Thisen hlu thisen hlu

"1980-ah 'blood donors motivation' tih tan a ni a, chutih lai chuan Aizawl khawpuiah YMA branch 35 a awm a, Central YMA te remtihnain blood donation chungchang hi branch hrang hrangah sawi lar tan a ni a. Civil Hospital, Aizawl atangin zan khatah team hnih chhuakin hapta khatah zan thum campaign neih a ni thin a, Aizawl-a YMA branch hrang hrangte tlawhchhuah nan thla thum kan mamawh a ni," tiin Dr R Tlangkunga chuan a sawi.

May ni 27-ah MSACS leh Association for Voluntary Blood Donation tangdunte'n I&PR Auditorium-ah 'State Level Workshop on Blood Donor Recruitment and Training of Motivators' an huaihawt a, Kohhran thalai leh tlawmngai pawl hruaitute an kalkhawm a, thisen pe tura mipui zirtir tura tanlak a tul thu leh tanlak dan turte an zirho.

He huna thusawitu pakhat, Dr R Tlangkunga hi Association for Voluntary Blood Donation president hmasa ber a ni a, Mizoram-in thisen pek chungchang a hmelhriat tan dan a sawi a ni.

"1972-a Mizoram UT a nih hma chuan blood donation thil hi Mizoramah hriat a ni lo. Chuvangin hemi hma hian 'blood donors motivation' lampang pawh engmah inkaihhruai a awm lo. 1974-ah Aizawl Civil Hospital-ah patholigist dah a nih hnu hian blood transfusion tlem tlem tih tan a ni," a ti a, 1980-ah YMA te nen tangtlanga an beih tak thu a sawi.

Damdawi in hrang hrangah thisen pek tur mamawhna a sang tih a sawi a, "Aizawl Civil Hospital-ah ngawt pawh nitin thisen unit 30 a tlangpuiin mamawh a ni. Tin, Presbyterian Church Hospital, Durtlangah unit 15 vel nitin an lo mamawh a, district leh sub-division hospital leh private hospital hrang hrangte nen kan nitin mamawh hi unit 100 dawn lai a ni ang," a ti.

Thusawitu pakhat, Association for Voluntary Blood Donation general secretary C Lalnunnema chuan thisen pek kawngah Mizoram-in a la ti tha tawk lo tih sawiin, thisen pe thei, mahse la pe ve ngai lo an tam hle tih a sawi.

"Mizoramah mihring 11,00,000 vel kan awm tawh a, mi 110,000 (10%) velin thisen kan pe thei a. Tichuan 2009 chhunga Mizoram puma thisen lak zat chu unit 19,666 a ni a, thisen pe thei 110,000 atangin mi 19,666 (22%) chauh an ni a. Kum khat chhungin vawi 2/3 pe an awm avangin unit 19,666 hi mi 19,666 atanga pek a ni lo a. Chuvangin thisen pe thei si, la pe ve ngai lo an tam hle tih a chiang a, thisen pe thei zinga 15% chauhvin an pe thin tihna a ni a, tanlak a ngaihzia chu kan hrethiam mai awm e," a ti.

"Mizoramah blood donation 20% vel hi hmeichhiate pek a ni a, India ram pumah hmeichhiate pek 5% a nih laiin Mizoramah chuan an ti tha hle a ni," tiin Mizo hmeichhiate a fak.

Dr Lily Chhakchhuak-in thisen pe tura mite fuih dan a sawi a, 'donation' tih ringawt a that loh thu sawiin, mite chu thisen pek awmzia leh a tulzia zirtir phawt a, chumi dawtah mahni ngei chetchhuah duhna, inpekna tak tak nei tura zirtir a tul tih a sawi.

"Kum 18-60 inkarah vawi 168 thisen pek theih a nih avangin regular blood donor ni tura insiam kan tum tur a ni. Vawi 1 mai ni lo, vawi 10,20,30,50,100 thlenga pektir kan tum tur a ni," tiin kalkhawmte a fuih.

Mizoramah hian thisen pe thei zinga za zela 15 vel chauhvin thisen an pe thin nia chhut a ni a, thisen pe tura inzirtir a la ngai hle tih chu mithiam leh heti lam chhuttute ngaihdan a ni.

Association for Voluntary Blood Donation hi May ni 10, 1991-a din a ni, Aizawl, Lunglei leh Champhai-a te branch an nei a, Kolasib leh Serchhip-ahte din an tum mek. An hmalakna tlangpui chu- Motivation Campaign, Training/Workshop huaihawt, Blood Donation Camp buatsaih leh a thlawna thisen petute chawimawi te a ni.





Thisen pek zawng zawng atanga chhuta Voluntary Blood Donation-a Mizoram hmasawn dan:

Kum - Mi tu emaw Voluntary-a
hnena pek pek zat
1993 - 98.21% 1.79%
1994 - 97.10% 2.90%
1995 - 97.29% 2.71%
1996 - 97.15% 2.85%
1997 - 94.89% 5.11%
1998 - 89.90% 10.10%
1999 - 90.32% 9.68%
2000 - 86.37% 13.63%
2001 - 77.53% 22.47%
2002 - 63.59% 36.41%
2003 - 61.27% 38.73%
2004 - 41.27% 58.73%
2005 - 37.86% 36.41%
2006 - 37.32% 62.68%
2007 - 33.85% 66.15%
2008 - 32.20% 62.67%
2009 - 20.69% 75.54%;

2010 ah 80 % tlin tuma beih a ni.
('Mi tu emaw hnena pek' tih hian dam lo tu emaw hnena pek sawina a ni a, ' 'voluntary-a pek' tih hian a dawng tur pawh hre lawk lova tlawmngaih thil-a pek sawina a ni, chutiang chu Mizoramah a pung tial tial a nih hi.)

Related Posts :