India leh MNF inremna chu

Mizo Accord sign laia Mizoram chief secretary, he inremnaa hming sign-tu pakhat Lalkhama chuan hetiang thil, Mizo history-a hmun pawimawh chang reng turah a tel ve chu lawmawm a ti a, mahse, a chhungthu erawhin a duhthu a sam lo thung. A buaipuitute hian constitution lama mithiamte leh danhremite an rawn lovin a hria.

Mizo Accord sign a nih laia Mizoram chief minister Lal Thanhawla pawhin remna siam a nih dawn khan MNF te khan thil an ngaihtuah tak tak lo nia a hriat thu a sawi ve bawk. Hawla hian July ni 6, 2007-ah khan a chenna inah thuthar lakhawmtute kawmin, ramri chungchangah pawh remna siam a nih dawn khan MNF te kha "tang tlat rawh u" an ti a, mahse, "an tang ngam chuang lo" tiin a sawi a ni.

Ramri chungchangah hian chief minister hlui Ch Chhunga committee din sawichhuakin, "Rev Zairema, B Punte te chuan Bagha piah daih thlengin ramri an claim a, remna ziah dawn khan he claim hi kan hmuchhuak leh a, chutih lai chuan remna thuthlung a hnai hle tawh a, kei chuan 'remna sign dawnin tang tlat ang che u, tun hun bak hi hun remchang a awm tawh lo, Zohnahthlakte chenna chin chu claim-in tang tlat ang che u' tiin ka chah a, Aizawl atangin he claimed map hi kengin kan hotute'n Delhi an pan a, mahse, remna ziah dawn khan an tang ngam leh ta chuang lo a ni," a ti.

Hawla chuan MNF te khan rawn haw thuai thuai an chak lutuk a, thil dang an ngaihtuah thei lo nia a hriat thu a sawi. Hawla hian June ni 28, 2008-ah a chenna inah vek thuthar lakhawmtute kawmin, Mizo Accord chu ILP tidaltu niin a sawi leh bawk.

MNF dintute zinga mi, ramhnuai sorkar-a defence minister leh defence secretary hna te lo chelhkawp thin, R Zamawia pawhin, "An ti mai mai a ang ka ti," tiin Mizo Accord chungchanga a ngaihdan Zozam Weekly a hrilh.

"Mithiam an rawn lo; khatiangah chuan, ka ngaihdan chuan, constitution thiammite leh legal expert te pawh rawn a ni a, mahse, chutiang an rawn lo," tia sawiin, "Rawn tur chu an hmu reng a, mahse, an rawn duh lo niin ka ring," a ti a, "Delhi lamah te pawh thurawn lakna tur chu an awm a, an awm tih pawh an hria ang, mahse, an rawn lo miau a... rawn haw thuai thuai kha an chak a ni ber ang chu..." a ti bawk.

Mizoram University-a political science zirtirtu Lallianchhunga pawhin, "Mizo Accord hi thil ropui tak a ni lo. |anchhan tlak tak tak pawh a ni lo," a ti.

"Mizoram tana thil tha hrang hrang chu a awm ngei a, mahse, he'ng hi state dangin an nei ve vek. Rammu lo leh Accord siam kher lohva neih theih vek a ni. State pangngaia awm tur ve reng an ziakkhawm a ni ber," tiin hemi chungchanga a ngaihdan Zozam Weekly a hrilh a ni.

"Central University neihna tur a inziak a, mahse, state dang pawhin Central University hi chu an nei fur tho. Hmarchhakah pawh a tam mai, State University tam tak Central University-ah an let zawk a ni. Chutiang a nih laia kan Central University lo chhuan viau te pawh hi mi nuih kan tiza ang tih a hlauhawm theihna lai pawh a awmin ka hria," a ti bawk.

