Tuikuk-in Union Home Minister hmu thei

Aizawlah dar hnih/khat emaw lek a cham a, press cofenrence pawh a nei hman lo; mahse union home minister P Chidambaram hi Tuikuk-ho chuan an hmu thei tlat!

Raj Bhavan-ah Tuikuk hruaitute hian union home minister P Chidambaram-a hi minute 10 vel an kawm a, lehkha an thehlut bawk.

Bru Co-ordination Committee (BCC) chairman Surjyamani leh midang pahnih, BCC finance secretary Solomon Porphul leh Damdiai khaw pa Lalnunpuia (Tuikuk) te'n P Chidambaram hi an kawm a ni.

BCC chairman Surjyamani-a sawi dan chuan, nikum November ni 13-a Zarzokima thih hnua Mizoram chhuahsantu Tuikuk, in kang lote tanpuina Rs 15000 chu tihpun an dil a, union home minister hian Mizoram sorkar hotute lo sawipui a tiam a ni.

Nikum November ni 13 hnua Mizoram chhuahsantu, tunlaia Mizorama let lehte hi a thlawna thla 9 chhung buhfai dawng tura tih an ni a, home minister hmutute hian a hun hi pawhsei an dil a, union home minister chuan 2011 October thleng atan a lo pawhseisak niin Surjyamani chuan Zozam Weekly a hrilh.

Union home minister P Chidambaram-a hi, ruahman dan chuan May ni 24-a Mizoram tlawh tur a ni a, Tuikuk khua- Damdiai pawh tlawh a tum a ni. Mahse, khua a chhiat avangin a tukah Mizoram a tlawh ta a, Damdiai pawh a tlawh ta lo. Mahse, Tuikuk hruaitute hian Aizawlah an lo hmu thei tho a ni.

"Amah hmuh tumin Aizawl kan pan a, home deptt. hotute hnenah te kan sawi a, a lo rem ta hlauh a, kan lawm khawp mai," tiin Surjyamani chuan Zozam Weekly a hrilh.

Mizoram puma Tuikuk mipuite tan Special Development Project tihpuitlin an dil a, a huam chin turah pawh Mizorama Tuikuk khua tawh phawt tih a ni. Tuikuk te'n eizawnna ngelnghet (self employment) an neih theihna tur leh zirna tihhmasawnna turte, Tuikuk khuaa sikul din te, khelmual siam te, hall sak te, tui in tur thianghlim leh electric current pekna te, Tuikuk te'n kawng hrang hranga hma kn sawn theihna turin Special Development Scheme hi an dil a ni.

Surjyamani sawi danin BNLF leh Mizoram sorkar inremnaah Special Development Project hi a tel a, vawiin thlengin tihpuitlin a la ni lo. Union home minister hian bawhzui a lo tiam niin Surjyamani chuan a sawi a, mahse, Tripura refugee camp-a khawsa Tuikuk zawng zawng Mizorama an let fel huna tihpuitlin a tiam niin a sawi.

Union home minister P Chidambaram hian Tuikuk-ho hi October thlaa kir hman vek turin a chah a ni.

"Kan unaute zingah raltlan engemaw zat an awm a, India hian a tanpui ngai lo; hruaikir chu sawi loh chhawmdawl pawh a chhawmdawl ngai lo. Chutih laiin Tuikuk-ho erawh an ngaihsak em em a, Tripura-ah hian 1997-ah khan an duhthu ngeiin an tlanthla tih kan sawi lawm lawm chung pawhin refugee angin an enkawl tlat a, union home minister-in Mizoram rawn tlawh a tum pawhin hun chep tak karah Damdiai chu tlawh a tum hram hram a ni," tiin MZP president VL Krosshnehzova chuan India sorkar laka an vui thu, hemi chungchangah hian a sawi.

"Tuikuk-ho hian Sakhan tlangdung atangin Mizo engemaw zat an umchhuak a, India sorkarin a chhawmdawl lo. Dimasa hel pawl hlauvin Mizo engemaw zat an tlanchhia a, India sorkarin a tanpui lo. Mizorama kan unau Hmar raltlante pawh tlawmngai pawlte'n a theih ang angin an tuamhlawm a, India sorkarin eng nge a tih? An awmna hmunah kan unaute hi hruaikir turin hma a la lo a, a chhawmdawl hek lo. Chutih laiin Tuikuk erawh an ngaihsak em em si hi mak kan ti," a ti.

Union Home Minister P Chidambaram hi Raj Bhavan-ah chief minister Lal Thanhawla leh a Council of Minister te'n an kawm. Mizoram sorkar hian Union home minister hnenah hian Memorandum an lo thehlut a ni.

Union Home Minister chuan Tripura-a Bru raltlante Mizoram sorkarin an laklet leh danah lungawithlak a tih thu a sawi a, Mizoram sorkar chu tha taka hnathawh chhunzawm turin a chah.

Union home minister chuan state dangte nena intelligence lam thawhhona tha zawk a awm theihna turin Subsidiary Multi Agency Centre hmang tangkai turin Mizoram sorkar a chah bawk.

Indo Bangladesh Border Fencing chungchangah union home minister chuan a siamtu te'n zo thuai se a duh thu a sawi. Hemi kaihhnawih- compensation leh tul dangte siamfel turin secretariat atangin sorkarin senior officer ruat mai se a ti.

"District Administration kengkawhtute chu ring ngam tawk turin BSF te chu hrilh an ni ang," a ti bawk.

Ramri chhehvela motor kawngpui siamthat hna, Km 2293-a thui, cheng vaibeichhe 2604.28 senna tur pawh tihfel thuai a nih tur thu union home minister chuan a sawi.

Chhatisgarh-a 2nd IR Bn. te enkawlna senso Mizoram sorkarin a la hmuh tur cheng nuai 302.26 pawh Ministry of Home Affairs (MHA) atanga tih fel thuai a ni ang, a ti.

Hel inpekna leh chhawmdawlna pek theihna dan Mizorama hman ve tura ngenna chu union home minister chuan Ministry of Home Affairs atangin Surrender Policy hi Mizoram sorkarah rawn thawnin a tul ang zelin bawhzui ni se a ti.

Security kaihhnawih senso awmte chu Ministry of Home Affairs atangin additional funds rawn pek a nih tur thu P Chidambaram chuan a sawi a ni. Mizoram State Commando te tana ramdang siam silai lei dilna chungchangah union home minister chuan silai mamawh ang te chu MHA-ah thlen a, chuta tangin Central Procurement System anga lo kalpui mai ni zawk se a ti.

Union Home Minister hi G.K. Pillai, Home Secretary, R.N. Ravi, Special Director, Safi Rizvi, OSD to Home Minister, R.R. Jha, Director (NE) leh Ajay Kanowjia Deputy Secretary ten an rawn tawiawm a ni.

Related Posts :