NGAIHTHAH!

¢ HC Vanlalruata

Kan thenawm Manipur a buai a; a buai chhan hi a tirah chuan tlangmite tana din autonomous district council dan hlui hmanga inthlan buatsaih Manipur-a Naga hovin an duhloh vang a ni a. Hemi avang hian Naga pawl-te’n Manipur ei leh bar leh nitin mamawh chawkluhna ber kawngpui an dang chat a. Chumi hnu-ah NSCN (I-M) hotupa Thuingalen Muivah a pianna khua (Manipur chhung ami) tlawh a tum Manipur sorkarin an phalsak loh avangin ramri-a Police duty-te’n helaia pungkhawmte an hnawh darhnaah Naga 2 an kap hlum leh a. Hemi kal zelah hian kawngpui dan chah avangin chaw, damdawi leh tuialhthei an nei tlem ta lutuk a, buai namen lovin an buai ta a ni.

Manipur sorkar chuan a mipuite chhuanchhama awm tanpui turin Mizoram sorkar a rawn ngen a. Mizoram kaltlanga nitin mamawh phurh luh a rawn dil a ni. Sorkar chauh hi lovin Central YMA puihna a rawn dil bawk. Hetianga thenawmte’n tanpui an rawn dil takah hi chuan tanpui hi kan tih makmawh a ni a, kan theih ang angin kan pui tur pawh a ni. Tanpui min rawn ngennaah hian Silchar-Aizawl-Ngopa-Sinzawl-Churachandpur-Imphal kawnga tluang taka mamawh phurh luh an rawn dil a. Buhfai leh nitin mamawh dang hemi kawnga phurh tlang an rawn dil hi chu phal ngei chi a ni bawk.

Mahse, “Ka tih luatah Lengi’n ka zir sual e” tih ang maiin kan ti ta lua a ni awm e. A bikin petrol leh diesel, keimahni state-a hralh tura phurh luh chu tenawm taka sumdawn-na’na hmang duhte’n an hlawkna tur atan an phur chho ta chiam mai a. Sorkar awmlo ang maiin ni engemawzat chu hetiang hian kan kal hman a, kan harh chhuah meuh chuan kan petrol pump zawng zawng a lo kang chat hman titih tawh a nih kha.

An sawi dan chuan petrol litre khat Rs 44 pawh tling lova Aizawl-a an lei kha a let te a aia tam te-in an han hralh leh a. He sumdawnna tenawm tak hi namen lovin kan Aizawl khawpui ngeiah kan tuar ta nghal a. Sorkarin a ngaihthah rei luat vanga tuar kan ni bawk. Se bo hnu-a se kawngkhar tih ang deuhin tlai khaw hnu-ah kan khuahkhirh a, a pawi tur a pawi zo hman a, tawrh loh theih reng kha ngaihthah luat avangin kan tuar ta a ni ber mai.

Sawi tawh angin thenawm pa-in tanpuina min dil chuan kan tanpui ngei tur a ni a. Kan theih chin erawh kan hre tur a ni a, kan fairel bel ruak thak khawpa kan tanpui chuan kan nupui fanau-te chu riltamin an awm reng ang chu. Hetiang lo thleng thei hmu thiamlo sorkar hi kan hrawn rei ta hle mai. Hma thlir thui tak nei lo tan pawh a hlawma kan ram mamawh lak chhuah ruih ruih a nih chuan kan chhuan chham thuai dawn a ni tih chu hriat ve mai awm tak a nih laiin kan hre thei chuang lo. Kum tin March-April chhovah ram a kang thin tih hre chungin kan khuahkhirh thei lova, kan kang kum tin a, Fur ruah bawhawk-ah kan min chiam thin tih hre chungin kan ram leilung ngheh loh zia hre reng bawk chungin kan tinep theilo kumtin tho a ni. Chhiatna nasa tak lo thleng sela chuan kan ‘manage’ hnehlo ngawtin ka ring thin.

Manipur sorkarin min rawn dil hi phalsak mai i la a tha a. Kan ram kaltlanga thilphurh chu phal tur a ni. Tuialhthei an duh pawhin an la anga, kan ram kaltlangin an state-ah phur lut mai sela, tihdan pangngaiin seal thlapin an phur chho mai tur a ni. Buhfai leh damdawi pawh chutiang bawkin. Chumi piahlam chu min dil lova, kan pek a tul hek lo. Buhfai phurhna a hla lo ti ta pawh nise, an phurh chhuah zar zar dawn chuan an state buhfai chanpual kha kan state chhunga FCI godown-a an rawn dah lailawk pawh (hmun awl a awm theih phawt chuan) kan remti tur a ni ang.

Miin harsatna leh manganna an tawh hlawkna atana hman hi thil thar a ni lova, chutianga sum hmuhna tura tenawm taka mi harsat leh zualna siam thinte khuahkhirh chu sorkar hna a ni. Chu sorkar tihtur kengkawha ti tur chuan sorkarin hlawh neiin mi tam tak a ruai a, a hmang tangkailo leh thin a nih chuan sorkar mawh a ni bawk.