Harsatna Leh Hringnun

Pa pakhat hian buhchium hi a chhar a. Chu buhchium atanga phengphehlep mawi tak lo chhuak lai chu hmuh a duh avangin inah a hawn ta a. Phengphehlep chuan a kawr chu a rawn tawn keh tan ta a, a tir te atang chuan ngun takin a lo thlir a. Phengphehlep lo chhuak turin harsa taka a kawr a rawn nawr chhe lai chu darkar engemaw zat thutchilhin a lo en reng a.

Te reuh te hian a tawn keh phawt a, a bei zui fat fat a, a taksa leng a tikaw tur chuan a bei nasa ngang mai. Rei fe hnuah a'n chawl leh vang vang a, a bei zui leh tauh tauh a. Theihtawp chhuahin tang mahse a taksa leng tur chuan a tikaw zo hleithei lo a.

Buhchium chhuahsan tura phengphehlepin a beih nasat zia a hmuh chuan a khawngaih ta riau mai a, tanpui a tum ta a. Bakcheh a la a, buhchium kawr chu a cheh kuak sak ta a. Tichuan awlsam takin phengphehlep chu a lo chhuak thei ta nghal a. Mahse, chu phengphehlep piang hlim taksa chu a bawrchhawrin a puam ul mai a, a thlate chu a chuar viau bawk.

Ngun takin a thlir zui zel a, a insiam rem ang a, a thlate chu a tipharh ang a, rei lo teah a thlawk mai dawnin a ring a ni. Mahse, chutiang chu a lo ni awzawng lo mai. Chu phengphehlep chu thlawk thei ziazang a ni lo a, chutih a hnekin a dam chhung tawi teah chuan a vak a vak a, a taksa puam ul mai chu thei leh thei loin a hnuk hrut hrut mai a. A thlawk thei lo hrim hrim a, a thla chuar tup mai te chu a chetvel tiharsatu leh hnawksak mai an ni ta zawk a ni.

Thil pawi ta ber mai chu kha pa'n lainatna vang leh hmanhmawh vanga a lo tanpui kha a ni. Phengphehlep khan buhchium chhung atanga kaw zim te a lo chhuah tuma a beih lai khan a taksaa tui leh hriak awmte kha rual takin thla-ahte a hnawih tur a ni a, a thla tihpharh a awlsam phah ang a, a taksa tan pawha tha tur a ni bawk. Tichuan a lo chhuah veleh awlsam leh nal zaihin a thlawk thei nghal dawn a lo ni.

Harsa taka thei leh thei lo a rei tak a beih hnuah chauh zalen takin a thlawk thei dawn tih hre lo a bakcheh nena a lo chhuahna kawng a lo siamsak avang khan phengphehlep piangsual a lo nih phah ta a ni. Harsatna leh thawhrimna tel lo hringnun chu a piangsual chawk reng a ni.

(Life Struggles tih lehlin a ni - Lalthlamuana Ralte)

Related Posts :