Nuhovin Tiranga do ta

Mizo Hmeichhe Insuihkhawm Pawl chuan Tiranga do turin ke a pen ta; Mizoram puma 'Tiranga Do' beihpui thlakna chu June ni 18-ah Archive Hall, Babutlang-ah Indian Society on Tobacco and Health: Mizoram Chapter president Lal Riliani'n a hawng a ni.


Tiranga Do beihpui thlak hian Tiranga chauh ni lovin vaihlo telna hetiang chi reng a huam ang.

Lal Riliani chuan ruih theih thil leh vaihlo do chu mahni atanga tan a ngai tiin a sawi a, Pastor, Kohhran Upa, sorkar officer leh minister zingah te, nu leh pa zingah ngei pawh vaihlo leh a kaihhnawiha fihlim lo an tam tih sawiin, "Zu leh drugs kan buaipui em em a, Kohhran leh khawtlang pawhin a do a, nu te pawhin kan faten zu leh drugs ngawl an vei chuan tap chungin tlaivarin kan tawngtai a, vaihlo hi drugs chi khat a ni ve tho a, hetiang ti reng chungin, mahni inthiam chawpin kan fate zu leh drugs ngawl vei tana kan tawngtai hi a hlawhtling lo ang tih ka hlau a ni," a ti.

Zu leh drugs haw hle si-a vaihlo tih chu pawi lo nia ngaia mahni inthiamchawp chu Setana hmanrua niin a sawi bawk.

Tiranga leh heti lam chi thil siamahte vaihlo a tel thu sawiin Rii chuan, "Vaihlo-ah hian tur chi 4000 vel awmah chi 60 vel chu cancer thlen thei a ni," a ti.

"Vaihlo hian chuap, thin leh vun te a tichhe hma a. Tiranga-ah hian a tihmawi nana an hman 'Sudan Red' chu thazam tha lo thlen thei niin, 'Sakrin' an tih an telh chu Kal (Kidney) in a ngeih lo tih mithiam ten an sawi," a ti bawk.

Tun laiin vaihlo atanga thil siamtu company-in thalaite hip thei turin thil an siam thin tih sawiin Lal Riliani chuan, Tiranga leh heti lam thil te pawh ka tihrimtuina anga tawktarh a ni, a ti.

"Heng company-te hian 'catch them young' policy hi an kalpui ve a, thalai, a bikin hmeichhia ten an uar hle a, heti taka kan fate beia kan ram min luhkhungtu hi nu ten kan vei a, MHIP-in hma a la hi a inhmeh a, a lawmawm khawp mai," a ti bawk.

MHIP hian Tiranga do turin hmalakna tur a duang tawh a. General headquarters tih tur, Sub headquarters, Block leh branch tih tur te a duang sa vek a. Sub Hqrs. leh block-ah chuan a do tur bik sub-committee din te, thuziak leh heti lam inzirtirna hun siam te, doctor leh mithiam sawma awareness campaign huaihawt te, Tiranga zuar lo tura dawrkai leh whole seller te ngen te chu a langsar zual a ni.

Hetih lai hian Aizawl Veng thenkhat chuan an veng huam chhunga dawrkaite chu Tiranga zuar lo turin an ngen a, Veng thenkhatah chuan khap a ni hial tawh a ni.