sawiin, “Midangte anga puten ‘aih’ an tih avanga ‘aih’ ti ve mai zel mi kan ni lo. Ka dinna ngaiah ka ding reng,” a ti a, “Saitluk rama airport siam tur hi Lengpui ai pawha KM 1-a sei zawk tura duan a nih bakah international standard tur a ni a, a hautak ngei ngei dawn tih chu kan hria. He project hi chhimlam mipuite hmasawnna tura project lian tham a ni a, he project lian tak mai hi a tihhlamzuih zawnga hma la lo turin ka sawm let ve a ni,” a ti a ni.

Kawmzawl leh Thlisam
Kawmzawl hi Lunglei bul lawka awm a ni. PWD lamin helai hmun hi an enfiah tawh nghe nghe a, an hmuh dan chuan Airport hi Km 1.35-a thui leh metre 50-a zauva siam theih a ni dawn a, runway hi metre 1310 vela sei a awm thei ang a, stop way metre 20 ve ve a awm thei ang.

Hetihlai hian Kawmzawlah hian mimal ram huan puitling 3 a awm bakah ram nei mi 44 vel an awm ni awma sawi a ni. Hei bakah hian Lunglei tuilakna GWSS chu sawn a ngai dawn a, hei hi hautak hle tura ngaih a ni.

PHE SE Er Lalnunzira chuan tui lakna atana a bik taka siam Electrical Resistance Wielded Pipe chu a hrana order a ngai dawn tih sawiin, tui lakna hi sawn a nih dawn chuan kawng pawh siam a ngai dawn tih a sawi.

PWD lamin a ram zau zawng tur an report hma chuan sum ngai zat tur hi hriat theih a la nih loh thu a sawi bawk.

Airport siam tum hian power line pawh a tibuai dawn a, 132kv line, 11kv line leh LT line te chu sawn a ngai dawn niin P&E SE Er. L Pachuau chuan a sawi.

Airport siamna atana enchhin dang- Thlisam ram hi Lunglei leh Lawngtlai inkar, Mualcheng khaw bula awm a ni a, kawng a tlang tha ve ve a nih chuan Lunglei aiin Lawngtlai lam atangin a hnai zawk dawn nia sawi a ni.

Helai hmun hi survey tum a ni a, survey-na atan pawh Rs. nuai 5 dah a ni tawh.

Ruahtui hul veleh PWD lamin feasibility survey neih an tum a, hetih lai hian he hmun panna tur km 1 1/2 vel chu laih a ngai dawn a. HPC fund atanga laih tum a ni.

Related Posts :