Thinglung Na Damdawi

Lung di hmangaihna kawngah hian hlim leh lawm ringawt chuan hun a hman theih loh a. Tah leh rum tawh chang a awm a. Thinlung nat vawng vawng chang a awm bawk thin. Thinlung nat vawng vawng chhan hi kawng tam tam takin a sawi theih awm e, a then chu kan hmangaih te'n kan duh ang taka min chhan loh vang te, a thenah chuan kan inkarah midang an lo tlak zeh avangte pawhin a ni thei ang. Thenkhat ve thung chu kan inkar a tawp tak vang te pawh a ni thei bawk ang. Sawi tur tam tak a awm thei ang. Kan thupui thlan chhuah hi ngun taka ngaituah chungin intanpui theih dan kawng i’n zawng dawn teh ang.

Min lo chhawk mial tak hlauhin
Thinlung keh sawm hi ti mai teh ang, a tuartu tana thil na tak, midangin an hriatthhiam ve theih si loh hi a ni a, enkawl dan a dik chuan hlimna leh lawmna kawng i zawh thuai thei ngei ang. A pawimawh hmasa ber chu i chung a thil lo thleng avang khan mi mawl leh mi-a i ni hauh lo a. Duh tak te nena inthenna avang thinlung na hi thil pangngai a ni ti phawt ila ngeiawm a ni hauh lo ang.

I theihna zawng zawng, i hun, i nun te i hmangaih tan i hmang a, chhan engemaw vangin inthen a lo tul ta mai si a, chu tak chu a na lai tak chu a ni. A chhan a chu eng pawh ni rawh se, i thinlung chu a na tak zet a nih chuan mahni chauha awm hran a, tuma tihbuai loh a awm i duh thin ngei ang.

Heti hian han ti dawn chhin teh, i thiante emaw i chhungte bulah han i chhuak ngam em? I sawi chhuah chuan a chhawk huai ang che. Sawiho hi thil hrisel tak a ni, kan ngam ngang lo a nih chuan tihian han ti leh teh, rilru lam thiam bik leh enkawl dan thiam pan tur kan nei ve ta nual mai. Anni hi pan a man hla khawp ang. Zah-a lak chi pawh a ni chiah tawh lo, anni puihna zarah hian i thil thlir dan leh suangtuah dan tih zauh sak che in thlir dan kawng dang an dap pui theih ngei che a beiseiawm.

I kawppui ti mai ila, i chass nen chuan in inthen tawh a ni tih hi pawm tlat la, amah lo chu ngaihtuah lo thei lovah emaw, a changa i tlawh fo emaw, i la phone fo emaw a nih chuan heng thilte hian a chungah beisei i la nei a nih tih i lantir tihna mai a ni ang a, i chhass ngawl i vei tihna a ni ber ang.

Chuvang chuan tul dang ti rengin inngaihtuah veng vengna hun awm lo turin lehkha chhiar, TV en awm hmun chet, infiam leh thil dang tiin i hun han hmang teh khai. I thinlung che vel leh vak vel a panngai leh hma chuan mahniin a tlem thei ang ber awm han tum leh teh. Kar tir lam hian lung len a zual duh deuh thin niin mithiamte chuan an sawi a, chumi hre reng chuan i awm dan han thlak thleng dawn teh khai.

Mahni intihhrehawm vak vak ai chuan in inngaihzawn laia hun hlimawm leh nuam i tih thin te, hrehawm leh harsatna in pahniha in tawn zawng zawng te kha han ngaihtuah let leh la, in inthen chhanah hian tunge thiam lo zawk, a chhan bul pui ber chu tunge thiam lo zawk tih te han ziak chhuak chin teh. In inngaihzawn laia in thil tawn zawng zawngte kha inzir nan hmang hlauh teh, ngaihzawng i neih leh huna awm dan i thiam theih zawk nan te, hmasawnna zel tur atan i hmang thiam a nih hlauh phei chuan i hlawk zawk ngei ang. I then tak i chass chu ngei ngawt hian awmzia tehchiam a neih loh avang leh inhuatna leh khakna thleng thei a ni a, chuvang chuan in inthenna chu i tan a tha zawk turah ngaih tum hram ang che.

In inthen vang khan chhass nei tawh miah tawh lo tura inngaihna lian tak i nei ngei mai thei, chutih hunah chuan i kawppui tur awm mi ngaihtuah chungin mihring nun hi nula tlangvalte inngaihzawnna ringawt khawvel a ni lo tih hriatchhuah tum la i tana tha tur chu i la tawn ngei beisei chungin i hun hman han tum la, midang tan inhawng la, i thian te, i chhungte tan inpawhna tha kawng hawnsaktu leh midangte tanpui thei turin inbuatsaih la, i hma lam hun a thil lo thleng tur te chhass thar lo lang turte nen lam he thinlung na atanga zirlai thar i neih chu remchanga hmangin lo hmachawn dan tur kawngah tanpui theitu a nih ngei a beiseiawm.