NLUP: A THLAWN MAI DAWN? Sawi ang ni lo NLUP

¢ Lalthlamuana Ralte

Inthlan campaign auhla pui ber atan an hmang a, vote zawnna hmanraw tha a ni tih hai rual lohvin MLA 32 ngawt an hlawkchhuak a, an sorkar tuk atangin mipuiin beiseina sang tak nen an thlir zui nghal a, tichuan kum khat leh a chanve a liam tawh a, rei lo te-a leirem rah hun nghakhlel takin mi tam takin chu NLUP chu an thlir mek a ni.

Hmanah congress sorkar hmasak zawk tum khan New Land Use Policy (NLUP) hi a lo kalpui chiam tawh a, mirethei leh loneitute dinhmun siamthat chu a tum bulpui a ni a, tlangram loneih bansana eizawnna hlawk zawk leh ngelnghet siamsak chu a tum ber a ni bawk. Mahse, zep nak emaw, NLUP hmasa chu mualpho takin a zuzi ral ta a, a buaipuitu ministry-in a hmingchhiat phah a, a party thlengin an mualphopui a tih theih awm e.

Kum 10 chhung MNF party-in sorkarna an chang a, anni pawhin loneitute hmingin sum tam tak senralna project 'MIP' an buaipui a. Mahse, MIP pawh chu a NLUP ang thoin mualpho takin a zuzi leh ta a ni.

MLA inthlan hmachhawn tura political party hrang hrangte an inpuahchah laiin Mizoram congress party chuan NLUP bawk chu an tharthawh leh a, inthlan campaign laia an vauchher ber leh an auhla pui ber a ni zui a. 'NLUP hmanga chhung tin hnena cheng nuai khat sem' tih te an han sawi kai tak zelah phei kha chuan an khingpui party dangte tan tanlak ngaihna a vang viau a nih kha.

Tichuan, MLA inthlanah chuan sorkar tuk atanga NLUP sem tiamtu party chu hneh takin thlantlin an ni ta a. Thuneihna an chan tirh atangin chief minister leh a thuihhruaite thu leh hla kan hre zing malh malh viau a, NLUP chungchang hi an sawi tam pawl tak a ni ang. Sorkar tuk atanga hma la nghal vut vut tura beisei ni mah se thla engemaw zat liam hnu ni 19.6.2009 khan Planning Commission-ah NLUP atana ruahmanna chipchiar chu thehluh a ni ta a. Hetah hian Cheng vbc 2526.98 an dil a ni.

Mipuiin an nghakhlel a, CM leh minister leh an sangawi zawnpuiten NLUP chungchang an chhakchhuak reng bawk.

Kum 2009-10 chhunga hman tur cheng vaiblechhe 100 chu Planning Commission-in a rawn pe a, hei hi nikum budget-ah pawh tarlan a nih nghe nghe kha. Mahse, cheng vaibelchhe 100 chu a bultanna atana dawng tur mi thenkhat hnena sem tur ni awm tak a nih laiin kumin kum tir lam khan mipui hnen thleng lovin sorkar department thenkhatah an semdarh ta ringawt a ni.

"Engtikah tak sem ang maw?" tia thlir mektu loneituten kum dang ang bawkin lo an vat a, an hal a, thlai chi an thlak leh tawh. Hetih chhung zawng hian NLUP chu tang ang mai- a thawm chauh kan hria a, a tak hmuh tur a la awm lo.

Kum khat leh a chanve kal ta chhung khan kan ram hruaituten kawng hrang hrangin NLUP chungchang hi an lo sawi tawh thin a, an sawina hmun leh hun a dang thin ang bawkin an sawi dan pawh a inang lo zung thin.

Tun thlenga NLUP an sem ('sem' tih hi ram hruaitute tawngkam a ni) theih loh chhan hi mipui la inpeih loh vang te, survey la zawh loh vang te leh an fimkhur luat vang te leh thil dang dang chhuanlamah hmang thin mah se, a chhan lian ber chu sorkarin a mamawh zat pawisa a la hmuh loh vang hi niin a lang. A nihna takah chuan mipui inpeih loh aiin sorkar a la inpeih lohna zawk hi chhuanlam tling tur chu a ni a, kan sorkar hian NLUP buaipui tur hian leirem a la rap hlei thei lo ni berin a lang.

Kum 1 leh a chanve a liam ta a, tuna Congress party siam sorkar hi kum nga chhung chelh tluan turin beisei ta ila, chuti a nih chuan kum 3 leh a chanve awrh an nei tawh tihna a ni a. Hun an nei rei tawh vak lo. Inthlan leh huna an tla a nih phei chuan laklawh deuhin NLUP hi a zuih ral mai ang tih pawh hlauhawm tak a ni.

Hetia loneitu khawngaihthlak tak takten nghakhlel taka NLUP an thlir mek lai hian a hlawhtlin dawn leh dawn loh hi inrinsiak theih tak a ni awm e. Chuvangin kil hrang hrang atanga thlir kual a, a theih dan dana zir pawh a tha awm e.

