World Second Best Fighter record Zo tlangval

January thla daih tawh kha a ni a, Almaty, Kazakhstan-a World Absolute Fight Championship (WAFC) [Professional Division] an khelh tum khan Zo tlangval Mang Tombing chu World Second Best Fighter-ah thlan a ni a, “Indian Tiger” tih a ni nghe nghe. A then chuan 'fighting machine' te pawh an ti bawk.


He tlangval, fahrah enkawlna ina seilian tan hian martial arts-ah na na na chuan thil huphurhawm a awm lo ti ila thu kan uar hran lo ang. Street fighter a ni a, tum 200 chuang zet street fight-ah hian tel tawhin vawi 11 chiah a la chak lo a ni.

"Ka hlawhtlinna leh lawmna te pawh ka tan chuan nunna thapna leh hlauhthawnnate a ni hial zawk," tiin a dinhmun a sawi.

Ring fight hi kum 20 a nih atangin a luhchilh ve a, vawi 39 zet tel tawhin a vawi khatnaah chuan chak lo mah se a hnulamah chuan a che tha viau a ni tih hai rual lo- 'Bruce Lee return', 'Panther' tih leh 'Swift' titein an sawi hial thin.

Martial arts all rounder a ni a, Muay-Thai, MMA leh K-1 ah te a tel thin bakah Tiger Fight Promotion hovin pawisa thapnaa inkhel turin an ruai thin.

International-ah a vawi khatna atan Asian Open Kick boxing Championship cup (Amateur Division) - January ni 9-11, 2004 (IG Stadium, Delhi)-ah telin gold 1 leh bronze 1 a la a, hemi tum hian Panther tia nick pek a ni.

Clash of the Champion-II, January 2005 (Durga International hotel, Nasik-a neih World Open Mixed Martial arts Free fight (Amateur Division)-ah gold pathum lain category awm zawng zawngah medal a la vek a ni a, “Swift” tia nick pek a ni.

April ni 17-18, 2007 khan Fravashi International Stadium, Maharastra-a neih Asian Open Muaythai & Mixed Marital Arts Championship (Professional Division)-ah tel lehin MMA leh Muaythai-ah lawmman a la leh a, “Bruce Lee return” tia nick pek a ni.

June ni 28-31, 2010-a Almaty Kazakhstan-a neih World Absolute Fight Championship (WAFC) (Professional Division) hi a khelh hnuhnun ber a ni a, hemi tum hi a ni World Second best fighter recorded nihna pek a niha “Indian Tiger” tia 'nick pek' a nih ni.

Manga hi a pa Pakanga chu NE Tlangnuam khawchhuak a ni a, khawsak awlsam zawk beisein Lamka-ah a pem a, chutah chuan Manga te unau pawh an piang a ni.

Manga te unau hi mipa panga an ni a, kum thum mi lek a nih laiin a nuin a tlanbosan avangin ani hi fahrah inah te a seilian ta a ni.

Hetiang hmuna a seilian leh nu leh pa kar lova seilian a ni hi a chhel phah hle niin Manga chuan a sawi thin.

Kum 7 mi a nihin martial arts hi a zir tan a, kum 15-ah blackbelt a ni. A hnu kum thumah master trainer a tling leh bawk.

American Jujutsu expert John Matulis hi a zirtir tawh a, Germany free style boxing champion thi Niko pawhin a hnenah thiamna pur a lo chaw tawh bawk. Eng tin tin emawa Bangalore a luh hnu-ah tunah chuan Delhi khawpui sir Gurgoan, Haryana-ah inbengbelin bodyguard, bouncer leh security agency-a thawkte hnenah training a pe thin.

"Mizoram hi la hmu ve lo mah ila min thlahtute avangin ka lung min len em em reng a ni. A tana eng emaw tih ve theih neih hi ka chak a ni," tiin Zozam Weekly a hrilh. Hemi chungchang hi amah kawmtu thuthar lakhawmtute hnenah pawh a lo sawi fo tawh nghe nghe.

Manga hian film lam luhchilh a tum a, a taka insual thin ngei hi film-ah insual se hmuhnawm bera a rin thu a sawi.

"Min tanpui tur an awm a, kawngte kan hmuh thei a nih chuan Hollywood chuan kan lung chu a len ber alawm," tiin hemi chungchang hi a sawi thin.