World Cup khel tur ramte leh Mizoram

Germany inzawmkhawm hma, West Germany leh East Germany an awm lai atang tawhin West Germany chuan football-ah Mizote tan a hlawh thei hle (East Germany hi chu World Cup-ah an reh deuh a). "Durtlang damdawi in an rawn pui nasa a..." tih te, "Protestant tamna a nia..." tih te chu World Cup laia tawngkam tlanglawn a ni thin.

Sakhuana vang niin a lang; Germany leh Mizoram hian engemaw ti takin inzawm riauna an nei a, Mizoramah German mi hmuh tur an awm fo reng a ni. Kum 10 chhunga (1999 atanga 2009) Mizoram tlawhtu foreigner zat, Foreigner Registration Office-a an chhinchhiah dan chuan German 194-in Mizoram an tlawh tawh a, mipa 124 leh hmeichhia 70 an ni.

Bastian Schweinsteiger-a te tam Germany hi Mizoram tlawhtu thawm tam ber 5-na an ni a, he ram atanga Mizoram tlawhtu hnuhnung chu 2009 Krismas dawna Mizorama concert rawn nei, Marcia Barrett (Boney M) kha a ni awm e.

World Cup 2010 khel tur ram zingah USA chu Mizoram tlawhtu tam ber ram an ni a, anni hi World Cup khel tur ram zingah mai ni lovin khawvel ram heti zat zingah foreign atanga Mizoram tlawhtu tam ber an ni.

1999 atanga 2009 chhungin USA atangin mi 960, mipa 598 leh hmeichhia 362-in Mizoram an tlawh a ni. Tim Howard-a te ram mipui 84-in kumin chhungin Mizoram an rawn tlawh tawh bawk.

Australian-in an dawt a, kum 10 chhungin mipa 245 leh hmeichhia 198-in Mizoram an tlawh. World Cup khel tur ram zingah chauh lo, a khawvel ram tin huapa chhut pawhin anni hi Mizoram tlawhtu tam ber dawttu an ni reng reng.

Harry Kewell leh Tim Cahill-a te ram, Vanlalsailova'n crusade a neih mekna ram atang hian Mizoram an rawn tlawh ngun ang reng a, Kristianna vang a ni tlangpui. 1999-2009 chhungin Australian 443-in Mizoram an tlawh bakah kuminah pawh 47-in Mizoram an tlawh leh tawh.

Mizote tan hlawh em em England atangin mi eng zatin nge Mizoram tlawh tawh tih hi hriat a har ang reng; foreigner registration office lam hian 'English' tih lovin 'British' tiin an chhinchhiah thin vang a ni. An chhinchhiah dan chuan kum 10 chhungin British mipa 313 leh hmeichhia 199, an vaiin mi 512-in Mizoram an tlawh tawh. Kumin chhung paw'n mi 28-in an tlawh tawh bawk. An zingah hian English an tam ber mai thei e.

Asia khawmualpui atanga World Cup khel tur ram pakhat- North Korea atangin mi tumahin Mizoram an la tlawh ngai lo. Anni hi 1966 hnua World Cup an vawi khat khelh lehna tur a ni a, Mizote tan an hlawh viauvin a rinawm.

Mizote tan em em pahnih- Japan leh S Korea te hian Mizoram an tlawh fo a, South Korean-ho chuan Kohhran thil vangin Mizoram an tlawh fo a, Japanese-ho erawh Mizoram sorkarin a chahluh an ni tlangpui.

Kum 10 chhungin Japanese 126, mipa 114 leh hmeichhia 13-in Mizoram an tlawh a, South Korean 108, mipa 63 leh hmeichia 45-in Mizoram an tlawh tawh bawk. Kuminah pawh South Korean 18-in Mizoram an tlawh tawh.

South America atanga World Cup khel tur ramte khu Mizoram nen an inkungkaih tha lo khawp mai; Uruguay, Paraguay leh Chile ram mi tuman Mizoram an la tlawh ngai lo, khawvel pian tirh ata!

Kum 10 chhung hian Maradona leh Messi te ram atangin mi 7, mipa 5 leh hmeichhia 2-in Mizoram an tlawh a, Kaka te ram Brazil atangin mipa 3 leh hmeichhia 2 te'n Mizoram an tlawh tawh.

Europe atanga World Cup khel tur ram mite hian Mizoram an rawn tlawh tawh fur; Germany leh England bakah Thiery Henry te ram France-in an thawhhlawk fu. Kum 10 chhungin 40, mipa 28 leh hmeichhia 12-in Mizoram an tlawh tawh.

Switzerland atangin mi 57, mipa 18 leh hmeichhia 39-in kum 10 chhungin Mizoram an tlawh a, Canavaro te ram Italy atang pawhin mipa 11 leh hmeichhia 1-in kum 10 chhungin Mizoram an tlawh.

Cristiano Ronaldo te ram Portugal atangin mi pakhat chiahin Mizoram a la tlawh. 2008-ah khan Portugese mipa pakhatin Mizoram hi a tlawh ve. Philosopher ropui ber berte chhuahna ram, kumina World Cup khel tur Greece atang pawhin mi 2 chiahin Mizoram an la tlawh. Serbia, Slovakia leh Slovenia ram mi tumahin Mizoram an la tlawh lo niin a lang.

Related Posts :