Sumdawng thiltithei vangin zirlaiten harsatna an tawk

Miretheite tan chuan SSA-in ziak-loh-bu (exercise book) a sem thin chu thil thlakhlelhawm tak a ni. Kuminah pawh chu exercise book sem tur chu nu leh pa tam takin an lo beisei a, mahse, first term exam hnuah pawh sem a la ni lo.

Second term tan a nih atanga thla khat dawn a liam leh hnu-ah pawh exercise book sem tur lei dan tur ngaihtuahin State Purchasing Avisory Board (SPAB) chu May ni 26 khan an thukhawm chauh.

SSA lam hi an muang hrim hrim a ni lo, kum tir lam khan exercise book sem tur hian an lo inbuatsaih tawh a, a supply-tu tur thlan nana tender an chhuah chhanna te pawh February ni 26 khan an hawng tawh nghe nghe. Mahse, hnam dang sumdawng thiltithei tak pakhat thuneitu sang lama a zualko avangin thla thum hnu-ah tender chhannate hi SPAB chuan an ngaihtuah ta chauh niin thudawn chuan a sawi.

Tender chhannate hi February ni 26 khan chawhnu dar 1-ah SSA additional project director hovin hawn a ni a, hetah hian tender chhangtu firm 154 atangin aiawh mi 48 an tel a, chhanna 32 chu tender-in a phut ang an nih loh avangin hnawl a ni. Hemi ni hian tender chhangtuten an exercise book supply tur sample an thehluhte endik a ni nghal bawk.

Exercise book supply chu an chang dawn nge chang dawn lo tih hriat chak taka an tender chhanna pawmsak te'n beng an dawh laiin an thuthang vel hriat chuan an thin a thawng hle. Tender chhannaah hian a phek hma leh hnungah tender chhangtute hian signature leh stamp pek vek tur tih a nih laia phek hma lam chauh pek avanga an chhanna nung ve ta lo Jerry Enterprise-in thuneitu sang tak pakhat hnena complaint an thehluh avangin supplier thlang turin SPAB hi an thukhawm thei lo tih chu tender chhanna nungte hriat dan a ni.

Sorkarin thil a lei dawn hian cheng nuai 100 chin chung lam senna tur a nih chuan SPSB thutlukna a ngai a ni. A leitu turte pawh SPAB chuan a thlang thin.

"An chhanna kha pawmsak turin thuneitu sang tak an ngen e, an ti alawm," tiin tender chhangtu pakhat chuan a sawi. Ani hian harsatna tawh hlauh avangin a hming leh firm tarlan a rem ti lo.

Jerry Enterprise aiawh hian tender hawn ni kha chuan Mizo tlangval kal mah se a tak taka buaipui veltu ber chu Ramu Gulgulia niin tender chhangtute chuan an sawi a; Ramu Gulgulia hian Chaltlang-ah in a luah a ni. Ramu Gulgulia hian exercise book supply chungchangah hian thuneitu sang tak pakhatin a puih dawn avangin supply pawh a chang ngei dawn ni awmin hmun thenkhatah chuan tawngkamte pawh a neih tawh tihte chu tender chhangtute titi a ni.

Tender chhangtute hian chhanna district an nei a, Aizawl district-a suppy tur chauha tender chhangte pawh an awm. Jerry Enterprise chuan district pariat-a supply turin tender hi an chhang a an chhanna pakhat mah a nung lo a ni.

"Mirethei sorkar kan ti a, mi thiltitheite sum um vangin mi retheiah pawh zirlai lehnghalin an tuar a, supplier pawh laklawh deuhin kan awm phah ta a ni," tender chhangtu pakhat chuan a ti.

Hetiang thuthang chungchangah hian May ni 6-ah khan Students’ Self-support Union pawhin "…a pawi kan tiin tute emaw duhsakna avanga zirlai ten an tuar ta nia lang hi hriatthiam harsa kan ti a. A rang thei ang bera mipui hnena thudik puangzar thuai turin kan ngen bawk," tiin thuchhuah an siam nghe nghe.

SSU chuan January thla atanga class an tan tawh laia May thlaah pawh exercise book sem a la ni thei lo chu engti kawng zawng maha hriatthiam theih chi-ah an ngai lo tih an sawi a, "Department lam leh a changtu education minister te chu a rang thei ang bera he thil hi sawifiah tur leh exercise book hi a rang thei ang bera sem turin kan phut a ni," an ti.

"Tin, he free exercise book atana sum hman tur zat hi Rs. nuai 100 chuang fe niin hriat ni mah se anmahni SSA lam pawhin chiang takin an sawi thei lo a. Chutiang sum zozai pawh chu financial year liam taah khan a lapse ve nge, hman theih turin a la awm tih te, hmanral tawh ni mai thei awma sawi awmte hi a dik a nih chuan eng atana hman nge tih hi mipui hriata puangzar thuai turin department hotute leh education minister kan phut bawk," SSU chuan an ti a ni. An thuchhuah hi SSU chuan education minister hnenah a copy an pe nghe nghe.

SSU hruaitu thenkhat chuan hemi chungchang hi SSA hotute hnenah an ngaihven a, chhanna mumal an dawn loh bakah exercise book lei nana sum hman zat tur pawh an hrilh fumfe thei lo a, RTI-in information an dil ta ringawt niin an sawi.

Hruaitu thenkhat chuan information mumal deuh nei a, thil awmzia an hriatchian hunah thil dik lo a awm ngei a nih chuan ngawih san mai tur chia an ngaih loh thu an sawi bawk.

Thudawn pakhat chuan May ni 26-a SPAB meeting khan supplier tur hi an thlang niin a sawi a, "Minute tihchhuah a nih mai loh avangin tuten nge supply dawn hriat a ni rih lo," a ti.

Hetih lai hian thudawn dang chuan SSU-in thuchhuah an siam hnuah SPAB meeting hi koh a ni ta niin a sawi.

Related Posts :