"ILP chungchanga kan Peace Accord kan sawi ri chhen te pawh hi ngaihtuah chian deuh a ngaiin ka hria. ILP thiat turin sorkar laipuiin kan Assembly House a rawn tur thu tarlan a ni a, mahse, ILP hmanna state dangah pawh hetiang hi a ni tho. Sorkar laipui hian state Assembly hi chu a rawn a ngai ve reng reng. Chutah a tawngkama pawh hi 'rawn' tih a nia, kan Assembly House thu lova hlih a nih loh tur thu reng reng a inziak lo," tia sawiin, "State-a awm tur high court kan la nei lo a, Peace Accord nei lo state-te hi kan tluk lo ngar ngar zawk a ni ber," tiin a sawi a ni.

"Kan hre pha lutuk lo na a, a lan danah chuan, thil engemaw hlekah 'lo ti ve suh u, kan salu rawn hawn tur a nih kha' an ti zel a, chumi hnuah state pangngaia awm tur ve reng an rawn hawn ta a ni ber," a ti bawk.

Bualhranga pawhin hemi chungchang hi sawiin, "State status dik tak an rawn hawn a ni mai," tiin Zozam Weekly a hrilh ve bawk. "State pangngaia awm tur ve hrim hrim kha kan Accord-ah hian an ziak a, chu chu Mizo Accord kan tih chu a ni mai... a chiang reng alawm," a ti.

"India Contitution-a Sixth Schedule-ah hian Recognised Scheduled Tribe te enkawlna tur a awm vek a, chu leh he Accord-a inziak hi a thuhmun reng," tia sawiin, "A wording an tidanglam hret hret a, Sixth Schedule aia a special-na a awm lo reng reng. Nagaland-ah te chuan chutiang a ni ve lo a, an leilung hausaknaah pawh state-in thu an nei a, keini-ah chuan chutianga a special-na a awm lo. Full fledged state-a awm ve tur reng kha tarlan a ni," a ti bawk.

Dr JV Hluna chuan inremna siam a nih dawn khan a mawh latute'n thil an uluk lo nia a hriat thu sawiin, "A hma lawkin, August ni 14, 1985-ah Assam Accord an siam a, chutah chuan Economic Clause te, Foreigner chungchang te fel taka tarlan a ni a, kan Peace Accord-ah erawh economic a ni emaw, foreigner a ni emaw, chutiang engmah tarlan hran a ni lo. Ramri chungchangah pawh tanchhan tur fel tak kan nei a, British-ho hun laia mi engkim a 'clear cut'-in kan nei a, he'ng te hi lo sawiri hlek se chu a theih ang, ramri chinfelnan kan hmang thei ang," tiin Mizo Accord chungchanga a ngaihdan Zozam Weekly a hrilh.

"Economic lamah pawh hydel project te, national highway te, hmasawnna hna hrang hrang, India-in a thawha a peih hnua kan kuta a hlan mai dan tur te telhna chang kan hre lo," a ti bawk.

"A hma lawka Assam Accord ziah a nih avangin entawn tur tha tak kan nei," tia sawiin, "He Accord hi Delhi-ah DAVP-in copy 60,000 zet an chhu a, an tidarh vak mai a, kei pawhin Aizawl atangin ka lo nei ve a ni a, Delhi-a awm reng Pu Denga pawh khan a nei thei em em ang. Pu Tawnluia a lo haw a, Circuit House-ah a duh apiang tan interview theih a ni a, chutah pawh chuan hemi chungchangah hian lehkha ka thehlut a ni. Pu Denga hnenah lehkha sei tak ka thawn a, 'politics thilah chuan political adviser te in nei a, a dang hi ngaipawimawh hram teh u' ka ti a, mahse, chu'ng chu ngaih pawimawh a ni ta lo a nih hi. Pawi ka ti khawp mai," a ti bawk.

Accord hlawhtlin leh hlawhtlin loh chungchanga Zozam Weekly zawhna chu, "Remna kan siam a, silai kan tung a, kan ram a lo ralmuang ta hi a hlawhtlinna chu a ni. Chutih rual chuan he Accord-a inziak tihhlawhtlin kawngah erawh kan chak lo. Hei hi kei chuan state sorkar-in a ngaihpawimawh loh vang ni maiin ka hria. Central sorkar te khu chu... a awm muah mai a, state sorkar-in a nawr a ngai," tiin a chhang.

(Zozam Weekly Vol IV Issue No 44-a mi chhuah nawn a ni)

Related Posts :