Chanchin Maksak 84

Scientist tlan kual ziai ziai!
French scientist hmingthang, science of electrodynamics dintu ti hiala sawi thin, Andre Marie Ampere (1775-1836) kha pa haihawt zet mai a ni a, chanchin sawi tur pawh a ngah viau mai.

Vawi khat chu, Paris khawpuia academy pakhatah meeting pawimawha tel turin Ampere-a hi a thawkchuak a, tawlailir-a a chuan lai chuan ngaihdan thar a ngaihtuah chhuak hlauh mai. A theihnghilh ang tih hlauvin a thil ngaihtuah chhuah thar chu tawlailir pangah chuan ziakin a chhinchhiah a, a thiante hrilh hlan a nghakhlel hle.

Tawlailirpu chu chuan man a pe a, meeting neihna turah chuan a tlanlut nghal. Mahse, a'n sawi dawn a, a chhinchhiahna kha a lo tlanliam daih tawh tih a hrechhuak. Ampere-a mangang chu a tlanchhuak a, Paris khawlaiah chuan a chuanna tawlailir zawngin a tlankual ta ziai ziai mai a!


Infiampui tur
Scientist hmingthang Albert Einstein-a kha, kum hnih leh a chanve a nihin a farnu Maja Winteler-Einstein-i a piang a, a chhungte chuan, "Infiampui tur i nei dawn ta," tiin hlim takin an hrilh a ni awm e.

Enstein-a chuan a nau chu a en vung vung a, "Mahse, a ke hi a lir thei si lo a!" a ti huh!