NLUP thar
NLUP hlui a chhe lai siamtha a, an tharthawh leh a ni bawk a, hei vang hi ni maw nikum lamah te kha chuan Revised New Land Use Policy (RNLUP) ti khan an sawi thin. Mahse, tunah chuan a hming hlui NLUP bawk kha puttir a ni leh ta. Sawi leh lam a rem zawk vang pawh a ni maithei e.

NLUP hmasa kha a hlawhtling lo tih hi mi tam ber pawm dan ni mah se Congress party chhunga engemaw zat chuan a hlawhtling hle niin an ngai lui ve tlat thung. Khati khawpa sorkar hmalakna lian tham leh sum sen tamna a ni chung khan zirchianna mumal a awm lo a, review/report hmuh tur pawh a awm lem lo bawk. Chuvangin, a hlawhtlinna (success story) sawi tur a bar a awm lo hi a mak lo reng a ni.

NLUP hmasaa mualphona khuh tur khan tun tum NLUP hi kalpui an tum ngei tura ngaih a ni a, chutiang zawng chuan mipui pawhin a thlir niin a lang. Sorkar leh ministry pawh a fimkhur phah ngeiin a rinawm viau bawk.

Tun tum NLUP hi mithiamte kutchhuak tur angin kan hruaituten an lo sawi tawh thin a, chutiang tura beisei a nih mek laiin mithiamte kut thawhna a vang tial tialin a lang tlat mai. Board member thenkhatte hi chu an thiamna vanga ruat an ni ngei chuan a lang a, mahse, ruahmanna an siam dan leh an kalpui danah hian chutianga mithiamte hman tangkaina chu a tam lo viau thung.

Land Reform a pawimawh hmasa
NLUP hmasa avang khan vantlang ram zau tak mimal kutah a awm phah a, thiltithei deuh leh duham deuhten ram an nei zau tial tial a, an nei tam deuh deuh bawk a. Hetiang zel a kan kal chuan thangkhat lian a vei leh chuan Mizoram hi mimal ramin a khat vek tawh hial ang.

NLUP hi hlawhchham leh ta phei se la chuan a nghawng tha lo ber tur pakhat chu ram (land) avanga buaina hi a ni ngei ang le. Hman atangin kan ram hruaitute hian ram neih dan leh enkawl dan chungchang hi an ngaipawimawh tawk lo khawp mai. Dan mumal kan nei lo a, kan neih hhun pawh lekkawh a ni lo hlawm.

A nihna takah chuan ram hruaitute (Politician-te) leh officer-te hi ram nei zau zau te an ni a, tam tak hi chuan an theihna hmun apianga invalh zel an duh ni maiin a lang. Chutiang a nih avang chuan kan mamawh em em ram neih dan phung siamthat (Land reforms) hi tih a la ni lo.

Hetiang hmalakna lian tham, mipui nawlpui huap tur leh ram zau tak hmanna tur ang chi-ah hi chuan Land Reforms a bul tan awm tak a ni. Ram dang chu nise sorkari NLUP kaihhnawih a ram sem dan tur leh enkawl dan tur mumal tak a ruahman ang a. Chumi atan chuan dan a siam ngeiin a rinawm.

Ram leilung hman tangkaina tur (Land-use policy/project) a ni bawk a, NLUP in a nghawng hmasak lian tham ber tur chu ram (leilung) hi a ni ngei dawn. Ram awl leh vantlang ram sem vak vak hi a tum a ni mai ang tih a hlauhawm khawp mai. NLUP hmasa ah pawh khan mi tam takin vantlang ram tha tak tak an neih phah ringawt tawh a nih kha.

Kan ram dinhmun thlir a, kan milian leh thiltithei deuhte mizia han thlir vang vang hian Land Reforms kan mamawh zia hi hairual a ni lo a, chutih rualin thil harsa ber pawl erawh a ni thung si ang. Politician langsar chin leh sorkar hnathawk lal chinho hian ram neih dan phung siamthat a semrual ai chuan a tawp thlenga dodal an duh zawk hial awm asin. Chuvang chuan aniang Land Reforms tel miah loin Land-use policy kalpui an tum mek ni.

Hlawmchham se...
NLUP hi hlawhchham ta se, tute nge tuar nasa ber ang le? Congress party hian an chhiatpui thui viau ngei ang a, chief minister hi mimala tuar nasa tur tak a niin a rinawm.

Ministry leh party tawrhna bakah mipui tawrh dan tur hi ngaihtuah thiam a har. Beiseina sang tak nen kha chen an lo thlir a, an beisei anga an dinchhuahpui ta lo a nih chuan beidawn namenin an beidawng lo ang tih a lang reng a. Ram hruaitute ah rinna an nghat ngam toh lo hial maithei a, politics-a lo beidawng fo tawh an nih bawk avangin an rilru put hmang tur hi sawi thiam a har dawn khawp mai.

Loneitute hian dinchhuah an duh a, an nghakhlel a, tunah hian chu chu an ban phak maia awm niin an ngai. Chutiang chuan chief minister leh an party hruaitute hian beiseina an siamsak mek a ni. Chutiang a nih tawh hnu a NLUP hi a hlawhchham leh si a nih vaih chuan an retheih tur zia leh an rilru hnual turzia hi sawiin a siak lo ang.

Related Posts :