Law minister Lalsawta chuan naupang rethei, sikul kai thei lote chhanchhuah an ngai a tih thu a sawi a, miretheite hi chhanchhuah an nih loh chuan, thil dangah hmasawnna thleng mah se, chutiang hmun chu hmun nuam a ni thei lo tiin a sawi.
June ni 12 kha khawvel pumah naupang chhawr dona ni- World Day Against Child Labour a ni a, Mizoram-ah chuan Centre for Peace and Development leh Mizoram State Legal Services Authority huaihawtin he ni hi hman a ni. Right of Children to Free and Compulsary Education Act chungchang zirho a ni.
Khuallian chuan naupan lai atanga dinhmun tha chan loh avangin retheihna a pung niin a sawi a, khawvelah industry lama hmasawnna te awm mah se rethei leh hausa inkar a zau a, hausa aia rethei an tam zawk chhung chuan khawtlang nun a hahthlak a, revolution hial a chhuah phah thin, a ti. "Industry-ah thang vak vak mah ila, kan khawtlang nun kha retheite retheih chawrh chawrhna, khawvela an dahchhuah theih lohna khawp a nih chuan society hi a lo nuam thei reng reng lo a," a ti a, French Revolution pawh chutiang vanga thleng a nih thu sawiin, Mizoramah pawh chu dinhmun chu a intan nia a hriat thu a sawi nghe nghe.
"Mi tam zawk an retheihna society, Mizoramah pawh hin a intan ti tih tlat mai a," a ti bawk.
JF Kennedy-a'n USA president a nih laia a sawi- "A tampui zawk miretheite hi ka tanpui thei lo a nih chuan mihausa tlemtete hi kan venghim zo lo ang che u tih ka hlau," tih chu sawichhuakin minister Lalsawta chuan, retheihna umbo tul a tih thu leh naupang retheite lehkha zirtir tul a tih thu a sawi.
Naupang kum 6-14 inkar, zirna ina lut lo chuan zirna a dawn ngei theih nan court-ah a thlen thei tih Right of Children to Free and Compulsary Education Act, 2009-in a tarlan thu law minister Lalsawta chuan a sawi.
"Tun ang dinhmun thaa kan awm tawh hnu hi hi chuan naupang kum 6-14 inkar hi chuan lehkha hi zir ve ngei se," tiin, an chawrchhuahna in a zir loh avanga naupangin a chan tur ang a chang ve phak lo chu ngaihtuah a ngai hle tih a sawi a ni.
"State dangah chuan helna avang te leh thil dang vangtein harsatna sutkian theih loh an neih laiin Mizoramah chuan kan tih leh tih lohah chauh a innghat a ni," tiin naupangte tana hamthatna ngaihtuah kawngah Mizoram dinhmun a eng hle niin a sawi.
Child labour dona ni hmanna hi PB Lalrammawia, The Aizawl Post joint editor-in a kaihruai a, Right of Children to Free and Compulsary Education Act, 2009 chungchang leh a kaihhnawihah SDEO Aizawl West Lalhmachhuana leh Angela Ch. Ralte ten paper an buatsaih an zirho a ni.
Monday, June 21, 2010
Retheite retheihna hmun a nuam thei lo: Lalsawta
Subscribe to:
Post Comments (Atom)
No comments:
Post a Comment