Lal pian hun lawmawm tak a thleng leh ta

Khua a vawt lo a, tlangsam a par hek lo. Zoram hmun dangah Krismas rim a nam lo a, zu pawh a hluar lo. Anni tan erawh "lal pian hun lawmawm tak" a thleng leh ta a, an tlaiin an puar ngei mai, Ziona piancham an lawm a ni.


An hotupa Ziona hi July ni 21, 1944-ah a piang a, a piancham hi an kohhran ni pawimawh, kum tina an lawm thin a ni.

"Kum tluana kan nghahfak a ni a, Masi leh Kumthar ai pawhin kan nghakhlel zawk, kan hun pawimawh a ni," tiin Ziona nupui hmasa ber Zathiangi chuan Zozam Weekly a hrilh.

Kum dang ang bawkin kuminah pawh 'hotupa' piancham hi an lawm a, bawng 1, vawk 3 leh kel 1 an talh a, ar Kg 45 sangha Kg engemaw zat nen, ruai Baktawng Tlangnuam-a Ziona pawlte chuan ruai an theh mup mup mai.

Zing dar 4:45-ah khawlaiah Sunday School (Beginer atanga Senior deptt. thlengin) naupang an chhuakkhawm a, lawmthu sawia an tawngtai hnu-ah hla sa chungin biak in an pan ta a ni. Biak inah chuan an khat hmur a, an inkhawm pawh an hlimin an tui hle.

Inkhawm banah kawtah Ziona a ding a, a duh apiangin lawmpuina chibai an buk ta a ni. Mi 2000 chuangin chibai an buk a, lawmpuina thilpek an hlan deuh zel bawk. |um khata mi chibai buk hnem pawl, a khawvel huap pawhin a ni mai thei e.

Chawhma dar 10:50-ah an hmunpui pakhat- Chhuan Thar Stadium-ah an pungkhawm leh a, an thahnem ngang mai. Chhuan Thar Stadium chu anmahni kutchhuak liau liau, khawtlangin hnatlanga an siam a ni a, tha leh zung pawh an seng hnem ngang mai.

Chu stadium-ah chuan "Hotupa" Ziona piancham lawm nan khuangpui leh darkhuang vawi 12 ve ve an vua a, an lam mup mup bawk.

"Vawi 12 kan vuak chhan chu 12 kan dah pawimawh vang a ni a, Isua zirtir neih zat chiah a ni," tiin an pawl hruaitu pakhat chuan vawi 12 kher an vuak chhan hi a sawi.

Chumi zawhah nu leh nula an lam mup mup a, an lam zawhah pa leh tlangvalin an rawn lam ve leh. A dawt leh chu sikul naupang parade hun a ni. Naupangte hian mual laiah arsi lem mawi takin an siam a, mipuiin an hlut hle.

An pawl hian arsi hi an tuipui hle a, Ziona in bula Chana thlanlungah pawh an arsi tuipuizia chu a hmuh theih.

"Nunhlui kawnga min hruaitu star ropui chuan a mite chenna planet min herliamsan ta," tiin chu thlanlungah chuan an ziak kalh a ni.

Chhuan Thar Stadium-a hun an hman hnu-ah ruai an theh a, ruai hi changel hnahah ngat a ni an kil ni. 'Zo' tuipuitute an ni a, "Mizovin hnahah ni lo ruai kan theh ngai hlei nem," tih chu an thu rolum a ni.

"Nuam kan ti a, kan hlim em em a ni. Kan hun pawimawh a ni a, amah (Ziona) hi Pathian mi-ruat a nih avangin a piancham hi kan ngai pawimawh a ni," tiin Ziona nupui pakhat chuan a pasal piancham an lawm thin chhan a sawi.

Ziona piancham hi ni hnih an lawm thin a, July ni 21 leh ni 22-ah an lawm thin. Thlarau thawh dan a zirin a tukah pawh an nawn leh thin. 2008 atang khan tih dan an nei a, a ni khatna- ni 21-ah ruai hi Ziona te chhungin an tum a, ni 22-ah chuan kohhranin a tum thin. Chumi hnu-ah an nawn a nih chuan mi inphalte'n 'a thawh' dan a zirin an vawmkhawm mai thin.

A ni hnihnaah hian bawng 2, vawk 2 leh sa dang an talh a, puar eleuhin ruai an theh leh. A ni hnihna an nghahhlelh chhan ber thin chu khuallam a ni. 'Khuallampui' an ti deuh kher a, pi leh pute tih dan dik takin an lam thin tih chu an sawi dan, ropui an tih chhan ber pawh a ni. Kuminah hian ruah sur hnuaiah mi 200 rual an lam a, Chhuan Thar Stadium chirhdiak kara an han lam per chhuai chhuai mai chu hahipin an sawi!

"Kan pawl hi ruahin min dal ngai lo a, hotupa piancham kan lawm ni pawhin ruah sur mah se ruah sur hnuaiah inpe takin kan lam thei tho. Kan lam dan hi tihdanglam loh, kan pi leh pute tih dan dik tak a nih avangin pawn lammi pawhin hmuhnawm an ti thin," tiin an zinga pakhat chuan a sawi.

Amah Ziona pawh a lawm hle a, nuam ti takin a mite zingah a tel ve. Mahse, a piancham lawmnaah hian thu a sawi lo.

"Stadium-ah emaw biak in-ah emaw kan hotupa hian thu a sawi lo a, kum dangah pawh thu hi a sawi ngai lo hrim hrim. Kohhran inkhawmah pawh thu a sawi ngai lo," tiin an hruaitu pakhat C Lalrinthanga chuan a sawi.

"Kham lo takin hun kan hmang a, a tukah nawn kan tum a, amah kan hotupa pawh kan hrilh vek tawh a, mahse kan pawlah chhiattawk an awm avangin kan nawn thei ta lo. Kumin chu kan nawn ta lo a nih hi," a ti bawk.

He pawl hi Hmawngkawn khuaa intan a ni a, 'Khuangtuaha Pawl' tia hriat thin an ni. An rinna a dan deuh avangin Hmawngkawn khua atanga hnawhchhuah an ni a, ramhnuaiah bu an khuar a, chu chu June 12, 1942 daih tawh kha a ni.

Ramhnuaiah chuan bawkte sain harsa takin khawsak an sual a, chumi hriatreng nan chuan tun thlengin Bawkte Kut an hmang thin.

Kum tin thupui neiin football tournament tum hnih an nei thin; am tournament hi a pui thin khawp mai a, thla khat zet an khelh tum te pawh a awm.

December thlaah ‘Thil siamte hun chan’ tournament an nei a, rannungte tihnat loh hun, rannung duat tura inzirtirna hun a ni. Chu tournament-ah chuan vakulte pawh a inlar thin niin an sawi. Tournament pakhat dang chu ‘Pindan lehlamte hun chan’ a ni a, Febraury ni 6-ah an nei thin. Hei hi anmahni pawl chauh ni lo mitthi tawh hrim hrimte hriatrengna pual a ni.

'Trinity' an ring a, Krismas leh Kumthar pawh an lawm thin. Mahse, an hotupa Ziona piancham chu an hunpui ber, an nghahhlelh ber a ni.

Related Posts :